O le aso lenei, e fa’apitoa mo manamea, sa faia ai e le tina loto fa’avauvau o Kadisha Aga-Velega o Fagaitua, fa’atasi ma matua ma aiga o lana tane fa’aipoipo, Saito Paulo, le fa’aiugatonu, ia lagomau le tama o le aiga, a’o lumana’i ai le aso na soifua a’e ai lo la’ua alo e to’atasi lava, Allen Alaalamaota Velega Paulo

O le taeao o le aso To’ona’i na tea nei, na ave’esea ai lona tino mai le falema’i i Faga’alu, ma molimoli sa’o i le Malumalu Ekalesia Fa’apotopotoga Kerisiano i Amerika Samoa i Faga’itua mo lona toe sauniga.

I lea sauniga sa ta’ita’ia lava e lona Tama fa’aleagaga, Rev. Johnny Fano ma sa fa’apea fo’i ona matua fa’atumulia le malumalu ona o le to’atele o le ekalesia ua latou iloa lelei o ia, ona aiga i ona itu tetele ma ona itu taulagi, ae maise o lona paolo fo’i i e pa’ia o aiga e malu ai le atali’i ua sola fa’asulusulu.

Na i ai avanoa sa molimau ai e matua pele ia Saito a’o soifua, i lana manamea mo le lua tausaga ma nai aso, Kadisha. I lana molimau sa matua faigata ona fai se upu, aua e le’i manatu o ia, mo sina minute e tasi, o le a motusia le mafutaga mafana i lenei tausaga.

“E ui ina puupuu taimi na mafuta ai ma’ua, ae o le tele ia o mea lelei, e le mafai ai ona faigofie ia te a’u ona fa’agalo lo’u to’alua, po’o le tama o si matou aiga to’aititi. E le taitai ona le faia e Saito se mea ou te naunau i ai.”

“O lo’u lima taumatau i mea e fa’atino mo i ma’ua, ae maise i lo’u aiga i se mea e manana’o mai ai o’u matua. E le o se tasi e mata fa’asiasia pe a alu e fai se fe’au, e amio tamali’i i luma o le ekalesia ma o’u matua ma lo’u aiga. Ae maise ou te iloa lelei, lona fai matua tele. E amata mai ona matua, e oo mai i lo’u aiga.”

“Ou te fa’amoemoe i ai i le tele o fe’au ou te mana’o e fai, pe ua fa’atonu ai fo’i a’u e fai. E i ou tafatafa i taimi uma, ae o se tasi ou te fiafia tele ou matamata i lana ta’alo i le Volleyball. O se tasi lea o mea e matua fiafia ai o ia i lona olaga talavou.”

“E alofa ma le fa’amaoni o ia ia te’i ma’ua ma le ma’ua tama…faafetai Saito mo le mafutaga taua na e alofaina ai a’u ma lo’u aiga!”

I le molimau a le tina o Saito, ia Asolelei Paulo Latu, sa ia fa’ailoa ai, “O lenei atali’i o se tasi e tausi matua tele, e alofa tele ia i ma’ua ma ona uso ma tuafafine. E ui ina ua fai lona aiga, ae le mafai ona galo i matou ia te ia. E le talia se fa’atonuga i se foliga fa’asiasia, ae fiafia ma tali i le ata so’o se mea. E le mafai ona taofia lona naunau i le ta’aloga o le Volleyball, e fiafia tele i ai, ma e fa’aluaina fo’i le molimau a lona to’alua.

“E fa’agalo gata le uiga tausa’afia o lenei atali’i, e ui ina tiga, ae atonu e taliagofie e i tatou uma le vala’au ua vala’auina ai o ia, e malolo. Ma te alolofa tele ia oe, Saito, ina alu ia oe ma le manuia.”

I le molimau a le tama o Kadisha, le tama o Velega sa ia fa’apea ai, “O lenei atalii e le foliga mai o se to’alua o le ma’ua tama, ae ua tula’i mai o se tasi o la ma’ua lava fanau. A otegia e otegia fa’atasi uma ma le ma’ua fanau, ae ua sili atu lo’u fa’amoemoeina o ia i mea e fai o le matou aiga.” Na tau le mafai se upu a lenei tama, aua sa tutulu o ia ona o le matuitui o le alofa ia Saito.

Ina ua mae’a le sauniga sa fa’auia loa lona Sa i le mato o le Aiga o Aga mo sina taimi e fa’ato’ai atu i ai nisi o le paai o aiga, ina ia fa’afeiloa’ia Saito, ma fa’atofa uma i ai.

Na masi’i fa’aaloalo atu le paia o aiga, ae maise fo’i o le latou Kamupani a le Manu’a Store. O le foa’i tupe ma le faiteu a le aufaigaluega sa taua’aoina e $2,000 peita’i, ua fa’ailoa mai e le’i i ai se mea e tasi ua maua mo le “Ola” o Saito mai le Kamupani sa galue ai.

O lenei ali’i na fa’aipoipo ia Kadisha ia Tesema 31, 2014, ma e to’atasi lava lo la’ua aloali’i o Allen Alaalamaota Tamatane Velega Paulo ma ua atoa nei le lua o ona tausaga i le aso 12 o Fepuari.

O ona matua o Asolelei ma Alaalamaota Paulo Latu. O lana taleni e va’aia pea lona naunau i ai, o le ta’alo lea i le Volleyball ma sa avea o ia ma se tasi o le au fili a le latou Ekalesia i le ta’amilosaga Volleyball a le EFKAS i Kanana Fou. O le isi fo’i ona sao lelei, sa avea ai o ia ma tama Ta’alo Kirikiti a le Tuna Ula mai Fagaitua i tausaga ua mavae.

O Saito o le lona tolu ai lea o taule’ale’a na maliu mai le fa’alavelave tau eletise na tupu i Tafuna i le lotoa a le Manu’a Store, ma e fa aso na soifua ai pea o ia ona fa’ato’a maliu lea ina ua mae’a lea fa’alavelave.

I se tala a le tina o lona to’alua, sa ia fa’apea ai, “O se tama ina ia alofagia i lona toe aso, ua fa’apea lava ona fa’apena ona uiga i le matou aiga. E mategata ona uiga, aua e le o se isi tautala so’o, ae uiga fiafia lava ia i taimi uma. A ote fo’i le tama o le aiga, e le fa’asiasia ai, ae tali mea uma i le ata. E mautinoa, ua faletulu’ia si matou aiga, aua ua misia se isi sa matua fa’amoemoe i ai le tama o le aiga, i le tele o mea e fai.”