SU E PAPALII PANOA MOALA LE S.L.C. I LE $5 MILIONA TALA

Ua su e le alii sa avea muamua ma pule sili o le NPF, le susuga Papalii Panoa Tavita Moala le Ofisa o Eleele Tumaoti o Samoa po o le Samoa Land Corporation (SLC), mo le $5 miliona tala.

O lea su e mafua ona o se faiga faapaaga faapisinisi ua le taulau. Na faaalia i faamaumauga a le Faamasinoga e faapea, ua gau tupe a le ua tagi ona o se maliega faapisinisi i le va o ni itu se luau a le taulau. O le itu muamua o lo o tagi o le kamupani o le Farm Technical Ltd Company i Apia, ao le itu tagi lona lua o le kamupani o le Farm Suppliers Ltd i Nu’u. O ia kamupani e lua e pulea e Papalii. O lo o faaalia i faamaumauga a le Faamasinoga e faapea, ua faaulu le tagi a Papalii mo le tinoitupe e $5,305,479. E leai se faamatalaga o le tetee ua faaulu i le Faamasinoga e le SLC.

Na taua i faamaumauga a le Faamasinoga le faavaeina o se faiga faapaaga faapisinisi i le va o le susuga a Papalii ma le SLC e ala i le lagolagoina (guarantee) e le SLC o se nonogatupe faatopetope e totogi ai aitalafu a kamupani a Papalii. O ia kamupani a Papalii sa aofia ai se fale e tausi ai lafu meaituaolo ma se falemoa, mo le gaosia o taumafa e pei o ham ma bacon mai aano o meaituaolo, ma fuamoa e faatau atu i le mamalu lautele o le atunuu.

TATA’E FAAMALOSI TUUGAMAU, SUSUNU PONAIVI

Ua faasalaina i ni salatupe e le Faamasinoga Maualuga ni tagata e toavalu sa latou tata’eina faamalosi se tuugamau ma susunu ponaivi o le tagata sa lagomau ai. O lea faalavelave na tulai mai i le masina o Iuni, na o atu ai i latou ua molia ma faia lea gaioiga i le tuugamau o se tagata o lo latou aiga ona o lo latou talitonuga, o le aitu o lea tagata o lo o mafua ai le gasegase o lo latou tina. Ina tulai i latou i luma o le Faamasinoga Maualuga, sa latou faaalia e faapea, o le fautuaga a le taulasea sa fofoina lo latou tina, na mafua ai ona latou faia lea tulaga.

Na latou faaalia foi, ua maea ona toe fofo lea mataupu ma le aiga o le tama e ona le tuugamau sa latou faaleagaina. Peitai, e lei talia e le Faamasinoga lea faaleleiga ma na saunoa le afioga Faamasino Vui Clarence Nelson, ua matuia tele le latou gaioiga ua faia ma e atagia ai lo latou le faaaloalogia o tagata ua faiilagi le folauga. O le aso Tofi la o le vaiaso nei na faasalaina ai e Faamasino Vu ii latou e toavalu na molia i salatupe e $750 a le tagata e tatau ona totogiina i totonu o aso e fitu.

TOE TULAI MAI FOI LE PULE I LE OLA

Ua tulai mai foi se isi faalavelave ua iu ina pule ai se tasi i lona ola, i le amataga o lenei masina o Oketopa. O le amataga o le vaiaso nei na tulai mai ai lea faalavelave i le afioaga o Fagalii-uta.

Na lipotia mai e faapea, faatoa taunuu mai matua o le taulealea na pule i lona ola i se la malaga i Ausetalia, ma sa la aumaia se meaalofa a lea taulealea. Peitai, na faamanumalo e le uso matua o lea taulealea lana meaalofa sa aumai i lona uso i Ausetalia ma sa tulai mai ai se la vevesiga ma lona uso matua lea na iu ina fai ai ma fusuaga. Sa vaovao e le tama lea fusuaga ma ia fasiina ai le tama laititi.

Sa faapea loa ona alu lea taulealea ma sisi lona ua ma uma ai ma lona ola. O se tulaga faanoanoa le maitauina pea o le faatupulaia o i latou o lo o pule i o latou soifua ma ua fautuaina malosi e le faalapotopotoga o le Faataua le Ola le atunuu lautele aemaise o le tupulaga talavou, ina ia faatalatalanoa muamua o latou faafitauli ae lei faia se gaioiga matuia e pei o le pule i le ola.

Saunia: Lilomaiava Andrew Fa’asau, Naenae Productions