Ads by Google Ads by Google

Tete’e Fatulegae’e tu’uaiga lona avatu o tama’ita’i talavou i lona Ofisa

 Le afioga i le ali’i Faipule mai le itumalo o Vaifanua ia Fatulegae’e Palepoi Mauga  [ata AF]
ausage@samoanews.com

“.... ou ke le o aumaia gi fafige ma gi kama’i keige i lo’u ofisa, pau fafige ma kegeiki o lo o gasolo mai i lo’u ofisa, o kagaka paloka o lo’u ikumalo...”

 

Na matua teena malosi e le afioga i le ali’i Faipule mai le Itumalo o Vaifanua ia Fatulegae’e Palepoi Mauga i le vaiaso na te’a nei, tu’uaiga e fa’apea o lo o ia la’u atu tama’ita’i e aofia ai teine talavou i totonu o lona Ofisa mo le faia o ni a latou mafutaga.

 

Ua le masino se tagata faigaluega o le Fono Faitulafono e talanoa mai i le Samoa News e uiga i lenei mataupu.

 

Ae o le vaiaso na te’a nei, na molimauina ai e le Samoa News ma le tusitala o se tasi o vaega faasalalau i se tulaga ese na mafua ai loa ona fesiligia le ali’i faipule, ina ua vaaia ni ali’i talavou se to’alua fa’apea ai ma se tama’ita’i pe a ma le 19 tausaga le matua, o savavali aga’i atu i le Ofisa o le ali’i faipule mai Vaifanua, ae o le taimi lea o lo o fa’agasolo ai se iloiloga i luma o le maota o sui, o lo o ta’ita’ia e le afioga ia Fatulegae’e.

 

Sa faigata ona iloa atu foliga o le tama’ita’i ona sa pupuni ona foliga i se tusi aoga, ae ina ua taunu’u i luma o le Ofisa o le ali’i faipule, sa tatala e se ali’i faigaluega o le Fono le faitoto’a o le potu, ma ulufale loa le tama’ita’i talavou lenei i totonu o le potu i se gaioiga e pei e fa’anatinati ina ia aua ai nei iloa atu o ia e se tasi.

 

Na talosaga le Samoa News ma le sui o le isi vaea faasalalau i le ali’i faipule mo se avanoa e faia ai se fa’atalatalanoaga i totonu o lona Ofisa i le aoauli lava lea, ona o ni isi o mataupu sa fia maua i ai sona finagalo, peita’i sa teena e le ali’i faipule le talosaga, ona sa ia taua fa’aalia e fa’apea, “O lo o i ai i totonu o lo’u Ofisa tagata palota mai lo’u itumalo”.

 

Sa fa’atauanau ma saga fa’atauanau pea Tusitala i le afioga i le ali’i faipule mo se avanoa, peita’i sa tumau pea lona teena o se talanoaga e faia, ae ina ua fesiligia le faipule pe moni o se tama’ita’i talavou o lo o i totonu o lona Ofisa, sa ia tete’e ma fa’apea mai, “E leai se keige o i totonu o lo’u Ofisa, o tagata palota mai lo’u itumalo”.

 

Na taua e se tasi i le aoauli lava lea, ma ia fa’amaonia mai ai i le Samoa News o se tama’ita’i talavou lava o lo o i ai i totonu o le Ofisa o le ali’i faipule.

 

O le aso na sosoo ai ina ua toe fesiligia e le Samoa News ia le afioga ia Fatulegae’e e fa’atatau i le tama’ita’i talavou sa i totonu o lona Ofisa i le aso ua tuana’i, na suia ai le tali a le ali’i faipule ma ia saunoa ai, “O le teienititi sa i totonu o lo’u Ofisa, o lo’u tei mai Pago Pago, na sau e avatu se tupe e pasese ai i le aoga, e aoga i le Kolisi, ona ou ave lea i ai o le $20”.

 

Saunoa atili Fatulegae’e e fa’apea, na te le iloaina po o ai na avatua le teineititi i totonu o lona Ofisa, ae ina ua fesiligia pe aisea na umi ai ona i ai le teineititi i totonu o le potu, lea na ulufale pe tusa o le itula e 1:30 i le aoauli ae fa’atoa alu ese ua te’a le itula e 4:00 i le afiafi, ae na saunoa le ali’i faipule e fa’apea, “na umi ona i ai o ia i le ofisa ona sa fai ana meaaoga i luga o le nofoa, ae ou nofo lava fo’i a’u i luga o la’u laulau ma faitau la’u tusi”.

 

Na toe fesili le Samoa News ia Fatulegae’e po o sana uo le tama’ita’i sa i ai i totonu o lona Ofisa, ae na tali le ali’i Faipule, “E le o sa’u teine ae o si o’u tei”.

 

“O le ofisa lenei o le ofisa o le itumalo, soo se tagata lava o le itumalo e sau ai, e le fa’apito i se tasi”, o le saunoaga lea a Fatulegae’e.

 

Ae ina ua fa’ailoa i ai e le Samoa News ripoti mai le to’atele o tagata faigaluega a le Fono Faitulafono, e fa’atatau i fafine ma tama’ita’i o lo o ia la’u atu i lona Ofisa e ta’ito’atasi i ni isi o aso, na tali le ali’i Faipule e fa’apea, “e mafua ona o mai fafine ma tama’ita’i i le ofisa ona o tagata o le itumalo, o tagata palota o le itumalo, e le o aumaia ni a’u teine i le ofisa lenei, e sa ona aumai ni a’u teine i le ofisa lenei, ona o le ofisa o le itumalo, e le tatau ona ou faia ni uiga fa’apena, o tagata o lo o ulufale mai i le ofisa lenei e aofia ai Tamaloloa, o tama’ita’i ma fafine, na sau fo’i le isi fafine ananafi (vaiaso ua te’a) o lo’u itumalo mai Onenoa ua te’a le 4:00 i le afiafi, ona ma talanoa ai lava lea fa’atoa ma ta’ape ai i le afiafi”.

 

I le fa’aiuga o le talanoaga i le Samoa News ma le afioga ia Fatulegae’e, na fa’ailoa ai e le ali’i faipule e fa’apea, “e le o a’u o se tagata e faia ni uiga mataga fa’apena i tama’ita’i laiti po o ni isi lava fafine”.

 

Ae fia fa’ailoa atu e le Samoa News e fa’apea, i ni tausaga ua mavae atu a o le i pale mai Fatulegae’e i le nofoa o le itumalo, sa ta’usala o ia e le Fa’amasinoga Fa’aitumalo i le moliaga mama o le fa’ao’olima i le tulaga tolu, ona o le fa’alavelave lea na a’afia ai se teineititi e laititi, ma i’u ina fa’anofovaavaaia ai o ia e le fa’amasinoga fa’aitumalo.