O lo o fa’aaua pea le pasiaina e le Fono Faitulafono o tofiga a le afioga i le ali’i Kovana ia Lolo Matalasi Moliga, o loo mafai ona tu’uina atu mo iloiloga a Komiti a maota ta’itasi i le vaiaso na te’a nei.

I luma o le maota maualuga a le Senate i le aso Faraile na te’a nei, na pasia ai e afioga i senatoa le tofiga a le kovana mo le faletua ia Eseneiaso Liu, e avea ai o ia ma Fa’atonusili o le Matagaluega o Tagata Faigaluega a le malo i le palota e 15-1.

Ae i luma o le maota o sui, na pasia ai e afioga i Faipule le suafa o le susuga a Tauapa’i Laupola e avea ma Fa’atonusili o le Ofisa o Fa’amaumauga a le malo, le KVZK-TV i le palota e 16-0.

ILOILOGA A ESENEIASO LIU

E to’alaiti lava afioga i Senatoa na fa’aleo a latou fesili fa’asaga i tofiga a le kovana mo le faletua ia Eseneiaso Liu i le taimi o lana iloiloga, lea sa fa’atautaia e le Komiti a le afioga i le ali’i Senatoa ia Magalei Logovi’i, peita’i o le to’atele o senatoa sa maua avanoa e saunoa ai, sa na o le agaga fa’afetai i le kovana ina ua ia filifilia lenei faletua e avea ma Ta’ita’i’ o se tasi o Ofisa taua o le malo

I le fa’atauaina o le Ofisa e gafa ma mataupu e laina tutusa ai tagata faigaluega a le malo (EEO), na taua ai e le afioga i le alii senatoa ia Paepae Fai’ai i lana saunoaga, le tatau lea ona fa’ataua e le malo le Ofisa ma le tagata ua tofia e fa’auluulu i ai lea Ofisa, ona o le tele o mataupu o loo maitauina i le taimi nei, e fiafia tele tagata faigaluega e tulioso i le feterale e faila i ai a latou mataupu, pe afai e tula’i mai ni fa’aletonu i a latou galuega, ae fa’agalogalo ai le taua o le Ofisa a le malo o loo i ai.

Saunoa Tuaolo M. Fruean e fa’apea, o se nofoaiga ese lenei mai le tele o nofoaiga ua mavae atu, ona e to’a 7 Tina ua filifilia e avea ma Fa’atonusili o Matagaluega a le malo, ma ua atagia mai ai le talitonuina e le ali’i kovana o le tautua a Tina.

O ni isi o fautuaga sa tu’uina atu e senatoa i le molimau, ia alofa i tagata faigaluega ma ia fai fa’aiuga amiotonu ina ia laina tutusa uma ai tagata faigaluega uma a le malo.

ILOILOGA A TAUAPA’I LAUPOLA

O le to’atele o faipule na maua avanoa latou te fesiligia ai le susuga a Laupola i le taimi o lana iloiloga i le aso Faraile na te’a nei, lea na fa’atautaia e le afioga i le ali’i faipule ia Faimealelei Anthony Fu’e Allen, o le ta’ita’i o le Komiti o le Fa’agaioiga o le malo, sa taua ai lo latou le fesiligia o agava’a o lenei ta’ita’i o le atunu’u, ona e le gata i le tele o tausaga sa tautua ai i vaega ‘au a le malo tele o Amerika, ae o lana tautua fo’i i totonu o le faigamalo a Amerika Samoa.

O se tasi o fautuaga sa tu’uina atu e sui o le maota, o le fautuaga na auala mai i le afioga i le ali’i faipule matua ia Gafatasi Afalava, ina ua ia fautuaina le Fa’atonusili fou e toe silasila i polokalame o loo fa’asalalau e le KVZK-TV e maimoa ai le atunu’u, ona o le tele o taimi, toeititi lava vaiaso uma e tai tutusa ai lava polokalame e fa’aali i le atunu’u, ae ua tatau ona i ai se suiga o polokalame latou te fa’aaliina i le atunu’u.

“Ou te le iloa pe vaai le Faatonu i polokalame o le a fa’aali i po ta’itasi ae lei alu i lona aiga i le afiafi, ae o la’u vaavaai atu i ai, e na o le o atu lava o le vaega lea, si’i mai le tape lea sa fa’aalu anapo ma toe sulu i totonu, ona toe fa’asau lava fo’i lea o polokalame sa fa’aali i le po ua mavae”, o le saunoaga lea a Gafatasi.

E oo fo’i i le polokalame o talafou, na taua e Gafatasi e faapea, o talafou mai le “leitio ma nusipepa” ia o loo maua ai e le atunu’u tala i mea o loo tutupu.

“E oo fo’i i talafou, e leai lava ni ‘news’ fou, o ‘news’ tuai lava, ae o galuega fa’apenei, e mafai ona outou malaga solo i tua e ao mai ripoti i mea o loo tutupu i le atunu’u, pe tou te o mai fo’i e pu’e atu galuega a le Fono Faitulafono o loo fai, ae talanoa muamua i Ta’ita’i o le maota mo lea tulaga, se’i pu’e mai ai nisi ‘action news’, ae o le mea lea e i ai, a leai lava faiga lotu ma galuega fa’aulufale e leai ni ‘news’ e pu’e mai e lau vaega, ae ua na o ni fautuaga e taoto atu i ou tafatafa”, o le saunoaga lea a Gafatasi.

I le tulaga o le fa’aleleia o le galuega, sa fautuaina ai e afioga i Faipule le molimau ina ia silasila toto’a i totogi o ana tagata faigaluega, ona o le to’atele o tagata faigaluega ua loa la latou tautua ae foliga mai e le o lelei lava totogi, e oo fo’i i le fale ma mea faigaluega o loo fa’atino ai galuega, o isi ia vaega e tatau ona toe silasila toto’a i ai mo le toe fa’aleleia.

O le mae’a ai o le tauaofiaga a le maota o sui i le aso Faraile na te’a nei na pasia ai le suafa o Tauapa’i, na tapena ai loa e le susuga i le ali’i Fa’atonusili filifilia se taumafataga mo le maota o sui, o ia fo’i le ulua’i Fa’atonusili filifilia ua mafai ona tauaao atu sana fa’aaloaloga i luma o le Fono.