FA’ATULAGA COAST GUARD SU’EGA SAOGALEMU O VA’A FAGOTA

Ua faatulaga e le Coast Guard le latou fonotaga fa’alea’oa’oga e 2 e ao ina usuia mo le “Au Faifaiva” o lo’o i ai a latou va’a fagota ina ia auai mai mo a latou fonotaga e tu’uina mai ai ni fesili  e mo’omia ona talia.

O nei fetufa’iga uma e fa’aautu i le tulaga saogalemu i luga o va’a fagota ma lo latou  saogalemu e taula ai i Amerika Samoa. Mai le tele o tausaga, o lea itu sa le faamalosia, peita’i, o Oketopa 15, 2015, o le a fa’amalosia ai mo va’a fagota uma, laiti pe tetele, fa’atasi ai ma va’a alia, e ao ina pasia lea su’ega o le saogalemu.

Afai e le pasia e lou va’a lea su’ega, o le a le i ai lou Sa i le Lesitala o Va’a e fa’ataga i so’o se setete o Amerika atoa ma Amerika Samoa, i va’a e fagota pe taula ai fo’i. 

Afai o le a le umia e lou Va’a fagota lea “laisene ua saogalemu” pe a mae’a Oketopa 15, o le a i ai fa’amalosiga fa’aletulafono o le Kapeteni o le Uafu e a’afia ai.

Ua fautuaina le mamalu o le Au Faifaiva, poo ni latou sui ma’oti e aofia i lenei fonotaga mo fesili ma tali. O le a faia lea fonotaga i le Potu Fono o le Pago Plaza i le Fogafale muamua, ma ua fa’atulaga le aso Lulu Ianuari 21, mo va’a fagota laiti, i le itula e 10:00 i le taeao. O isi va’a fagota tetele e faia i le aso Tofi, 22 Ianuari, i le itula e 10:00 i le taeao.

Mo nisi fa’amatalaga telefoni Coast Guard i le 633-2299.

Afai e pasia lou va’a, o le a i ai lou laisene fa’ailo, e aoga mo le lima tausaga.

MALILIE MALO PASEFIKA SONE FAGOTA TAPENA TOKELAU

Ia Tesema 1, 2014 na malilie fa’atasi ai Malo Laiti o le pasefika, ina ia una’ia le Feagaiga ua mae’a fa’aulu e Tokelau, e fa’atulaga ai le sone mo fagotaga o le Apakoa ma le Tuna mai le ogasami o atumotu o le Pasefika.

Na aofia fa’atasi i lea maliliega o malo o Niue, Niu Sila, Samoa, Tokelau, Tonga, Tuvalu, ma Vanuatu. O lo ua manatu le Forum Fisheries Agency (FFA) o ituaiga o maliliega so’ofa’atasi fa’apea e aoga tele ona mua’i fa’atuina, ina ia fa’afaigofie ai ona u’una’ia malosi fa’ai’uga lelei e aoina fa’amalosia ai tulafono e fagotaina ai le i’a o so’o se itu o le sone fagota i le  Vasa Pasefika.

Ona ua fa’atulafonoina le fagotaina o le Apakoa ma le Tuna, aua o le a tula’i mai e ua tau le maua, ua taumafai ai ona tu’ufa’atasia lenei maliliega. Ua fa’ao’o mai fo’i lea maliliega ia Amerika Samoa lea na sainia e le kovana i le masina ua te’a atu nei i Apia, Samoa.

O le taimi nei, i le aotelega o fagotaga uma i Amerika Samoa, e tusa ma le 80% o faiva uma o le Apakoa, peita’i ua fa’ailoa mai, “Ua pa’ua maulaoo le tele o apakoa ua fagotaina nei i Amerika Samoa nai lo fagotaga sa tu’ufa’atasia i le 2000, talu mai ona amata fagotaga i laina.

I le 2013, ua lu’ia fagotaga i Amerika Samoa fa’apea ma isi malo uma o le pasefika i le fa’aitiitia o le Apakoa fa’atasi ai ma le taugata o le tapenaga o faigafaiva ua alagatatau ai ona so’ofa’atasi malo uma o le pasefika e fa’aitiitia teisi tupe fa’aalu ae fa’aolaola mai fagotaga. E o’o fo’i i fa’amaumauga o fagotaga i Amerika Samoa, ua iloa ai, e le si’itia le aotelega o faigafaiva i le tausaga 2014, ma ua fesiligia tele pe aisea ua tupu ai lea tulaga.

FANA MA MALIU TAULE’ALE’A FAGATOGO I KALEFONIA

O le taule’ale’a ua fa’ailoa mai  na fana e ni ali’i se to’alua i Anaheim, Kalefonia ma i’u ina maliu ai, o Alexander Raymond McMoore o Fagatogo, Amerika Samoa.

Ripotia e le nusipepa o le Orange County Registry e faapea, o lea fa’alavelave na tupu i le aso Lulu na te’a nei, i le itu i matu o le malae ta’alo pasiketipolo i Twila Reid Park, i le aai o Anaheim.

O lenei ali’i talavou ia Alexander, ua fa’ato’a atoa le 29 tausaga o lona soifua, ma sa fa’avave atu o ia i le falema’i i UCI Medical Center i Orange County, peita’i, o i’ina lava na to ai lana manava. E tasi lava lona manu’a i lona fatafata peita’i, e tuga ma ua maliu ai.

Ua fa’ailoa mai e tusa ai ma molimau a i latou sa i ai i le paka i le taimi o le fa’alavelave, e foliga mai o McMoore lava sa o atu le to’alua lea e fasia. O le to’alua na mafai ona fa’ailoa ane e tagata, lea ua taofia nei ina ua mae’a ona talia su’esu’ega a leoleo i lea lava a’ai.

O le to’alua ua fa’ailoa mai, Adam Jay Stone 28 tausaga o Anaheim lava ma Ransom Lee Cook o Westminister e 24 tausaga. Ma ua faatulagaina le fa’amasinoga le ta’i $1 miliona e tatala ai i tua.