O lo o fa’aauau pea i le taimi nei su’esu’ega a le Vaega o Leoleo Su’esu’e (CID) a le Matagaluega o Leoleo a le malo, i fa’alavelave e 2 ia na tula’i mai i le atunu’u i le vaiaso na te’a nei, lea ua ma’imau ai soifua o ni ali’i se to’alua.

O le fa’alavelave muamua na tula’i mai i Malaeimi i le po o le aso Lua o le vaiaso na te’a nei, lea na maua atu ai se ali’i talavou ua maliu, ma le fa’alavelave lona lua lea na tula’i mai i le taeao o le aso Lulu na sosoo ai, ina ua maua i totonu o se potu i se tasi o va’a fagota se tino o se ali’i va’a o loo maliu ai, e mafua mai i ni manu’a sa i lona tino, lea e masalomia sa fa’aaogaina i ai se a’upega maai.

Na fa’amaonia mai e sui o le Vaega a le EMS i le Samoa News e fa’apea, o le fa’alavelave sa tula’i mai i Malaeimi, na maua atu ai se ali’i talavou ua matapogia o ia, ma ua le manava fo’i.

Ae o le fa’alavelave e fa’atatau i le ali’i va’a mai le va’a fagota Amerika, e le gata sa maua le tino o le ali’i na a’afia o loo i totonu e le o mafai ona manava, ae sa molimauina fo’i ni manu’a i se vaega o lona tino, e foliga mai sa fa’aaoga i ai se a’uega ma’ai.

Na fa’amaonia mai e le sui o le EMS e fa’apea, na fa’atoa fa’amaonia le maliliu o nei ali’i ina ua taunu’u o la tino i le falema’i o le LBJ i Faga’alu i taimi eseese na tutupu mai ai nei fa’alavelave.

Na fa’amaonia mai e le Komesina o Leoleo ia Le’i Sonny Thompson i le Samoa News i le vaiaso na te’a nei, le fa’aauau pea lea o su’esu’ega a le Ofisa e tusa ai o nei mataupu.

Na taua e se sui sinia o le Ofisa o Leoleo i le Samoa News, le to’atele o ali’i va’a mai le va’a fagota na tula’i mai ai le fa’alavelave na auina atu i le Ofisa o Leoleo i Fagatogo i le vaiaso na te’a nei mo suesuega.

Na asia e le Samoa News le vaega o le uafu tele i Fagatogo o loo taula ai le va’a fagota o loo a’afia i lenei fa’alavelave, ma vaaia ai se ta’avale Leoleo fa’apea ai ma se ali’i Ofisa o loo tiute ai i le taeao ananafi.