Ads by Google Ads by Google

Tala otooto i Taaloga

SAO LE MANU SAMOA I LE SAILIGA IPU AUTU I LUSIA

 

Ua sao atu nei le au taitoa 7 a le Manu Samoa i le sailiga o le ipu autu i le taamilosaga o le Ipu a le lalolagi o lo o faia i Lusia i le faaiuga o le vaiaso nei, ina ua manuia lana uluai taaloga i le po anapo.

 

E ui i le manumalo ai o le Manu Samoa i lana ulua’i taaloga i le po o le aso Tofi na te’a nei, peitai na taua e ni isi o tagata faalalau lea malo o se malo faifaiaga toe le manaia. E mafua lea tulaga ona e ta ane le afa o le taaloga e 14-7 o lo o sili ai ‘ai ai Zimbabwe, peitai o sikoa e lua mai le kapeteni o le au ia Afa Aiono ma Faatoina Autagavaia na toe vaaia ai le sa’o o le manava a le faiaoga ma le pulega ina ua maua le avanoa latou te faatoilaloina ai Zimbawe.

 

E ui i le tulaga faaletonu sa i ai le taaalo a le au peitai na taua e le alii faiaoga ia Stephen Bethem, o le malo lava o le malo, ma ua avea foi faaletonu o le ulua’i taaloga e fau ai gaioiga mo le taaloga e lua o lo o totoe mo le au.

 

O le itula e 6:00 i le afiafi nanei e amata ai ona faagasolo le taamilosaga o le pau ma nofo, ma o lo o olaola pea le sini i le pulega ma le au a le Manu Samoa, o le maua lea o le manumalo.

 

E pei ona silafia, e le’i manumalo lava Samoa i le taamilosaga lenei o le Ipu a le lalolagi mo le taaloga taitoa 7, sei vagana ai Niu Sila, Fiti ma Wales o lo o umia le siamupini o le taamilosaga i le 1999 ua tofo i le suamalie o le manumalo.

 

SAUNI DAVID TUA E TOE FUSU IA AOKUSO

 

O le aso 31 Aokuso 2013 lea ua faalauiloa mai e le pulega a David Tua o le a toe soli ai e le tama mai Faleatiu le maea i le lata ai i le lua tausaga e le o toe fusu.

 

O le ali’i mai Europa ia Alexander Ustinov lea ua faamaonia mai o le a fusu ma Tua i le fusuaga faapitoa o lea po mo le umi e 12 taamilosaga.

 

O le vaiaso nei na faalauiloa mai ai e le vaega a le DUCO o lo o faalauiloaina fusuaga a Tua le maea ai lea ona sainia e Tua ma Ustinov o le konekarate mo le la fusuaga.

 

O Ustinov ua 36 tausaga lona matua mai Lusia, ua 29 ana fusuaga, 28 manumalo ma le faiaina e tasi, o lo o avea foi o ia ma numera tasi i le fusi o le WBA, ae o lo o faatulaga mai i le tulaga 10 i isi fusi o le paga mamafa e pei o le IBF ma le WBC.

 

O Ustinov ua faafa ona avea ma siamupini o le taaloga o le K1 po o le fusu ma kiki lea fo’i sa lauiloa ai ni isi o alo mai Samoa e i ai Mark Hunt ma Ray Sefo i tausaga ua mavae atu.

 

Na taua e Tua i le au faasalalau i Niu Sila i le maea ai lea ona saini o le konekarate, ua ia iloa o Ustinov o se tagata e faigata ona faatoilalo ma o se alii fusu foi e malosi ma lelei, ae ua ia filifilia o ia ina ia avea ma lu’i a’o toe filifili ai e toe fo’i atu i totonu o le maea, mo le faataunuuina o lana miti ua leva ona i ai, o le fia avea lea ma siamupini i se aso o i luma.

 

Fai mai Tua, o ia o se tagata e tautala ma savali i ana upu, ma ua ia sauni foi e faataunuu lana fusuaga lenei.

 

E ui i le manumalo mataina ai o Tua i le alii Niu Sila o Shane Cameron i le fusuaga o le Senituri i le 2009, ae na faiaina o ia i lana fusuaga mulimuli ia Monty Barrett i le 2011 e ui na gau ai le auvae o Monty i le la fusuaga lona lua lea.

 

O le a fusu ai i le po lea i le taimi o le fusuaga a Tua ma Ustinov le alii Samoa o Joseph Parker o Niu Sila, lea na ia faatoilaloina le alii mai Aferika ia Botha i le la fusuaga mataina i le lua vaiaso talu ai.

 

ULUA’I NIU SILA UA FILIFILIA I LE NBA

 

Ua faatuina nei e le ali’i o Steven Adams mai Rotorua i Niu Sila se matati’a i totonu o lona atunuu ma le Pasefika, ina ua avea o ia o se ulua’i Niu Sila ua filifilia i au a le NBA, e pei ona avea ai o ia o le tagata lona 12 ua filifilia mo le au a le Oklahoma City mo le taamilosaga o le 2013-2014 o lo o lumana’i nei.

 

Ina ua maea ona filifilia Adams i le au a le Thunder i le vaiaso nei, sa ia taua ai i le au faasalalau lona fiafia tele atoa ai ma le faateia o ia ina ua maua le avanoa e taalo ai i le NBA.

 

I le sainia ai o lana konekarate ma le au a le Thunder i le aofa’i e $1.7 miliona, na teena ai e Adams le avea o tupe ma auala o le a sui ai le ituaiga tagata e i ai o ia.

 

“Tusa lava pe maua tupe e tumau pea le ituaiga tagata ou te i ai,” o lana tala lea i le au tusitala ma ata.

 

Na taua e le au faasalalau i Niu Sila e faapea, o le filifilia o Adams i le au a le Thunder, ua avea ai o ia o se uluai Niu Sila ua mafai ona lulu lima ma le komesina o le NBA ia David Stern.

 

SAUNI AUSETALIA E TOTOGI LANA FAIAINA I LE LIONA

 

O le po anapo na sauni atu ai le au malosi a le Wallabies a Ausetalia e totogi lana to’ilalo i le au malosi a le Liona mai Europa, talu mai lana faiaina i le vaiaso na te’a nei i ‘ai e 23-21.

 

I le sauni atu ai o Ausetalia e faatoilalo le au a le Liona, ua faalauiloa mai ai e le pulega a le au le toe atoatoa o le malosi a le latou 2nd five eight ia Christian Leali’ifano e toe taalo ai mo le taaloga nanei, ina ua kilia mai e lana foma’i o ia e taalo.

 

O Christian sa faamoeome i ai le kikiina o a latou polo i le po i le taaloga muamua i le vaiaso na te’a nei, peita’i le manuia lea fuafuaga ina ua lavea o ia i le amataga o le taaloga, ma taumafai ai loa le latou first five-eight ia James O’Connor e kiki a latou sala ma sikoa i le pou i le vaiaso na te’a nei, peitai sa faigata tele ia te ia ona faaova uma isi ana kiki.

 

Mai taaloga e 10 a le au a le Liona mai Europa ua faatulaga mo lana malaga taamilo i totonu o Ausetalia i le taimi nei, ua mae’a ana taaloga e 8 e aofia ai ma le test muamua ma le au tele a le Wallabies, tasi le faiaina ae 7 manumalo.

 

O le faiaina a le Liona na maua mai lea i le la taaloga ma le au kalapu a le Brumbies a Ausetalia, ma o se ulua’i taimi fo’i lea ua faiaina ai le Liona i se au faaitumalo i atunuu tetele o lo o malaga taamilo i ai.