Ads by Google Ads by Google

TALA MAi SAMOA

FAASA ONA FAATAU LE APA ELENI O LE “OCEAN MOON” INA UA MAUA AI ANUFE I TOTONU

 

Ua faasaina foi se tasi o apa eleni ona toe faatauina atu i faleoloa ona ua faamaonia i suesuega le le talafeagai mo le fofoga taumafa o le atunuu. Na faaalia e se alii fomai i le maota gasegase i Motootua e faapea, sa faatoai atu i lo latou ofisa se faasea a se aiga sa faatauina lea apa eleni ina ua tatala atu ae maua ai i totonu ni tamai anufe e pei o ni ilo i totonu o i’a o le apa eleni.

 

Na ia faaalia, sa auina atu lea apa eleni i le ofisa o suesuega faasaienisi i Nafanua, le SROS ma iloa ai ina ua maea suesuega sa faia, le le talafeagai o lea itusaiga apa eleni o le Ocean Moon mo le fofoga taumafa o le atunuu lautele.

 

Na saunoa le alii fomai, o lo o tau saili pea i le taimi nei le kamupani oloa siiatoa na faaulufaleina mai i le atunuu lea ituaiga apa eleni, ma ua fautuaina foi le au faipisinisi faleoloa ina ia aveese uma ia apa eleni o le ituaiga o le Ocean Moon mai a latou fata.

 

TALOSAGA LE TAUTUA SAMOA I LE LOIA SILI E MOLIA LE MINISITA O TUPE I LE TULAFONO

 

O le Aso Lulu na sei mavae atu nei na fautuaina ai e le vaega faaupufai o le Tautua Samoa le Loia Sili, ina ia molia i le Faamasinoga le minisita o Tupe, le afioga Faumuina Tiatia Liuga, i lalo o le Tulafono o le Pulea o Tupe a le Malo, ona o le tulai o tuuaiga tuga i lona le faautauta i le faaaogaina o tupe ma mea totino a le atunuu.

 

O lo o faataatia mai i lalo o le Tulafono o le Pulea o Tupe a le Malo ia soiltulafono e talitonu le Tautua Samoa, ua tatau ona molia ai le minisita o Tupe i tuuaiga o lona faaaogaina ma le le faautauta o lafoga a tagata lautele faapea ai foi ma mea totino a le malo.

 

O lo o tuuaia le alii minisita i lona le faamaoni i le faatinoina o ona tiute, i se tusi mai minisita lagolago e toa 19 e mafua i lona soona faaaogaina o tupe a le malo ma lafoga a tagata lautele. Na saunoa le taitai o le itu Agai, le afioga Palusalue Faapo ii, ua tatau ona aafia loa le Loia Sili i lana matafaioi e silasila i mataupu ua laga i totonu o le Faafaletui o le HRPP. “Pau le mea e mama ai Faumuina ma le HRPP, o le ave i le Faamasinoga e tali mai e tusa ma tuuaiga nei,” o le saunoaga lea a Palusalue.

 

MAEA FAAPAIA LE SA O LE TOLOTOLO O TAMA ULI MAI SALELOLOGA

 

Na faapaiaina i le afiafi o le Aso Lulu i se sauniga faapitoa, le sa o le Tolotolo o Tama Uli ina ua maea ona toe faafouina ao tapena atu mo faagatama o le tai o le Tutoatasi o le atunuu. O le Tolotolo o Tama Uli o se tasi o sa e fitu o le a tauva.

 

O le galuega ua maea nei sa faatinoina lava e le afioaga o Salelologa ma le faamoemoe ia auai pea Salelologa i fa’agatama o le tai i tausaga taitasi. Na saunoa se tasi o matai o le afioaga, le afioga Pauli Siologa e fiafia tele lo latou afioaga e lagolagoina atinae faapenei aua lava le lumanai manuia o tupulaga lalovaoa o lo latou nuu. Sa faalauiloa aloaia ai foi i Upolu nei le isi sa o le afioaga o le Uluai La o le Tala Lelei lea foi o le a tauva i le vaiaso fou.

 

O le sa o le Uluai La o le Tala Lelei o le a aloina e tupulaga mai le pitonuu o Saloga, ma na taua e Pauli Siologa, o le faamoemoe lava ina ia faaaoga le anoanoai o Salelologa e le o faigaluega ma e le o aooga foi, ina ia taumamao ai mai amioga ma faiga le talafeagai. E toa 104 le aofai o auvaa o nei sa e lua.

 

AVE LE ASO TOONAI NEI MA ASO E FAAMAMA AI LE ATUNUU

 

Ua faamaonia e le kapeneta le avea o le Aso Toonai nei, le aso 25 o Me, e avea ma aso mo le faamamaina o le taulaga i Apia aua le faamanatuina o le 51 tausaga o le tutoatasi o le atunuu, faapea foi le faamamaina ma le faamatagofieina o nuu ma afioaga.

 

O nei galuega mo le faamamaina o le taulaga o le a faatinoina e matagaluega ma faalapotopotoga uma a le malo, faapea le lagolago a faalapotopotoga tumaoti. i se pepa o faamatalaga mai le Kapeneta na faailoa mai le mavaevae o vaega eseese o le taulaga e agai i ai matagaluega taitasi mo lea vaega taua o le faamamaina o le siosiomaga o le taulaga.

 

O le faamamaina ma le faamatagofieina o nuu ma afioaga o le tuu atu lava i le pule mamalu a alii ma faipule.

 

FOAI E LE MALO LE $5,000 MO LE ASOSI FUSU A SAMOA

 

E $5,000 le siaki tupe na tauaaoina atu i le faalapotopotoga o fusuaga faapolofesa a le atunuu, o se meaalofa mai le malo Samoa e tauala mai i le ofisa o petipetiga, National Lotto, e lagolagoina ai fusuaga faapolofesa lea ua avea nei ma se tasi o vaega o le polokalama o le tutoatasi o lo o loma nei.

 

O le failautusi aoao o le faalapotopotoga o fusuaga faapolofesa a le atunuu, le susuga Ale Vena Ale na fai ma sui o le faalapotopotoga e talia aloia lenei meaalofa. Sa faaalia le agaga faafetai o le susuga Ale i le lagolago a le malo i lenei faagatama ua lauiloa ai tamafanau a Samoa i le lalolagi atoa.

 

E fitu paga i fusuaga faa-amateur ua faatulagaina mo lea po o le a tauva ai le aufusu a Samoa ma le aufusu masii mai Amerika Samoa i le ipu a le palemia. O paga faapitoa o lea po o le a fetaui ai Gogosina Unutoa o Samoa ma Alapatea Aasa mai Amerika Samoa i le paga o le Heavyweight, o Falani Tavui o Satupaitea o le a fetaui ma Saipeti Mauga mai Vaiusu, i le vaega o le Light Heavy Weight o le a fetaui ai Silimai Letoa mai Lalomauga ma Faimasasa Tavui o Satupaitea ma Niu Sila, atoa ai Falani Mamoe o Vaiusu o le a fetaui ma Too Mitai mai Safa’i, Savaii. i le paga o le Super Middle Weight o le a fetaui ai Alema Vaele o Vaimoso ma iosia Nanai o Lefaga, o le paga o le Welter Weight o le a fetaui ai Tony Apese o Alamagoto ma ionatana Puala o Tanugamanono. O le paga faapolofesa faapitoa o le po o le a fetaui ai Vaitele Soi o Samoa ma iope Ledua o Fiti.

 

Saunia: Lilomaiava Andrew Fa’asau, Naenae Productions