E to’aono sui sinia o le falemai a le LBJ i Fagaalu ua tuuina atu i ai tusi mai le Pulesili o le Falema’i, e fa’amalolo mai ai i a latou galuega, ae mafai ona toe tusi talosaga mo ni isi avanoa i totonu lava o le falema’i.

I se tusi sa tuuina atu e le pulesili o le LBJ ia Joe Davis-Fleming ia i latou uma nei e to’aono i le aso 12 o Iulai, 2013 na maua e le Samoa News, na taua ai e le pulesili a le falema’i e faapea, talu ai o tulaga faaletonu i le itu tau tupe o lo o faaauau pea i totonu o le falema’i i le taimi nei, ua manatu ai le Komiti Faafoe a le falema’i e faia ni suiga mo le toe faatulagaina o le tautua a le falema’i, ina ia mautinoa ai e tumau pea le lelei o le tautua a le falemai mo le atunuu.

I se vaega o le tusi a le pulesili o le falema’i ia i latou e to’aono ua faamalolo, na ia taua ai e faapea, o le toe faatulagaina o le tautua a le falema’i i lona lotoifale, ua manaomia ai le faamalolo o i latou nei e to’aono mai tulaga o lo o galulue ai.

O se tasi o faafitauli e pei ona taua i le tusi, o le faaitiitia o tupe maua faalotoifale atoa ai ma tupe mai le feterale mo le falema’i, ua manatu ai loa le komiti faafoe e faaitiitia tagata faigaluega, ina ia tusa ai ma faiga faavae a le Falema’i i lalo o le tulafono.

Mo tagata faigaluega uma o lo o galulue tumau i le falema’i, faatoa faamuta la latou tautua i totonu o le 15 aso talu mai le aso 13 Iulai, 2013 na latou tauaaoina ai lenei tusi, tusa lea o le aso 27 Iulai e faamuta ai le latou tautua, ae mo tagata faigaluega o lo o galulue faa vaitaimi, o le a faamutaina la latou tautua i le taimi lava latou te tauaaoina ai lenei tusi.

O ni isi o tulaga na aofia ai i le tusi sa tuuina atu ia i latou ua faamalolo, o le a agavaa i latou i itula o livi tausaga (annual leave) e le’i faaaogaina, atoa ai ma le 50% o livi ma’i e i luga atu o le 239 le aofa’i.

O le a le taofia e le falema’i ni tupe e tatau ona tipi mai totogi o i latou uma nei, sei vagana ai tulaga o lafoga e tatau lava ona tipi ese mai ia latou totogi faaiu o le a maua.

Ae ui i le faamalolo ai o i latou nei mai tulaga sa latou galulue ai, o se tala fiafia e pei na taua i le vaega faaiu o le tusi, o se tasi o faaiuga sa iloilo toto’a e le komiti faafoe mo le toe faatulagaina o tulaga ma galuega i totonu o le falema’i, o le a mafai ai ona toe talosaga i latou nei i ni isi o avanoa faigaluega fou i totonu o le falema’i, ae faatoa mafai ona talia pe afai e agavaa se tasi o i latou nei i avanoa ua tusi talosaga i ai.

E le gata i lea, e ono mafai ona ofo atu e le falemai le tulaga o le faatonusili le tumau mo le matagaluega e tofia se tasi e galuega ai mo se taimi le tumau, sei vagana ua faia se faaiuga aloaia i se tasi na te tauaveina lea tulaga, po o se tasi o i latou nei po o se isi fo’i tagata ua talitonu le komiti faafoe ua matua agavaa mo le galuega.

A’o le’i atoa aso e 15 e pei ona fuafua e faamuta ai le latou tautua, e mafai e soo se tasi o i latou nei ona faamavae pe malolo litaea a’o le’i oo i le aso lea, ae tumau pea ona latou mauaina faamanuiaga i totogi faai’u e pei ona taua i le pito i luga o lenei tusi.

I le faaiuga o le tusi a le pulesili a le falema’i, na fai ai o ia ma sui o le komiti faafoe e tuuina atu le faafetai ia i latou uma nei e tusa ai o le latou tautua ma le lagolago sa tuuina atu mo le LBJ i le tele o tausaga.

O kopi o lenei tusi sa tuuina atu i totino uma o le komiti faafoe, o le teutupe o le falema’i ia Leilua Stevenson, ma le foma’i ia Dr. Akapusi Ledua.