FA’AAUAU POLOKALAMA FAIA’OGA SAILIA TIKERI

E to’a 28 faiaoga i Amerika Samoa ua fa’atulaga e faau’u mai i  le polokalame a le Iunivesite of Hawai’i Cohort, e maua ai tikeri fa’afaiaoga.

O le fa'au'uga e faia i le aso 18 Tesema i le Fale Laumei i Utulei, peita'i, o le toe ta lava e mau ai le fao, o lenei le galuega e ao ina fa'atino, e fa'ailoa ai, e te agavaa' mo le tusi pasi maualuga o le a e tiu ai i taua fa'ale-a'oa'oga.

"E tatau ona i ai sau galuega fa'atino e fa'ailoa ai le agaga alofa ia i'u lelei fanauiti a le atunu'u o le a e a'oa'oina. I taimi fita i fanau, e ao ina iloa e te mafai ona e faliu ma e va'aia pea i latou, ma a'oa'o i latou,” o se tala lea a Mene Taua'a, le fa'atonu o le CoHort i le teritori.

“Lea ua agaga ai faia'oga, e ao ina asia le fanauiti o lo'o fa'agasegasea, ma ua fa'anoanoa o latou olaga i lenei vaitaimi o le tausaga, o aso fiafia,” o ana upu fa’aopoopo ia.

O le amana'ia e faiaoga o fanau mama'i o se mea ua sili ona fa'afiafia agaga o le fanau i le falema'i ina ua asia i latou. Na va'aia le fiafia i o latou fofoga, ma ua fa'ate'ia fo'i nisi o i latou o lo'o masani i o latou faia'oga nei ua o atu e asi i latou.

"Teacher, fa'afetai mo la'u meaalofa, alofa atu i la'u vasega,” se tala lea a se tasi o ali'i talavou o lo'o ma'i, e le faigofie lona gasegase aua o lo'o se'e le ivi o lona vae, peita'i, ua misia aso e tele o lana a'oga. Na maligi loimata o tamaita'i faia'oga, e le faigofie ona  vaaia fanau i nei ituaiga o tiga, a'o vaitau nei o aso fiafia mo le fanau.

"O le agaga feso'ota'i lea o lo'o mo'omia i faia'oga taitasi, i aso ta'itasi e faia ai o latou tiute o le a'oa'o o le fanau, ia sili ona e va'ai i le fanau o lo'o tele se mana'omia o i ai, ae le o le musu e a'oa'o si tama ua vaivai, ae fiafia i fanau o lo'o vave le pu'e i mataupu,” o se tala lea a Mene i le tau fa'apupulaga atili o le afuaga ma le so'otaga o le poloketi fa'atino lenei ma le polokalama saili ai tikeri o nei faia'oga.

Ua mae'a nisi o polokalama i totonu o potu a'oga ma le latou a'oa'oina o fanau, o aga a le faia'oga e faia pe a o'o ina vevesi pe malomaloa fanauiti, o se mea fo'i e fa'afo'ia ai e le faia'oga se fa'afitauli ua va'aia ua tagi ai se isi tamaititi, pe mafai fo'i e le faia'oga ona faia se vaifofo e fa'afiafia uma ai lana vasega i taimi uma e tula'i ai e fa'atino a'oa'oga a le fanau.

SAILI SIAMUPINI MO VOLIPOLO

O le aso To'ona'i nei o le a fa'atautaia ai ta'aloga o le sailiga o le ta'ito'afa pito i luga i 'au o lo'o aofia i le liki atoa a le American Samoa Volleyball Association mo le Ipu a le Peresetene o lenei tausaga.

O le tulaga o i ai e 3 vaega o vaevaea i ai le liki: Vasega o Au a Tamaita'i; Au a Tupulaga 19 Tausaga ma aga'i i lalo;  ma le Vaega o Ali'i.

O le a muamua lava ona fetaui 'au ta'ito'afa pito i luga mo le sailiga o 'au e lua e fetaui mo le Siamupini ma e amata lava i ta'aloga a Tamaita'i ona faia lea o le Liki a U19 ae tomuli fo'i i liki a Ali'i.

O le liki lea na amatalia o le aso 27 o Novema, ae ua fa'asolo lava na'o aso To'onai e faia lea i le Faleta'alo a Kanana Fou ma e amata i le itula e 8:00 i le taeao.