TALA I VAIFANUA
Pago Pago - AMERIKA SAMOA
TOE A’AFIA NI ISI E 34 I LE ‘DENGUE’ I SAMOA
I se fa’aaliga mai i le Minisita o le Soifua Maloloina a Samoa, o lo’o ta’ua ai le toe faaopoopo o ni isi e to’a 34, ua a’afia i le fa’ama’i o le ‘Dengue Fever’, i le va o Aperila 15 ma le 21, 2024.
Ma ua atoa ai le to’a 250 i Samoa, ua a’afia i lenei gasegase, talu mai Novema o le tausaga ua tuanai.
O le toatele o I latou ua a’afia i lenei gasegase, e mai i le itu i Matu-Sisifo o Upolu ma totonu o Apia, ma o tagata e 60 tausaga agai i luga.
O le aso 19 o lenei masina, na fa’alauiloa mai ai e le Minisita o le Soifua Maloloina le pepesi o lenei faamai i totonu o Samoa, ina ua silia ma le to’a 80 tagata o le atunu’u na lipotia mai le a’afia i le faama’i i le va o le lua vaiaso.
O le aso Faraile o le vaiaso ua mavae, sa faapea ona afa aso ai ofisa ma matagaluega o le malo, ina ia mafai ona fesoasoani tagata faigaluega a le malo, i le tapeina o namu, , ona o le iniseti lenei o lo o tauaveina lenei faama’i.
O lo’o ua iai foi se fuafuaga mo le fa’aasuina o nu’u ma afioaga, aua lava se taumafaiga e tapeina namu, ae e le i fa’amautuina mai se aso e faia ai lea tulaga.
Ua lapataia tagata o le atunu’u ina ia alo’ese mai i le inuina o fualaau e pei o le ‘aspirin, ibuprofen ma isi ‘non-steroidal anti-inflammatory’, ona e ono a’afia tele ai totoga o le tagata e a’afia i lenei gasegase.
O lo’o iai se talitonuga, o le a mafai ona toe faaitiitia le pepesi o lenei faamai, pe a o’o atu Samoa i ona tau malulu.
AUAI LE PULEA’OGA A SPA I SE FONO FAALETAITAI A AUTALAVOU O LE PASEFIKA
Na faamamafaina e e tamaitai puleaoga a le South Pacific Academy (SPA) ia le taua tele o le tulaga o le faitau tusi a a lo ma fanau aoga o le Pasefika, aemaise lava i totonu o Amerika Samoa. O le tamaitai pulea’oga ia Sabrina Suluai-Mahuka, ua na o le pau lea o le taitai a’oga mai Amerika Samoa, na filifilia e auai atu i se Fonotele Faaletaitai mo Autalavou, lea sa faia i Athens, Greece i le ogatotonu o Aperila.
E na o le to’a 100 taitai matutua mai i le lalolagi atoa, sa filifilia mo lenei fonotaga, ma na fa’amanuiaina Sabrina, ina ua aofia o ia i le to’a 50 sa filfilia e totogi atoa lana auai atu i lenei fonotaga taua.
Ma e ui o lo’o avea o ia ma pulea’oga a le SPA, ae o le filifilia o ia, e faavae lea i lona tofiga o le Faatonusili ma o le sa faavaeina le polokalama o le ‘Finafinau’, o se polokalama o lo’o gafa ma le aoaoina o fanau aoga i tulaga o le siosiomaga faapea ma le u’unaia o fanau aoga e avea ma taitai i le faasaoina o le siosiomaga.
ASIASI MAI SUI O LE ‘WHO’ I LE FALEMAI A LE LBJ
O le aso 16 na fa’afeiloaia ai e le pulega a le Maota Gasegase autu a Amerika Samoa (LBJTMC) ia sui o le Faalapotopotoga o le Soifua Maloloina o le Lalolagi (WHO), aua sa latou asiasiga i le maota gasegase i Fagaalu.
O le autu o lenei asiasiga, o se taumafaiga ina ia fa’amalosia feutagaiga ma le falemai faapea le iloiloina o tulaga o le falemai i lenei itu o le kelope.
O le Faatonusili o le eria o le Pasefika, i totonu o le WHO, ia Dr. Saia Ma’u Piukala, sa na ia taitaia maia lenei faigamalaga. Ma o Dr. Piukala, o le uluai tagatanu’u o le Pasefika, ua umia se tofi faaletaitai i totonu o le WHO.
Sa fa’au’uina mai o ia mai i se a’oga fa’afoma’i i Fiti ma o lo’o avea nei o ia ma le Minisita o le Soifua Maloloina i totonu o Tonga.
O nisi o sui o lenei faigamalaga, sa aofia ai ma Dr. Kim Eva Dickson lea o lo’o avea ma sui o Samoa, Amerika Samoa, atu Kuki, Niue ma Tokelau, i totonu o le WHO; o Ms. Laura Davison, Mr. Taniela Sunia Soakai, ma Lepaitai Balance Hansell.
I la latou asiasiga i totonu o le L BJ, sa maua ai e nei taitai mai i le WHO ia auala o lo’o tautuaina ai e le LBJ ia le ola maloloina o tagata o Amerika Samoa.