Ads by Google Ads by Google

Toe aafia i le tulafono se ali’i o lo o nofovaavaaia mo le 5 tausaga


[ata: foa'i]
ausage@samoanews.com

Ua toe aafia fo’i i le tulafono se ali’i o lo o nofovaavaaia mo le 5 tausaga i le umia o fualaau faasaina, ina ua pu’e faapagota o ia e Leoleo i le 2 vaiaso talu ai ma taofia i le Toese i Tafuna, ona o tu’uaiga i lona umia lea o vaega o fualaau fa’asaina i le taimi na taofia ai e Leoleo lana ta’avale.

 

E pei ona taua e le malo i le latou tagi e fa’apea, o le afiafi o le aso 29 o Aperila pe tusa o le 7:20 i le afiafi na taofi ai e Leoleo sa tiute i luga o le alatele i Tafuna se pikiapu na aga’i atu i luga o le alatele ona ua mae’a le aoga o le laisene ae o lo o fealua’i pea lava i luga o le alatele lea pikiapu.

 

A o le i aga’i Leoleo e faatalatalanoa le ave ta’avale, na faia muamua fesootaiga ma le latou Ofisa autu mo faamaumauga o le ta’avale, lea na faamaonia ai, o le taavale pikiapu lea ua taofia na mae’a le aoga o le laisene i le 2 tausaga talu ai. Lona uiga, ua le o toe talafeagai le fealua’i i luga o le alatele a le malo.

 

Na siaki e Leoleo le ta’avale ma iloa ai, e to’alua ali’i o loo i totonu o le ta’avale. O le ave ta’avale, o ia lea o Avei, ma lana uo sa nofo i le nofoa o le pasese, le susuga a Alosio Vineula.

 

E leai se laisene ave ta’avale a Avei na umia i le taimi na fesiligia ai o ia e Leoleo. Sa ia faailoa i Leoleo, o loo galo lona laisene ave ta’avale i le fale. E oo lava fo’i i se isi lava ituaiga pepa e faamaonia ai o ia, e leai ma se mea sa maua i le taimi na fesiligia ai o ia e Leoleo.

 

Na faailoa e Leoleo ia Avei le mafua’aga ua taofia ai lana ta’avale i luga o le alatele, ona ua mae’a le aoga o le pepa lesitala o loo i ai i le 2 tausaga talu ai. Na finau Avei i Leoleo ma ia faailoa i ai, o le masina o Novema o le tausaga na te’a nei na toe faafou ai le laisene o lana ta’avale, i lona talitonuga la o lo o i ai, o loo lelei le pepa lesitala o le ta’avale. 

A o talanoa Leoleo ma Avei, na vaaia e le isi ali’i Leoleo le ali’i o loo nofo i le nofoa a le pasese, le susuga a Vineula o loo minoi solo ona lima e foliga mai o loo taumafai e nana se mea i lalo o le nofoa o le ta’avale. 

 

Na vave gaioiga a Leoleo ma taofia ai loa le susuga ai Vineula i lalo o le vaavaaiga a Leoleo mo se taimi le tumau, a o faaauau pea talanoaga ma le susuga a Avei. Na malie Avei i le polokalame a Leoleo, o le a auina atu i laua ma Vineula i le Ofisa o Leoleo i Tafuna mo suesuega, o le a taofia fo’i lana ta’avale i lalo o le vaavaaiga a Leoleo, se’i vagana ua mae’a ona toe faafou le pepa lesitala ona toe tatala lea i tua o le ta’avale. 

 

A o lei auina atu Avei ma Vineula i le Ofisa o Leoleo i Tafuna, na muamua faia se suega i o la tino mo ni aupega poo ni fualaau fa’asaina. E leai ni fualaau faasaina na maua ia Vineula, se’i vagana ai Avei na maua ai e Leoleo ni pepa iila laiti se 5 o lo o i ai vaega o le pauta faasaina o le aisa. 

 

Na auai Avei i le taimi na su’e ai e Leoleo lana ta’avale. I lea suega sa faia, na maua ai e Leoleo fualaau fa’asaina. Na maua e Leoleo  lalo o le nofoa o le ave ta’avale se tama’i ato uliuli o lo o i ai straws e 4 ua uma ona tatipi tulimanu, o loo i ai vaega o le pauta fa’asaina o le aisa. 

 

O le taimi lea na taofia i loa le sailia o le ta’avale, ae logoina loa Leoleo Suesue o le Vaega e Suesueina Fualaau Faasaina mo le fa’aauauina o le suesuega.

 

Ina ua fesiligia e Leoleo ia Vineula i lona i ai i totonu o le ta’avale a Avei, na taua ai e le pasese e fa’apea, na alu atu Avei ma piki mai o ia i lona fale i Vailoa ma le faaupuga la te ti’eti’e e faasavili i le afiafi. Na i ai le taimi na la afe ai i le nofoaga o Le Filifili ma fa’atau mai ai e Avei fualaau fa’asaina mai le isi tagata na te la iloaina le igoa.

 

Na taua atili fo’i e Vineula e Leoleo, ua leva ona faia e Avei lenei galuega o le tuleiina atu lea o fualaau faasaina i isi tagata.

 

Ina ua fesiligia e Leoleo ia Avei e tusa ai o fualaau faasaina sa maua ia te ia ma lana ta’avale, na ioeina ai e le ua molia e faapea, o mea uma na maua ia te ia ma lana ta’avale, o mea uma lava e ia. O Vineula, o lana uo e masani ona la tafafao, e leai se gaioiga a Vineula e faia i fualaau fa’asaina sa maua i le ta’avale ma lona tino.

 

Na faamaonia e Avei i Leoleo Suesue e faapea, o fualaau faasaina sa maua ia te ia ma lana ta’avale, na faatau mai i le nofoaga o Le Filifili i le $150, ma le faamoemoe e fa’aaoga mo ia lava. Na teena malosi e Avei le molimau a Vineula sa fai i Leoleo e faapea o ia e masani ona ia faatau atu fualaau faasaina.

 

Na taua e Avei i Leoleo, o fualaau faasaina na ia faatau mai i Le Filifili, e fa’aaoga mo ia i le taimi e fa’atino ai ana galuega, e maua ai lona malosi. O isi fualaau faasaina na te foa’i i nisi o ana uo, ae na te le tulei ma faatauina atu i isi tagata.

 

O le vaiaso na te’a nei na tula’i ai Avei i luma o le Fa’amasinoga Faaitumalo mo lana ulua’i tula’i. 

 

O loo molia Avei i le moliaga o le umia faasolitulafono o vaega o le pauta fa’asaina o le aisa; faapea ai ma le moliaga o le umia faasolitulafono o le aisa ma le fa’amoemoe e tulei ma fa’atau atu i isi tagata, o ni solitulafono mamafa e mafai ona faasala ai se tasi i le toese mo le umi e oo atu i le 10 tausaga, pe faasala i le salatupe e oo atu i le $20,000, poo le faasala fo’i i faasalaga uma ia e lua.

 

E $10,000 le vaega tupe lea ua fa’atulaga e tatala ai i tua Avei. 

 

MATAUPU MAI LE 2018

 

E 5 tausaga lea o lo o nofovaavaaia ai Avei i luma o le Fa’amasinoga Maualuga, ina ua ta’usala o ia i le moliaga o le umia faasolitulafono o vaega o le pauta faasaina o le aisa. O le faaiuga o le tausaga e 2018 na pu’e faapagota ai e Leoleo ia Avei ina ua aafia o ia i se vevesi na tula’i mai ina ua mae’a se inugapia sa faia i Tafuna i le fale o se tasi o ana uo.

Ina ua saili e Leoleo le tino o Avei, sa maua i ai pepa iila laiti e 2 o lo o i ai vaega o le pauta fa’asaina o le aisa. O le tausaga na te’a nei na ta’usala ai e le Faamasinoga ia Avei ma nofovaavaaia ai loa o ia mo le 5 tausaga i lalo o tuutuuga e ao ona ia usita’i i ai.

 

O nisi o ia tuutuuga e aofia ai lona tuliina o masina e 20 i le Toese i Tafuna, peit’ai, e na o le 12 masina na tuli e le ua molia, ae faamalumalu e le Fa’amasinoga le isi 8 masina i lalo o le talitonuga o le a ia usita’i i tuutuuga uma o lana nofovaavaaia, lea e aofia ai le aua nei ona toe tagofia ni fualaau faasaina poo le ‘ava malosi, aua fo’i ne’i ona toe solia se tulafono a le malo.

 

Ua faaalioa e le Loia a le malo le fuafua mo le tuuina atu lea o se talosaga i le Faamasinoga Maualuga, ina ia faaleaoga le nofovaavaaia a Avei ae poloaina loa o ia e tuli atoa le umi o lo o totoe o lana faasalaga faa falepuipui e 5 tausaga, ona o lea ua ia soli poloaiga a le Fa’amasinoga.