VAEGA 52

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 52.

***************************************************

Na atili ai le tagi aueue o le fafine o Eseta ina ua faalogo mai ua faapea atu lona to’alua o Tanielu, “Ua tatau ona fa’ailoa i tamaiti le mea lenei.”

“O le a le mafuaaga e fa’ailoa ai fua i tamaiti lea mea, o le la ua fai Amelia ia Taki, o lona tama na maliu i Lonetona, i se afi?” o le ‘ava’avau atu lea a Eseta i si tamaloa o Tanielu.  “Ma leisi mea, afai ae alia’e le mea lenei, o le a ave oe i le falepuipui.”

“Ou te le kea i lena mea.  Ua leva ona o ta tauaveina lenei avega mamafa ma ua matutua foi le ta fanau, ua tatau ona o latou iloa le mea moni,” o a Tanielua lea.

Ae ua avea lea ma mea ua le uma ai le tagi a le fafine o Eseta, ua pei o le la e fai se maliu i totonu o le la potu i le masusu a Eseta.

“Tanielu, faamolemole, a e alofa mai ia te a’u ma lau fanau, e te le manavaina se faamatalaga e tasi, e uiga ia oulua ma Tanielu,” o le tagi lotulotu lea a Eseta.

“O lena o le a e ma’i i lau tagi.  Alu loa e ta’ele ma sau e fai sau malologa, ua lava lena,” o le taumafai atu lea a Tanielu e faana si ona to’alua.

Na uma le faamatalaga a Tanielu, ona savali mai lea i fafo mai i le la potu ma agai atu e siaki le fale’aiga lea ua atoa le tolu o aso e le’i toe tatalaina.

E alu lena po, e le i moe le tamaloa o Tanielu, ae o le fafine foi o Eseta, ua na o le tagi e aunoa ma se leo, i luga o le la moega.

Ua malama le taeao, ua le sau i fafo Eseta mai lona potu.  Ae o le taimi lea, ua leva ona pakeko ia le tamaloa o Tanielu i gasesega o le taeao.

Ua mae’a ona sauni ia Ruta, Iakopo ma Naomi mo galuega ma a’oa’oga, ona muamua mai lea o le teine o Naomi i le fale’aiga e fesoasoani i ona matua.

Sa va’aia e Naomi, e leai sona tina i totonu o le fale’aiga.

“O fea mom?” o le fesili atu lea a Naomi i si ona tama.

“OI, la e moe.  O la lava e niniva le ulu mai i le le moe ma le le lava o se malologa, mai i le tatou tafaoga lea na alu,” o le tali atu lea o le tamaloa o Tanielu i si ona afafine laititi, ma taumafai e nana ona lagona popole ma le faanoanoa.

E ui ina sa vaaia e Naomi le laumata ‘ata’ata o si ona tama, ae peitai, na lagona e le teine, o lo o ua iai se mea ua tupu.

“O fea ia Ruta ma Iakopo?” o le fesili lea a Tanielu.

“La toeititi o mai,” o le tali atu lea a Naomi.

“Alu e fai iai e faatope mai, la’a ma’alili le mea’ai,” o le faatonuga lea a Tanielu.

Ua toe savali Naomi agai i le latou fale, ae ua le alu sa’o e ta’u le feau i nai ona tei matutua, ae ua fa’asasa’o i le potu a ona matua ma tu’itu’i lemu ai.

“Mom? Mom?” o le fafagu taumusumusu atu lea a Naomi i si ona tina.  

Ae o le taimi lea, ua u mai le papatua a le fafine o Eseta.

“O iai se mea e te mana’o ai?” o le fesili mai lea a Eseta, e aunoa ma le lilium ai e faasaga i lana tama.

“Ua e gasegase?  E iai se mea e te mana’omia?” o le fesili atu lea a Naomi.

“Leai, na’o lo’u ulu lea e tiga, ae ua uma na inu la’u fualaau.  Alu e tapena i le galuega, se’i fai sa’u malologa,” o le tali mai lea a Eseta.

Ua toe savali mai i fafo ia Naomi ma le popole o lona loto.  Ua na iloa lelei lava, e iai le mea ua tupu.

[E FAIA PEA]