Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

 

SAINIA TULAFONO O LE GAGANA SAMOA E 2 AI GAGANA MO A’OGA

 

Ia Aperila 05, 2022, na sainia ai e Kovana Lemanu P. Mauga se tulafono e fa’avae a i le Komisi o le Gagana Samoa i Amerika Samoa. O se vaega o lea tulafono e lua a’i gagana mo a’oaoga i totonu o potu a’oga i aoga a le malo. 

 

Ma sa fa’atautaia lea tulaga i ala fesoota’i i upega tafa’ilagi o le Zoom lea sa fesoota’i ai le sui mamalu o le atunuu ma le ta’ita’i o le faigamalo mo lea fa’amoemoe lelei.

 

“Ua fai se umi o tatou asa maia le atuvasa lea, ae fa’afetai o lea ua to’ai taunuu ma o le la’au lava lea o le soifua, aua ua tatou molimauina nei le taunuuga lelei i le aso. O a outou galuega lelei, e aofia ai ma le taumafaiga uma na tau taofiofi mai ai le i’umaea o le tatou Gagana, ma ia mautu pea lo tatou tofi mai le Atua Soifua, lea ua tamau i le aso. Ua le muta fo’i le galuega tima’i ma le fa’amaopoopoga lelei o le taumafaiga ao tatou aga atu i le lumana’i o lenei taumafaiga, ua fa’amoemoe fo’i e taofiofi mai ai ma le mou atu o le tatou Aganuu. E avatu ai le agaga fa’afetai tele ia i latou sa moe manatunatu ma latou va’ai mamao ina ia to’ai taunuu le fa’amoemoe i le aso,” o se saunoaga lea a Lemanu.

 

O le tofa Vaitinasa Dr Salu Hunkin ma le afioga Peseta Taluga Seloti sa mafai ona maua avanoa e saunoa ai i lea fa’atasiga taua, e avea ai i la’ua ma sui o le Komiti o le Gagana Samoa sa fa’auluina le faamoemoe e suia ai le tulafono mo gagana e lua e fa’atautaia ai A’oga a le fanau i potu aoga i le atunuu atoa.

 

Fa’ailoa e Lemanu lona agaga faafetai tele ma ia fa’alauiloa galuega tamau ma le fatufatu mea lelei ia toa’i taunuu lenei fa’amoemoe, ma sa ia fa’ailoa mai ai le suafa fo’i o nisi iloga o le atunuu sa latou amatamea i lenei taumafaiga, e aofia ai le tofa le To’oto’o Fofo I. F. Sunia, o le Tusitala Samoa i le atunuu, le afioga Senatoa Faiivae Alexander Godinet, ma sa le galo ia te ia ona fa’afetaia le mamalu maualuga o le Maota Maualuga ma le Maota o Sui o le Fono Faitulafono a Amerika Samoa, ona o le suiga mautu o le tulafono mo gagana e fa’aaogaina i potu a’oga o alo o Amerika Samoa atoa ai ma le fa’atula’ia o le Komisi o le Gagana Samoa i lea aso.

 

O se vaega i suiga e pei ona tuuina mai i le tulafono fou, i lalo o le vaega - Gagana e fa’aaogaina i a’oa’oga - “Mo A’oa’oga i totonu o aoga a le malo o le a fa’atautaia lea i le Gagana Samoa ma le Gagana Igilisi. Ina ia fa’amautu atili ai ua malamalama le fanau i a latou a’oa’oga i le gagana Samoa ma le Igilisi ma ia mautu ai lo latou silafia o mataupu ua a’oa’oina lelei ai. O le Matagaluega o A’oga o le a nafa ma le fa’aauauina ona fa’amautu lelei o lenei fa’amoemoe i le aga’i i luma o le una’iga lenei ia iloga ona fa’aulu polokalama i a’oa’oga e pei ona mataituina e suesuega ua mae’a faia, e tatau ona fa’aleleia atili ai tomai o le fanau a’oga, ma ia iloga ona sofa’i le mana’omia ona malamalama lelei le fanau i a’oa’oga.”

 

O le vaega fou o le tulafono e fa’avaeina ai le Komiti o le Gagana Samoa. O lea Komisi e ao ina atoa le 15 o latou sui ma e fa’amautu mai i vaega nei: Taiulu o le Matagaluega o Aoaoga Fa’a-Samoa mai le Kolisi Tuufa’atasi o Amerika Samoa. Fa’atonu poo se Sui Tofia fa’apitoa mai le Matagaluega o A’oga a le Malo o Amerika Samoa. To’atolu sui mai le vasega o Faife’au o Ekalesia Eseese mai le atunuu lautele. Sui mai le Senate o le Fono Faitulafono. Sui mai le Maota o Sui o le Fono Faitulafono. Failautusi o le Ofisa o Mataupu Tau Samoa. sui e to’atolu mai le atunuu lautele ma o lo’o fa’atinoa le auau o ona tofi ma e matua fiafia e fa’aaogaina le Gagana Samoa i taimi uma.

 

O le tiute e ao ina fa’atino a’ia’i e le Komisi o le Gagana Samoa i le atunuu, O le latou fa’aauau ona tima’i, fa’alauiloa ma taofimau i le i’umaea o le Gagana Samia i le atunuu ma aga’i atu i le lumana’i.

 

21 MALILIU COVID -19, O’O MAI IA APERILA 14

 

E oo mai ia Aperila 14, 2022, o le aofai o e ua maliliu mai le Covid-19 ua oo atu nei i le 21 o tagata i le atunuu. I le taimi nei ua atoa nei le 83.8% ua mae’a faia tui puipuia o le Covid-19, ua tusa lea ma le faitauga e 41,665 i latou ae o lo ua leai se isi na toe taofia fou atu i le falema’i o gasegase Covid-19 i le falema’i tele i Faga’alu.

 

O le lipoti a le malo e o’o mai ia Aperila 14, ua faamauina ai le aotelega o i latou ua mae’a maua i le Covid-19 talu mai le amataga ia Fepuari 22, 2022 ua tula’i mai i le 5,602 tagata. Ua toe malolosi mai le to’ 4,432 tagata, o lona uiga e na’o le to’a 1,170 i latou o lo’o totoe pea i fa’anofoesea o lo’o i ai pea le verusi ole Covid-19 i o latou tino.

 

FOA’I BLUESKY FESOOTA’I GASEGASE MA LATOU AIGA I TAIMI FAIGATA

 

I le fitaituga ai o le atunuu, i le pa’ia o aiga ua motusia vave le mafutaga ma pelega ona o a’afiaga o le Covid-19, ua mafua ai ona faliu le pulega a le Bluesky ma latou tapena ni so’otaga fa’aonaponei o Galaxy Tablets ituaiga o le Samsung ina ia maua lava se talanoaga i le va o le gasegase o fa’ataotolia na’o ia i le falema’i o le Covid-19, ma lona aiga.

 

O lenei foa’i na matua talia ma le fiafia e le vasega o Foma’i ma tausima’i galulue i lea potu taofia o le Covid-19 aua ua latou molimauina lea fitaituga i le pa’ia maualuga o aiga, i taimi na to ai le manava i pelega, ae ua na’o i latou na molimauina.

 

O le tamaitai o Sherri Sele sa avea ma sui o le Pulega ma le Aufaigaluega mamalu a le Bluesky na te taua’aoina aloaia nei meaalofa taua mo le potu taofia o le Covid-19, ina ia maua lava se feso’ota’iga taua a le sui o fa’agasegasea ma lona aiga.

 

Ua le gata i masini nei e fa, ae ua fa’aopoopo i ai ma le malosi’aga fa’aletupe mo le feso’ota’iga e ta’i 150GB mo le tolu masina le umi e fa’aaogaina ai mo nei feso’ota’iga.

 

“A’o aga’i pea i luga le faitau aofai o le atunuu o lo’o a’afia pea i le Covid-19, ua fa’apea fo’i ona taofia ai nisi i le potu taofia o gasegase Covid-19, ae paga lea, ua motusia ai ma le so’otaga mafanafana a le sui gasegase ma lona aiga, ona o aiaiga o le fa’asa ia le a’afia tele le aiga atoa ona o le fa’ama’i ua a’afia ai nei sui.”

 

“Ua a’e ai se taofi o le Pulega a le Bluesky, ia faia sona sao lelei mo lea feso’ota’iga. O mea tiga le motusia fa’afuase’i o le tagata gasegase ma lona aiga e auau i ai, lea ua maua nei se feso’ota’iga, atonu e le pa’i atu, ae ia maua se faamalosi fa’aleagaga i le talanoa mai ma tali atu. O se vaila’au aoga le loto fiafia, e feso’ota’i sa’o lava le fa’amalosi’au tau talanoaga ma feofoofota’i le alofa ma le fia malosi a’ia’i o le tino. Fa’afetai mo ala ua saunia fo’i e le Atua, e mafai ai ona fa’atino lea feso’ota’iga i ala tau tafa’ilagi,” o se tala lea mai le sui fa’asalalau a le Bluesky sa fa’auia mai i ala o emeli.

 

O le susuga le CEO o le falema’i tele Moefa’auo Bil Emmsley sa ia taliaina ma le agaga fa’afetai lea foa’i.

 

“Ona o le auau o faasalalauga a le Bluesky ua fa’ailoa ai “Ou te I ai” - Always there! O le isi lea fa’amalosi’aga ia i latou le pulega ma le aufaigaluega a le Bluesky - Ia i ai pea i soo se ootiaga poo taimi fiafia o le Aiga Samoa. Lea ua ta i tua le silasila ma ua iloga le ootiaga o le atunuu, “Ou te I ai!” O lo’u taimi lava lea.”