O LE TALA I LE “PALESOO” I MANONO

O se tasi lenei o Vavau e ese fo’i lona fa’amatalaina, na afua mai ai ni isi o mea tetele i totonu o le atunu’u. Fai mai le tala, o totonu o le malae o Lepuia’i i Manono sa i ai se pa ma’a e tai foliga o se fanua tanu, o lona igoa o le “Paleso’o”. O le mafu’aga o le igoa o lea pa e pei ona taua e ni isi o le afioaga o Manono, e fa’amanatu ai le faletua lona 100 a le ali’i o Vaovasamanaia lea na le taunu’u ona la nonofo, ae na nonofo ma le manaia lalelei mai Sa’anapu o Logona lona igoa.

Fai mai le talitonuga e toatolu tama iloga sa i ai i na vaitaimi, o Tupua’i sa nofo i Safata, o Vaovasamanaia sa nofo i Manono, ma Toilolo sa nofo i Taga i Savai’i.

O le talitonu fai mai o le ali’i lenei o Vaovasamanaia, o se taule’ale’a e lalelei tele, ma o lona lalelei tele na mafua ai ona tosina tama’ita’i e to’atele ia te ia e fia avea o ia ma o latou tane, ma e le i fa’afiti ai Vaovasa, ae sa matua fuli le ali’i e fai ona ta’ito’alua ina ia fa’amalieina ai lona loto, pau le mea e malie ai, e le fia nofo le ali’i i soo se tama’ita’i sei vagana ai lava se augafa’apae, po o se taupou fo’i. Fai mai le tala o ma’a e 99 sa tuu i luga o le pa, o maa uma ia e fa’amanatu ai ava uma sa maua e Vaovasa, ona alu ai loa lea o le ali’i e saili sona ‘ava se to’atasi e fa’aatoa ai ana ‘ava e 100.

O le tala la fai mai ua aga’i atu nei le malaga a le ali’i o Vaovasa e aga’i tonu atu lava i Falealili, i le tama’ita’i o Lapataume, o le alo tama’ita’i o Talauega. Na alu le aumoega a le ali’i ma la o mai ai loa ma le tama’ita’i o Lapataume, peita’i e lei taunuu ona avea ma ona faletua, ina ua fa’alavelave i ai le ali’i Sa’anapu o Logona, ma avea ai loa Lapataume ma faletua o Logona.

E talitonu Manono na toe liliu le va’a a le ali’i o Vaovasamanaia ma toe momoli le tama’ita’i i Falealii, ona toe fo’i atu ai lea i Manono, ae o le isi ana malaga e saili ai sona faletua lona 100 na maliu ai o ia. E ui i le finau mai o le motu o Tutuila fai mai o latou na maua i ai le faletua lona 100 o Vaovasa, e foi i le finau mai o Lefaga fai mai o le latou tama’ita’i na atoa i ai faletua e to’a 100 o le ali’i, ae o le talitonuga lava ia a Manono, o le Palesoo ua mafua ona le soo le pa ona e lei atoa faletua e 100 a le ali’i.