Ads by Google Ads by Google

“ASG, UA E TU'ULAFOA'IINA EA A’U!”

Lau afioga Lolo ma le Faiga Malo,

Amuia oe Amerika Samoa o lo'o e tiu ma le saogalemu i ou laufanua ma aiga. O lo'o e alafa'i mai ma e tepa atu i le sami tioata ma le laufanua lanu meamata.

O lou manuia, i lou faamuamua o le Atua, ua e sapi ai i ma'a o malie. O lo'o liligi atu i lou faigamalo le miliona ma miliona o tupe mai i le malo tele o America. Tupe e fesoasoani mo ou tagata ina ia saogalemu, ola fiafia, ma faatuputeleina ai lou faiga malo.

Ae pagā lea, ua e 'ela i lou faatatau, ina ua e tu'ulafoaina mai ou tagata nu'u e 300 ma ona tupu, o lo'o aumau ma le onosa'i solo i Amerika.

E lē o se matou pogai ua tupu ai lenei mala, ae peita'i, o lo'o faaopoopoina lo matou tatalo faatasi ma outou ina ia malu puipui lo tatou atunu'u i aao o le Atua. Tafi ese ni mala i luga o Amerika Samoa.

Ua lata nei i le ono (6) masina talu ona tapunia alava'a i totonu o Amerika Samoa. Le malo e, o Amerika Samoa, ua tu'ulafoa'i mai ea se ia afea? Ua matou pagatia.

Ua le maua se moe, leai se filemu, ua sau le mativa, i le naunau i le fia tu vae i lo tatou atunu'u. Fia feiloa'i ma aiga ma fanau. Fia toe fo'i i galuega ma le tausiga o le fatuaiga.

O lo'o iai aiaiga mo le saogalemu o le toe taliu atu o ou tagata. Faamolemole lo'u faiga malo ma ta'ita'i o lo'o faiga filifiliga tonu mo le tatou atunu'u, fa'apea le Covid Task Force, Tatala maia lou finagalo. Tatou galulue faatasi.

E leai se mea e faigata i le Ali'i. Tatou te mafaia mea uma i le faatasi mai o le Ali'i.

O le augani ma le tagitagi atu lea o le pu mate. Māgalo mai i lou finagalo lo'u Malo Pele e, o Amerika Samoa se manatu ua tu'uvale i le faafofoga. A'o se tu'ualalo ma le loimata maligi e lafo atu i le mamea.

E te tu'ulafoa'i ma ea ia te a'u se’ia afea? Se a ea sou finagalo alofa?

Tagata Tu Faatasi Alliance a Amerika Samoa