E leai ni fa’amaoniga ua mae’a ona faia se fa’aleleiga i le va o le afioaga o Vailoatai ma le faifeau a le Ekalesia EFKAS ua faia, e pei ona taua e ni isi o molimau i le Samoa News i le amataga o le vaiaso nei.

Saunoa le ta’ita’i o le itumalo, le afioga i le Alo o Salamasina ia Satele Galu Satele i le taeao ananafi, e leai se fa’aleleiga ua faia a le afioaga ma le faifeau, e pei ona taua e ni isi o molimau.

Na maua le avanoa e fesiligia ai e le Samoa News le susuga i le ali’i Faifeau ia Rev. Faletoi Uso i le taeao ananafi, e tusa ai o fa’amatalaga mai ni isi o le afioaga ma le Ekalesia e fa’atatau i le fa’aleleiga ua mae’a ona faia.

E ui e le i finagalo le ali’i Faifeau e toe saunoa e fa’atatau i lenei mataupu, ae ina ua fesiligia e fa’atatau i se tulaga ua taoto i ai le latou mataupu ma le afioaga,  sa ia saunoa e fa’apea, o lo o lelei lava mea uma i le Ekalesia ma le nu’u, e leai se mea o toe fa’aletonu, ae afai o lo o i ai lava ni tagata o le nu’u o lo o fia malamalama atili i le tulaga o le mataupu, e tatau ona toe fo’i i le nu’u e soalaupule ai.

Ae ina ua fesiligia le afioga Satele pe ua uma ona toe fa’alelei le vevesi na tula’i mai i le va o le afioaga ma le faifeau, na saunoa Satele, “e leai se leleiga ua faia”.

Saunoa Satele, o le lotu sa fai i le Aso Sa na te’a nei, o le lotu masani lava a le afioaga, o le Aso Sa fo’i lea o le Fa’amanatuga, lea na ta’ita’ia e le Susuga i le Toeaina, sa lotu ai o ia, na lotu ai fo’i ma le ali’i Faifeau ia Rev. Uso.

Na fesiligia pe aisea na le ta’ita’ia ai e Rev. Uso le Fa’amanatuga, ae na saunoa Satele, “sa ou talosaga i le Susuga i le Toeaina e le tatau ona ta’ita’ia e le matou Faifeau le Fa’amanatuga”.

Na toe fesiligia o ia i sona finagalo e tusa ai o le mataupu o lo o tu’uaia ai o ia i lona fa’ate’a ese o le ali’i Faifeau, ae o le a fo’i se mafua’aga o lea fa’aiuga, na musu le afioga Satele e tu’uina mai sona finagalo e tusa ai o lenei mataupu.

“E le faia se tala a Satele e tusa ai o le mataupu ua tula’i mai, ou te musu e fai sa’u fa’amatalaga, ou te alofa i lo’u nu’u ma le Ekalesia, o le nu’u na ou ola mai ai, o a ni fa’amatalaga ua salalau i le ea e tusa ai o le mataupu i le va o le afioaga ma le Faifeau, taoto ai fa’apea, ou te le tali lava i se mea e tasi, o lo o silasila le Ali’i i le moni ma le sa’o o lenei mataupu atoa”, o le saunoaga lea a Satele.

E silia i le to’a 10 tagata mai le afioaga o Vailoatai e aofia ai ni isi o matai ma tagata ekalesia na valaau mai i le Samoa News i le amataga o le vaiaso nei, ma latou taua le mae’a lea ona faia le leleiga i le va o le afioaga ma le Ekalesia i le Aso Sa na te’a nei.

Na taua e ni isi o matai na valaau mai i le Samoa News, o lo o fa’agasolo lemu pea fuafuaga a le afioaga mo le tu’u fa’atasia o se latou talosaga e tu’uina atu i le Ofisa autu o le Ekalesia i Kanana Fou, e talosagaina ai le suia o se latou faifeau fou, ona o fa’afitauli e pei ona tula’i mai i le latou faifeau.

E le i finagalo Satele na te fa’amatu’uina mai mafua’aga autu ua ala ai ona tula’i mai le fa’aletonu i le va o le afioaga ma le Faifeau, peita’i na taua e ni isi o le afioaga na valaau mai i le Samoa News, e masalomia o lo o a’afia ai le itu tau tupe i le mataupu lenei.