Ads by Google Ads by Google

TALA O LE LALOLAGI


[ata: foa'i]

Pago Pago - AMERIKA SAMOA

 

TO’ATELE FA’AMALOLO MAI AUFAIGALUEGA NA MALAGA MAI A LE TAYLOR FARMS

 

O se tala lata mai i le aumalaga e tolu sa fili fa’apitoa mai ai se aufaigaluega mai Amerika Samoa mo Uosigitone nei, ona o le tau sailiga o nisi e fia faigaluega mo le Kamupani a le Taylor Farms, ua fa’ailoa mai ai, “Ua to’atele ua fa’amalolo, ona ua fa’ailoa mai e i latou e le gafatia e i latou le galuega.”

 

“O nisi lava ua le talafeagai amio ua faia ma le tu’utu’uga o le konekarate na o mai ai, ua le mafai e i latou ona galulue i le malulu o lo’o ua fa’atulaga mo le galuega ina ia gaosia lelei mea tausami o lo’o tuufa’atasia e le Taylor Farms, o le galuega o lo’o mo’omia ina fa’atino e i latou ua aumaia fa’apitoa,” o se tala lea a le sui o loo avea ma sooupu i le va o le Kamupani ma le aufaigaluega na masi’i mai.

 

“E i ai nisi ua le talafeagai lava latou amioga ma mea ua latou faia i nofoaga fo’i o lo’o nonofo ma fa’amautu i ai i latou. O nisi ua latou fa’ailoa sa’o lava e le gafatia e i latou ona galulue i le malulu e tatau ona fa’atino ai tiute mo le galuega. E le o taofia la se tasi ua loto ina le toe faigaluega. Ua amana’ia le mana’oga ma ua fa’amatuu loa e malolo, ae sailia ai nisi a latou galuega e fiafia ona faigaluega ai, aua o lo’o tele lava avanoa i le setete o so’o se ituaiga o galuega,” o se tala mai lea a le sooupu Charlie Junior.

 

“I le taimi nei e na’o le to’a 16 i latou ua totoe pea ma faigaluega, ae o le va’ai atu i ai, o i latou nei ua matutua ma ua fa’atagata matua o latou fa’aiuga fai i le mafuaga na malaga mai ai.”

 

“O i latou o totoe nei, ua matua fa’afiafiaina i latou i le galuega, faigaluega malosi aua o lo’o fa’atali mai aiga pe tua ma ni a le masii mai e faigaluega. Ua le toe fa’atalitalia le maua mai o le numera o le siaki e matua fa’amalieloto. O le a lava fo’i ni omiga o le galuega i le malulu, ae usita’ia lava ituaiga o lavalava e fa’aaoga, e le lagona lava se malulu, ae ua fai lava le galuega 6 aso o le vaiaso, tasi le aso malolo, oo i le ta’i 10 itula e faigaluega ai.”

 

O lo ua le o toe popole le Kamupani i le latou seleni na malaga mai ai le sui ua fa’amavae ma nisi ua fa’atula’ia. Aua  e poo fea lava o le a toe faigaluega ai i latou, e togitogi auaua’i mai ai le latou tinoitupe na fa’aalu i le aumaiga o i latou i Amerika mo le galuega.

 

Peita’i e toe tasi le aumalaga o lo’o totoe nei e ao ina masi’i mai ia Tesema 06, 2021 ma o le aumalaga la lea ua filifilia fa’apitoa lava aua o lea ua mafai ona mautu se fa’amaumauga, o le afuaga o le faigata i o tatou tagata na masii mai, o le galuega o lo’o feagai ma i latou pe a faigaluega iinei.

 

“Masalo sa le amana’ia tele e i latou na o mai muamua le tulaga o le malulu o le nofoaga e faigaluega ai. Aua o lo’o galulue pea nisi i lea lava ituaiga o malulu, ae ua masani ai. Peita’i, ua foliga mai o se alofaga lea ina ua oo i le taimi e faigaluega ai ae le’i te’a le fa’asua’ava o nisi, e le’i lava le malolo a nisi, ae o nisi fo’i e le amana’ia tele le mafuaga na sau ai.” O se toe fa’apupulaga atili lea o le mau fa’ameo ua maua ia i latou ua le toe faigaluega nei a le susuga le So’oupu.

 

“O le aumalaga fou la lea ua folifoli e aumaia, ua filifili mai lava na’o tagata 25 tausaga aga’i i luga le matutua, ma ua fa’atalanoa atili ma fa’ailoa atu le malulu lea e faigaluega ai e pei lava e nofo i le Ea Malulu, ma e matele ina malulu ai fafo o le fale faigaluega i le tele o taimi aua o lea ua fa’asolo ina tau malulu Amerika atoa.”

 

“Ua le toe auamaia le vaega laiti, e fiu gofie ma le amanaia tele le tausiga lelei o latou aiga. O lea foi ua iloa lelei, afai ae toe faia fa’atalanoaga i Samoa mo nei sui e talosaga mai, o le a matua fa’amamafa lava i ai le tulaga o le malulu lea e faigaluega ai i latou i luga nei. Ona o le tagata Samoa e manatu e manaia le Ea Malulu pe a ulufale i ai ma faigaluega ai, ae galo ia i latou, e sili atu le malulu o fafo mai o le fale faigaluega nai lo totonu.” O se toe upu lea a le so’oupu e tusa o le fuafuaga mulimuli mo lenei tausaga, ina ia amana’ia pea i latou uma sa fa’aulu talosaga e fia malaga mai mo nei avanoa faigaluega.

 

Ia ua talanoa atu fo’i i nisi o lo’o ua silia ma le 50 tausaga le matutua ae ua malaga mai e faigaluega, sa fa’ailoa mai ai e Telesia Sami, “O le galuega e faigofie mo tamaitai, aua e iloa e tamaitai galulue a’ia’i e fa’amama le gaosiga o mea’ai e tusa o le fa’atonuga o lo’o ua gaosia lelei ai tausami nei. O le isi e fiafia lava tamaitai aua e le o ni galuega mamafa, ae o le malulu latou e kava uma le tino mai vae e oo i foliga na’o mata lava e tatau ona e va’ai toto’a ai, e leai la se malulu e sao atu i lota tino i taimi uma, e fai fo’i le pupuni fofoga mo le isu, ina ia le a’afia ai i le Influenza. O lona uiga, o le vave ona malolo o le tino i itula ua manava ai, moe ia lava le malolo, vave tula’i i luga e tapena ou lavalava e talafeagai ma le malulu o le potu o galue ai, o le lava saunia lena mo tiute fa’apenei, e leai lava se mea e a’afia ai fua i le galuega totogi lelei ua ta mauaina. O se meaalofa sili mo le matou aiga nei ituaiga o totogi. E uma lelei lava lo’u tausaga fa’ato’a maua se ponesi e malolo ai ma totogi pea aso na e toe asiasi atu ai i aiga ma pelega. O la’u lea molimau, ae ua matua tausaga o le soifua, ae faato’a laulau mai nei mea lelei mo a’u.”

 

ASO LULU & ASO TOFI NEI - AMATALIA TUIGA TELE PUIPUIA COVID-19

 

O le aso lenei ma le aso Tofi o lenei vaiaso, ua fa’atulaga e amatalia ai le Tuiga Tele a le atunuu sa fuafua e taofia ai mea uma, ae fa’atautaia, peita’i ua toe soalaupule ma fetu’una’i muniao, ua tonu ai o le a fa’atautaia i le tolu Aso Lulu o vaiaso e tolu soso’o, ma ua amatalia nei.

 

Ua amata foi i le amataga o le masina mulimuli o lenei tausaga le fa’amoemoe lea, Tesema 1 & 2, i itumalo ogatotonu o le motu o Tutuila i ona nofoaga ua fa’atulaga mai.

 

O tuiga nei o le a fa’asolo mai i a’oga ua filifilia ma ua faailoa atu foi i aiga o lo’o tulata i nei a’oga ina ia gasolo ane i ai i aoga na e faia ai latou tui. O aoga ua filifilifilia i aoga maualuluga ua aofia ai: Nuuuli VocTech High, Kanana Fou High ma Tafuna High. O a’oga tulaga muamua ua lisia ai: Tafuna Elementary, Manumalo Gymnasium, Manulele Tausala, Lupelele Elmentary, Pavaiai Elementary ma Siliaga Elementary. Ua fa’atulaga fo’i ma le Hall Tafeta Aasu Katoliko mo le tuiga i Aoloau lava.

 

Ese mai lenei fa’alauiloaga, ua fa’asalalauina foi i ala tafailagi ale Facebook le lisi atoa o nofoaga o lo’o faia ai nei tuiga mo le fanau a’oga, fanauiti faapea ma aiga ta’itasi e le’i faia ni tui puipuia Covid-19.

 

Ua fa’atulaga le taimi mo tuiga i nei nofoaga uma ua lisia i luga mai le itula e 8:00 i le taeao se’ia oo i le itula e 4:00 i le afiafi i le aso Lulu ma le aso Tofi o le vaiaso nei.