GALUEGA ASPA I AUNU’U MASINI FA’AMAMA LE SUAVAI

Ua fa’aauau pea le galuega o le fale ma le lotoa e fa’amautu i ai le masini e fa’amamaina le suavai i Aunu’u. O lea galuega o lo’o fa’atautaia lea e le kamupan a le R.W & Sons Construction.

Sa i ai le ali’i pule o lea kamupani i le nofoaga i le tumutumu mauga o lo’o fa’atuina ai le satelite, ma le  pamu vai fa’apea le fale o le a fa’amautu i ai le masini fa’amama suavai ma sa ia fa’ailoa ai, o lenei masini e matua aoga lava, o se auaunaga fo’i o lo’o fa’atino e le ASPA, “ma ua fa’amanuiaina ai fo’i si matou pisinisi e fa’atino lea galuega ae le o faigofie, ona o tulaga fita o fela’ua’iga mai o uta mo lenei galuega.”

Sa fa’ailoa fo’i, “O le tele o le tau o le galuega, ona o ala o fela’ua’iga, aua o le va’a o le Fotu o Samoa e fa’ato’a mafai ona aumaia uma taga tetele o le pefu, oneone, uamea sima ma masini fo’i mo le galuega lenei.”

O le to’atele o le aufaigaluega e momoe ai pea i Aunu’u ae o nisi e tulata atu lava e malaga mai i aiga, peita’i, o le vaega e o ma momoe, e fa’ato’a tu’ua Aunu’u pe a manava galuega i le aso Faraile. O le masini fa’amama ua mae’a i ai lea i le lotoa a le ASPA i Tafuna e sauni ai le fa’ao’o atu i Aunu’u mo le fa’apipi’iga pe a mae’a le fale ua fausia nei.

Ua fa’ailoa mai, o le suavai atoa e pamu mai i pamuvai ua mae’a tautuaina le motu o Aunu’u e toe fa’auiga i le pamu tele i luga o le mauga, ona fa’auia loa lea i le masini fa’amama ma fa’ato’a toe fa’ao’o atu ai i aiga i Aunu’u.

LUA VAIASO SEMINA VAILA’AU O’ONA MA TAGATA SOIFUA

Ua mae’a le a’oa’oga fa’apitoa sa fa’atautaia e le Matagaluega o Alamanuia mo Tagata Lautele (DHSS) mo i latou o lo’o fautuaina le mamalu lautele o i latou ua matauina o lo’o i ai a’afiaga tau le tagofia o fuala’au fa’asaina ma vaila’au o’ona.

“O se a’oa’oga e aoga tele i le matou taumafaiga e o’o atu se fe’au taua e suia ai se olaga o se tasi o lo’o saisaitia i nei ituaiga o a’afiaga, ma e afaina ai so’o se mafutaga e fa’atasi atu i latou i ai. E le na’o i tatou iinei ua a’afia i lea tulaga, ae ua leai se atunu’u o le lalolagi e le’i o’o i nei ituaiga o lu’iga, ma ua fa’atautaia ai lea a’oa’oga fa’apitoa mo i latou uma o lo’o avea ma sui ta’imua e taumafai ona toe fa’ato’ilalo ia amioga, aua e afaina tele ai fo’i latou aiga ma mafutaga i le fatuoaiga,” o se tala lea a Mona Uli, o se tasi mai le American Samoa Alliance Against Domestic & Sexual Violence.

O le a’oa’oga sa fa’atasi mai ai Cynthia Moreno Tuohy ma Kate Endries mai le NAADAC lea sa fa’akonekarate e le DHSS e fa’atautaia lea a’oa’oga taua.

“O uiga, o aga ma manatu o i latou ua a’afia, e ao ina iloa patino e i latou o lo’o galulue so’otau’au ma i latou, ia taumafai e fa’asagatonu a latou filifiliga ma latou fa’ai’uga i so’o se mea latou te faia,” o se fa’asoa lea a le tama’ita’i faia’oga.

E le na’o ni sui o le DHSS sa aoga i ai lenei a’oa’oga, peita’i, sa aofia i ai sui eseese mai isi fa’alapotopotoga tumaoti o lo’o feagai fo’i ma faiva lava e tasi, ina ia mautu lea auaunaga mo le mamalu lautele e latou te mo’omia.

O nisi sa auai e aofia ai: Mona Uli, Sulita Smith o le Catholic Social Services, Dr. Juneta McCutchan o le DHSS, Margeret Lealofi DHSS SAPT ma Thor Tinitali. O i latou fo’i ia o lo’o ua mae’a taua’aoina o latou tusi pasi mai lea kosi aoga tele i a latou fo’i auaunaga ma tomai mo’omia e fa’atino ai tiute e tautua ai le lautele o le atunu’u.

SAILIGA SIAMUPINI LIKI VOLLYEBALL EFKAS

Ua mae’a le sailiga siamupini o le Liki Volipolo a le EFKAS - ma ua maua mai le fa’ai’uga o lea liki ua silia ma le 3 masina o fa’atautaia. O le ta’amilosaga sa taumafai ai le Matagaluega i Sasa’e, Sisifo ma Tutotonu.

O ‘au na manumalo mai sa latou sailia le siamupini i le aso To’ona’i na te’a nei e aofia ai Amouli EFKAS, Aunu’u EFKAS, Masefau EFKAS, Petesa Uta EFKAS, Poloa EFKAS ma Fagali’i EFKAS.

I le vaega o ‘Ali’i A ua tula’i mai ai le manumalo o le ‘au Volipolo a Fagali’i, tulaga lua ai lea o Petesa Uta, ae tulaga tolu Amouli.

I le vaega o Ali’i B na fa’atoilalo ai e Nua ma Seetaga EFKAS le ‘au malosi A Masefau ma Fagasa ma latou umia ai le Siamupini 2015. Ua tulaga lua le ‘au a Masefau ae tulaga tolu ai Fagasa.

I le vaega o le A Tama’ita’i ua sola ai Amouli EFKAS ma le Siamupini 2015 ina ua latou fa’atoilaloina  le ‘au malosi a Poloa ma Fagasa. Ua maua e Poloa le tulaga lua, ae o le ‘au a Fagasa ua tulaga tolu.

I le vaega a Tama’ita’i B na maoa’e ai le taumafaiga a Aunuu EFKAS, ina ua latou fa’ato’ilaloina le ‘au malosi mai Nua ma Seetaga.

Ua fa’ailoa mai e le kapeteni o le ‘au volipolo a Amouli EFKAS, “O lo ua alo faiva atu nei i matou uma mo le Liki Volipolo o le tatou Moso’oi ia Oketopa 2015.”