FA’ATE’A SE TAMA’ITA’I FA’AMASINO I LE TAU FA’ALEAGA

O se tama’ita’i fa’amasino e galue o se fa’amasino i totonu o le aai o Arkansas talu mai le 2001, ua fa’amalolo nei mai lana galuega i le vaiaso na te’a nei, ina ua fa’amaonia i se su’esu’ega a le Vaega o Fa’amasino sa faia i ni ana tusitusiga tau fa’aleaga fa’asaga i se ali’i fai ata tifaga, ina  ua ia fa’aalia i ni ana uo “le ofu atu o le ali’i fai ata tifaga o Charlie Theron i se ofu lapo’a mataga, ma lona lau ulu uumi pei se fa’ataulaitu”.

O le itu sa pito sili ona matuia ai le gaioiga sa faia e le tama’ita’i fa’amasino o Michael Maggio, o fa’amatalaga sa ia faia i ana uo e fa’atatau ia Theron, na fa’avae mai lea i se mataupu sa iloiloina i luma o le fa’amasinoga fa’asaga i se tamaititi na fa’atamafai e Theron, a o lea ua ia toe faia fa’amatalaga e fa’alauiloa atu ai lea mataupu i se auala e le fa’atagaina e le fa’amasinoga. O fa’amatalaga a Maggio sa faia i ni isi o ana uo i luga o upega o feso’otaiga o le ‘tweeter’, ina ua latou talanoa ma ni isi o ana uo e masani ma Theron.

TOE AVE FA’AMALOSI FOI LE ISI AMERIKA E LE VAEGA A LE ISIS

O le amataga o le masina lenei o Oketopa na ave fa’amalosi ai fo’i e le vaega fa’atupu fa’alavelave a le ISIS i totonu o Suria le isi tagatanu’u o Amerika, o le ali’i lea o Abdul-Rahman Kassig, a o galue ai o ia e fesoasoani e fa’asao tagatanuu o Suria ua pagatia ma fa’apologaina e le vaega a le ISIS. E le i umi ona tuana’i le taimi na pu’e fa’apagota ai e le ISIS lea tagatanu’u o Amerika, ae o latou fa’alauiloa loa i luga o se ala ata Arapi lo la sauni e fasioti le ali’i o Abdul i le auala lava fo’i lea e tasi na latou fasiotia ai isi tagatanu’u e to’alua a Amerika faapea ai ma se tagatanu’u se to’atasi mai Farani, o le aveesea lea o latou ulu (tulou).

Ina ua maua e le tina o le ali’i o Abdul lea fa’asalalauga, sa lei toe mapu loa lona augani i le ta’ita’i o le ISIS mo se avanoa e fa’asa’oloto ai lana tama, ma lana fa’aupuga sa fai i ai, “o a’u o se tina matua ae o Abdul ua na o ia lava la’u tama, ua ma tete’a ma lo’u to’alua e leai fo’i se fesoasoani a le malo o lo o maua mai mo a’u, sei vagana ai si a’u tama o lo o tausia lo ma aiga”.

MALIU LE ALII AFERIKA NA MAUA I LE EBOLA I AMERIKA

O le taeao o le aso Lulu na te’a nei na fa’amaonia mai ai e foma’i mai se falema’i i Texas, le maliu o le ali’i mai Aferika lea na malaga asiasi i ona aiga i Amerika ma a’afia ai i le gasegase o le Ebola, a o taumafai ai foma’i i Amerika e togafiti le gasegase faigata na a’afia ai lenei ali’i. O se ulua’i tagata lenei i totonu o Amerika ua fa’amaonia le a’afia i le fa’ama’i oti lea ua silia ma le 3,400 tagata i atunu’u eseese o Aferika i Saute ua maliliu ai, ma le ova i le 10,000 tagata ua fa’amaonia le a’afia ai.

O le ali’i o Thomas Eric Duncan, 42 tausaga le matua, na malaga e asi ona aiga i le setete o Texas ae fa’amaonia ai le a’afia o ia i le gasegase, i le tuana’i ai o nai aso talu ona taunu’u i Amerika, o lona maliu, ua fa’amuta ai ma suesuega sa faia e le FBI, i le ono faila lea o ni moliaga fa’asaga ia te ia, i lona iloa lea ua a’afia i le siama o le Ebola ae malaga lava i Amerika. O le vaiaso fou lea ua fa’amoemoe e fa’aliu efuefu ai le tino o Duncan, ina ia tusa ai ma le fautuaga ma le Soifua Maloloina a le lalolagi i ituaiga tagata e a’afia i gasegse mata’utia fa’apenei.

SILIA MA LE MASINA E LE O TOE VAAIA LE TA'ITA'I O KOREA I MATU

E to'atele tagata i Korea i Matu ua amata ona tu'u fesili ma masalosalo pe i ai se mea ua tupu i le latou ta'ita'i, lea e le i toe vaaia i sauniga fa'alemalo talu mai le aso 3 Setema. Na atili ai ona tu'u fesili le atunu'u atoa ina ua le auai le latou peresetene ia Kim Jong Un i se sauniga fa'apitoa sa faia i le vaiaso nei, lea e aloaia ai ma le tautua sa ofoina mai e le tama o le ali'i o Kim fa'apea ai ma le tama o lona tama mo Korea i Matu.