Tala I Vaifanua
O se vaaiga i le tama o Meaole Naea mai Amouli, au fa’atasi atu i Amerika e auai ma lona alo ina ia tapua’ia faiva o Maria Naea i le tauvaga a le Miss Teen USA, lea ua pale ai nei lea alo o le atunu’u. O lo’o fa’atasi ai ma le sui o Amerika Samoa i le Konekeresi, Aumua Amata. [ata: foa’i Mariah]
O se va’aiga i le faifa’ato’aga o Valavalaotumanu Sauvao mai Leone ma Faleasi’u ua ia fa’ailoa mai ana fua o fa’aeleeleaga sa fa’atau i le aso Tofi i le maketi i Fagatogo. [ata: Leua Aiono Frost]
Le ali’i faifa’ato’aga ua ia tapenaina le fa’atauga a le fale’aiga sa o’o ane ai le ali’i faigaluega lena i le Maketi e siakia lelei ma fa’atau atu talo lelei mo le fofoga taumafa o le atunu’u. [ata: Leua Aiono Frost]
MARISH LIMALA’U RAE NAEA - TAUSALA TEEN USA CONTINENTS
O le alo o Amerika Samoa mai le afio’aga o Auto, Mariah Limala’u Rae Naea, ua avea ma Tausala Lalelei Teen USA Continents 2017-2018, ina ua mae’a se tauvaga tele sa faia i le a’ai o Las Vegas ia Iuni 30.
O ia o se alo e fa’asino ia Ketesemane Meaole ma Afano Limala’u Naea. Sa mua’i tau’avea le igoa o Amerika Samoa i lana tauvaga muamua i le Miss Teen Culture International i Las Vegas i le tausaga 2015-2016 ma manumalo ai. Ona soso’o lea ma lona toe tau’avea fo’i o Amerika Samoa i lana taumafaiga i le tauvaga Miss Teen American Samoa United States I le tausaga 2016-2017 lea fo’oi sa ia manumalo ai, na faia fo’i i Las Vegas. Ona ulufale atu ai lea I le tauvaga Miss Teen California US Continents i le amataga o le 2017 ma sa ia mauaina ai le tulaga muamua ma agave’a ai e tauva mo le Miss Teen US Continents lea na faia ia Iuni 30 ma ua pale ai fo’i.
Sa le manatu Mariah ia tele ni pale, peita’i, o le filifiliga a lenei tama’itai ua ia fa’aalia mai, “Ia mafai lava ona fa’alauiloa le igoa pele o Amerika Samoa i tauvage nei, e mafai ai ona agave’a e ulufale i le tauvaga Miss USA [Iunaite Setete o Amerika] po’o le Miss Universe [Lalolagi] i le lumana’i e fa’amae’a ai lea auaunaga mo o’u tagatanu’u.”
I luga o tusitusiga i le Facebook, sa fa’ailoa mai ai lona lea taofi, ae maise o lona naunau ia fa’alauiloa le atunu’u o lona tupuaga.
“E ui ina ua maliu si o’u tina o lona tina, Afano Limala’u Meaole Naea mai Auto ma Savaii, Samoa ae o lo’o o’u tauavea lona igoa pele, Limala’u, ma ou te iloa fo’i e i ai lona uiga fa’asamoa! Avea lea ma mitamitaga ia te a’u aua o lena igoa e fa’amau ai, le toto Samoa o lo’o ia te a’u.”
O Mariah e na’o ia lava le tama a lona tina o Dorothy Meaole, ma o lona tina lea sa soifua a’e i Auto, Amerika Samoa ma Savaii i Samoa, ao Maraih sa ola a’e i le setete o Kalefonia ma si ona tina.
I lona olaga a’oga i a’oga tulaga muamua sa fiafia tele o ia i le aoaoga tau atisi, ma sa ia mua’i maua e ia le sikolasipi e a’oga ai mo le tausaga atoa ona o lana taumafaiga i lena mataupu i le 9 o ona tausaga.
E fiafia e tauva i le Soccer ma le Volleyball, ma sa o’o lava i ona tausaga e a’oga ai i A’oga Maualuga ua fa’aauau ai lava ona ta’alo i le Volleyball. Na amata ona ta’alo fa’atauva i Kalapu i Kalefonia i lona 12 tausaga ma faasolo ai i aoga maualuluga.
I le siva a le vasega fa’au’u sa ia filifilia ai se tasi o fanau e le atoatoa le malosi o le tino ma le mafaufau o sana paga mo lea siva tele. Sa a’oga lelei fo’i o ia i se a’oga fa’apitoa, ina ia malamalama i uiga ma lagona o le fanau e le atoatoa le tino ma le mafaufau.
E tele galuega i le aai o Oceaniside e auai ai Mariah i Kalefonia. I le taimi nei ua fai si leva o avea o ia ma tama’ita’i e fa’aalia Ofu o ituaiga sikaili eseese mo le Heiva i San Diego.
O le tina o lenei tama’ita’i, sa faigaluega mai le amataga o se tama’ita’i tausima’i ae ua ia fa’ailoa maia, ua atoa le 5 tausaga ua le toe faigaluega, ae ua sauni e feoa’i ma fesoasoani ia Mariah.
Sa fa’ailoa mai e Dorothy, “O lo’u tama, Ketesemane Meaole, e matua tele lava lona sao i le ma’ua olaga ma si a’u tama o Mariah. O lona iloa o le tatou olaga fa’asamoa, ma le a’oa’oga o uiga e iloga ai le talavou Samoa e a’oa’oina, o le matata lena a si ou tama e fa’atonu lava ia Mariah, ma o se fiafiaga fo’i lea ia Mariah pe asiasi mai si o’u tama ia i ma’ua.”
“E ui ina na’o a’u lava le matua o Mariah, ae ua avea lo’u tama ma o’u tuagane e fai ma tama ia te ia e fesoasoani ia te a’u i taimi e mana’omia ai. O Mariah fo’i o se meaalofa sili ua ou maua mai le Atua, o lo’u lalolagi e aotelega i si a’u tama ma ana taumafaiga. O si a’u tama o la’u uo mamae lea i lo’u olaga.”
Ina ua fesiligia i sana matata e fia tautua ai e ese mai nei taleni ua lauiloa ai, ae sa ia fai mai, “O lo’o ou sauni mo le ulufale i le Kolisi e tausailia ai lou fa’ailoga maualuga i le Tusitala ma le Tausima’i. I le taimi nei o lo’o o’u tautala i le Leitio fa’asalalau i Arizona ma le Leitio fo’i i Hawaii Aloha News, ae o lo’o fa’asolo o’u ata o fa’aaliga o lavalava ituaiga sikaili eseese i le Fox News 5 i le a’ai o San Diego, Kalefonia, i fa’asalalauga o siakili eseese.”
FA’ATAUGA I L E TERITORI TALU ONA TAOFIA TALO MAI SAMOA
Sa asia le maketi i Fagatogo i le aso Tofi ua te’a i le tulaga o le talo o lo’o faatau ai talu mai ona taofia le talo mai Samoa. Ina ua fesiligia e tusa ai o le tupe maua talu mai ona taofia uta talo mai Samoa, sa faailoa e faifaatoaga, “E leai lava se fa’aletonu o le sapalai o le talo, o lo’o lava mo le fofoga taumafa o aiga, faapea fo’i ma le fa’atau atu i le mamalu o le atunu’u mai i le maketi nei.”
I le faifa’ato’aga lea, e le sau i le maketi i le vaiaso atoa, ae filifili lava e ia aso e o’o ane ai ma ana uta talo, fa’i ma esi e fa’atau atu i le mamalu o le atunu’u. O mea fo’i ia o lo’o ia avea i le latou Asosi a le Aufai Fa’ato’aga mo le polokalama o le Mea’ai a Fanau A’oga, e masani ona ia mauaina le avanoa mo le 200 pauna o le talo.
E ese mai le maketi o i ai nei, o lo’o ia sapalaia le fale’aiga o le KS Mart i Tafuna, fale’aiga o le Steven & Sons ma le Fale’aiga i le lumafale o le Samoa Tuna Processors. O nei avanoa e tolu sa ia le mauaina muamua a’o aumaia le talo a Samoa.
O le ali’i faifa’ato’aga lea o se tasi mai Faleasiu, Samoa ae o lo’o fa’aipoipo ise tamaitai Tutuila, o Valavalaatumanu Sauvao, na fesiligia o ia i le tau o lana talo, ae na’o le tolu talo i le $10.00, talo ia fa’ato’a fafai mai ae tusa o le lua pauna lona mamafa. Mo lana sapalai i Kamupani o i ai fale’aiga e ta’i $2.00 I le pauna talu mai ona taofia le talo mai Samoa. Ae o lana fa’i e 50sene i le fa’i e tasi, e le fa’atauina i se pauna le fa’i.
O le isi faifa’ato’aga, Ioane Etuale mai Aoloau, sa ia fa’ailoa mai pe fa’atolu ona o mai i le maketi i le vaiaso. E i ai se fale’aiga e fa’atonu ai lana talo. Fai mai a ia, o le tele o le la’ua talo - ma lona atali - o le fa mumu lea e fai si umi o tu’u e le mago gofie le a’ano. Talu ona tu’u le talo mai Samoa, ua tele ina vave uma la’ua uta talo e la’u mai mo le atunu’u, peita’i, e o’o mai loa i le maketi, e tele ina tautala sa’o atu ia te’i la’ua ni fa’alavelave o aiga, po’o mea e fai a autalavou ma pisinisi fo’i, e fa’atau atu lava i le makeri ia i la’ua.