PULENUITU TAFAOA

O le aso 6 Iuni 2014 lea ua fa’atulaga e le fa’amasinoga maualuga e toe tula’i ai le ali’i o Pulenuitu Tafaoa i luma o le fa’amasinoga, i le mae’a ai lea ona ia teena o le moliaga mamafa e tasi o lo o tu’uaia ai o ia e le malo.

O ananafi na tula’i ai Tafaoa i luma o le fa’amasinoga maualuga ma ia teena ai le moliaga o lona umia fa’asolitulafono lea o vaega o le laau fa’asaina o le mariuana, e pei ona fa’aleo e lana loia fautua o Karen Shelly.

O tu’uaiga fa’asaga ia Tafaoa na afua mai i le fa’alavelave lea na masalomia ai e ali’i Ofisa o le Tiute i le malae va’alele i Tafuna, lona umia fa’asolitulafono o vaega o fualaau fa’asaina, ina ua taunu’u mai le malaga a le latou aiga i le Hawaiian Air i le po o le aso Gafua o le vaiaso na te’a nei.

Ina ua fesiligia e leoleo ia le ua molia i fualaau fa’asaina sa maua ia te ia, sa ia taua ai e fa’apea, o mariuana sa ia aumaia mo ia lava. E o o fo’i i fatu mariuana e silia i le 500 sa maua i le ato a lona to’alua, na fa’ailoa e Tafaoa i leoleo e fa’apea, o ia na tu’uina i totonu o le ato a lona to’alua pepa iila sa i ai fatu mariuana.

O lo o taofia pea le ua molia i le toese i Tafuna i le taimi nei, se’i vagana ua ia totogi le vaega tupe e $10,000 na fa’atulaga e le fa’amasinoga ona fa’atoa mafai lea ona tatala o ia i tua i lalo o tuutuuga a le fa’amasinoga e ao ona ia usita’i ai.

MALAKI SAO

O le aso Tofi o le vaiaso nei lea ua fuafua le malo e tatau ona o o atu ai ua mae’a ona latou failaina moliaga fa’aopoopo, fa’asaga i le ali’i mai Fagatogo lea o lo o tu’uaia i lona gaoiina o le ato tupe a se fafine mai totonu o le faletalimalo o le Sadies Thompson Inn i Fagatogo i le aso Tofi ua te’a.

O le taeao ananafi na tula’i ai i luma o le fa’amasinoga fa’aitumalo le ali’i o Malaki Sao mo le ulua’i taimi, ina ua mae’a ona faila e le malo le moliaga mama o le gaoi fa’asaga ia te ia.

Na fa’ailoa e le loia a le malo o Loralei Meredith i luma o le fa’amasinoga i le taeao ananafi e fa’apea, o lo o fa’aauau pea su’esu’ega fa’asaga i le mataupu e pei ona tu’uaia ai Sao, ma le fa’amoemoe e tatau ona o o atu i le aso Tofi ua mae’a ona latou faila moliaga fa’aopoopo.

E $2,000 le tino i tupe lea ua fa’atulaga e le fa’amasinoga e totogi ona fa’atoa mafai lea ona tatala Sao i tua mai le toese i Tafuna, e fa’atalitali ai taualumaga o lana mataupu o lo o fa’agasolo i le taimi nei.

O lo o tu’uaia e le malo ia Sao i lona ulufale fa’amalosi i totonu o le faletalimalo o le Sadies i Fagatogo, ma ia gaoiina le ato tupe a se fafine sa i luga o le laulau i totonu o le ofisa o le faletalimalo, i le vaveao o le aso 1 Me, 2014, a’o pisi ai le fafine e ana le ato i le fa’atinoina o ana galuega i le itu o le ofisa.

E tusa ma le $700 le tino i tupe e talitonu le malo sa i totonu o le ato tupe i le taimi o lo o tu’uaia na gaoiina ai e le ua molia, ae ina ua saili atu e leoleo lona tino ina ua maua o ia, sa maua i ai le tino i tupe e $189.

Na taua e se molimau fa’atuatuaina i le Samoa News e fa’apea, a o fa’aauau ona fesiligia e leoleo le ua molia e uiga i le tupe, sa fa’ailoa e Sao i leoleo latou te o e fa’asino le mea o lo o ia teuina ai le tupe, ma o le avanoa la lea na sola ese ai Sao mai leoleo, ae na fa’atoa maua i le aso Faraile na sosoo ai, ma fa’atoa taofia ai loa i le toese.

MOLIA LE ALI’I NA IA OSOFAIA LONA TO’ALUA I LE AGAESE

O le ali’i lea na tu’uaia i lona fa’aaoga o se agaese e fa’ao’o ai manu’a tuga i lona to’alua a o ona, ua molia e le malo i le moliaga mamafa o le fa’ao’olima i le tulaga lua, ma ua fa’amoemoe o le taeao nei e tula’i ai o ia i luma o le fa’amasinoga maualuga mo le fa’aauauina ai o lana mataupu.

Ina ua mae’a ona faila e le malo moliaga fa’aopoopo fa’asaga i le ali’i ua molia i le taeao ananafi, na fa’ailoa ai loa e le loia a le ua molia lona le mana’o e fa’ataunu’u lana ulua’i iloiloga lea e faia i luma o le fa’amasinoga fa’aitumalo, ae tu’u sa’o atu loa lana mataupu e fa’aauau i luma o le fa’amasinoga maualuga.

O tu’uaiga fa’asaga i le ali’i ua molia na alia’e mai i se fa’alavelave na tula’i mai i le po o le aso Tofi na te’a nei, ina ua ona atu i le fale ma fa’ao’olima i lona to’alua e ala i lona fa’aaogaina o se agaese.

E $5,000 le vaega tupe lea ua fa’atulaga e le fa’amasinoga e totogi, ona fa’atoa mafai lea ona tatala le ua molia i tua, e fa’atalitali ai taualumaga o lana mataupu lea ua fa’agasolo i luma o le fa’amasinoga i le taimi nei.

O ni isi o poloaiga a le fa’amasinoga ua tu’uina atu i le ali’i ua molia e usita’i ai pe afai e mafai ona tatala o ia i tua, o le saili lea o se isi nofoaga e aumau ai, e ese mai i le nofoaga lea na tula’i mai ai le fa’alavelave, ua fa’asa fo’i ona ia taumafai e toe fa’afeso’ota’i lona to’alua i so o se auala, sei vagana o se poloaiga a le fa’amasinoga.