Ads by Google Ads by Google

Tala I Vaifanua


O se va’aiga i le Talotaloga i Utulei i le taeao o le aso Gafua e fa’ataua ai le masina lenei o Mati 2017, mo i latou e i ai mana’oga fa’apitoa i le tino ma le mafaufau. O le auto o lea talotalosaga, “Ou te i Ou Autafa!” [ata: Leua Aiono Frost]

MATI: FA’ATAUA TAGATA E I AI MANAOGA FA’APITOA

 

O le taeao aso Gafua na te’a nei na ala usu ai le vaega a le SPED, i lona vaega Tutotonu, e aofia ai Matafao Elementary e oo atu i Afonotele ma Vatia, ina ia fa’atino le latou “Talotaloga” e fa’ailo ai e sapasapaia o taumafaiga ua fa’atautaia e le Special Education Program, ma isi mataglauega eseese, ua patino latou tautua i e uma o lo’o “i ai afaina tumau po’o manaoga fa’apitoa, i le tino ma le mafaufau,” i totonu o le atunu’u.

 

Ua fa’aautu lenei taumafaiga i lea taeao, “Side by Side” poo le “Ou te i Ou Autafa!”

 

O lea talotaloga o le amataga lea o le tautua fa’ailo mo lenei masina o Mati, e fa’ataua ai i latou uma ua i ai nei mana’oga tupito, fa’atasi ai ma le amana’ia ma fesoasoani i so’o se ala ua tapena mai e le vasega o fa’alapotopotoga ma matagaluega o lo’o latou tautuaina i latou nei i totonu o le atunu’u.

 

Fa’ailoa e le kovana i lana poloaiga e faapea, “Ia tatou tausia lelei o tatou pelega o lo’o i ai manaoga faapitoa, ia fa’ataua lo latou ola fiafia, ma ia taumafai fo’i auaunaga uma o lo’o faatupea e le Malo tele ma le tatou fo’i malo fa’ateritori, ina ia tautuaina i latou i le malosi e gata ai le mafai.”

 

Saunoa le sui o le Ofisa o le Special Education i Faga’alu, “O lo ua fa’atulaga mea uma ua tapena mo le fa’ataua o lenei masina mo i latou nei i ona vaega e fa. O le vaega tutotonu lea ua amata mea i le fa’alauiloaga, peita’i o lo’o tofusia nei vaega e fa ma latou polokalama fa’asolo e fa’atautaia i le latou lava pito o le atunuu atoa.”

 

O le Special Education ua fa’aaogaina i totonu o Aoga, ina ia mafai ona aoaoina lava le fanau fa’apitoa nei i totonu o potu a’oga, ma ua tutusa fo’i a latou aia tatau ma isi fanau uma, i tulaga o le a’oa’oga.

 

Ua aufa’atasi fo’i le VocRehab ma le OPAD i lenei masina fa’ataua mo i latou nei, ma o loo latou tautua fa’atasi ma le UCEDD mai le Kolisi Tuufa’atasi a Amerika Samoa mo se FUN RUN o le a faia i se vaitaimi e talafeagai ma le fa’atulagaga ma isi polokalama.

 

I le wave i Utulei, sa le nofonofo fo’i le aiga o le afioga le Aloali’i Afoa Moega Lutu ma le faletua o Etenauga aua o loo aofia ai lo la’ua alo, Justin Lutu i le vaega o alo e fa’ataua mo lenei masina. Sa auai ane fa’atasia ma le Samoana High School ae matua fai le “Talotaloga mo i Latou e i ai Mana’oga Fa’apitoa i le tino ma le Mafaufau” e tatala ai le fa’atauaga o le masina atoa o Mati, 2017.

 

I le lumafale o le Fale Ta’alo a le Samoana i le latou pa ua fa’atautau uma ai latou fa’ailo o lo latou sapasapaia o le taumafaiga ina ia fesoasoani ma fa’ataua i latou uma o lo’o soifua ma mana’oga fa’apitoa.

 

TATALA ALOAIA FALE KOLUSE MUMU - MATI 23, 2017

 

O le masina atoa lenei o Mati ua fa’atulaga mo le fa’atauaina o le tautua a le Koluse Mumu i totonu o le atunu’u, ma ua aga atu fo’i le Komiti Fa’afoe a le Koluse Mumu ina ia faataua le taumafaiga ale Koluse Mumu e fesoasoani atu i tagata uma o le atunu’u i taimi pagatia, o so’o se ituaiga.

 

Ma o le a tatalaina aloa’ia ai ma le Fale o le a fa’atula’ia ai le Ofisa Autu o le Koluse Mumu i Amerika Samoa. O lenei galuega, sa fa’atino mai i tausaga ua mavae, peita’i, sa taumafai lava ina ia fausia lenei fale i tupe e foa’i mai e le mamalu o le atunu’u, ina ia siitia ai fo’i le silasila a le Koluse Mumu i Amerika i le tatou nei lala iinei.

 

O le aso 19 Mati, 2017 o le a faia ai le sauniga lotu fa’apitoa, i le Malumalu Ekalesia Katoliko i Iliili, ina ia tatala aloa’ia ai le masina lenei e fa’ataua ai le galuega fesoasoani a le Koluse Mumu i o tatou tagata.

 

I le taimi nei o lo’o fa’atautaia ai kosi fa’amasani i tiute e ao ina fa’aauupegaina ai tagata ua ofo atu a latou tautua i le Koluse Mumu, ma e mafai ona e fa’afesiligia sou avanoa pe afai o le a e vala’au i le numera 699-6011, pe afai o loo fia ofo atu lau tautua i le Koluse Mumu.

 

I le tamia nei, o le tele o le foa’i mai le mamalu lautele mo le Koluse Mumu i Amerika Samoa, o lo’o maua mai lea i Atigi Apa o lo’o i ai lava le Koluse Mumu ma o loo fa’atutuina lea i autafa o Kesia a faleoloa eseese i totonu o le Teritori. Afai e maua sou avanoa, ia e foa’i ma lou loto malie i nei atigi apa, ma ia e silafia lelei, o se vaega itiiti ua e taua’aoina atu, e maua mai ai e lou aiga se fesoasoani taua, i le taimi fita o le olaga, pe afai e afaina lou aiga i se mu, po’o fa’alavelave fa’anatura i totonu o le tatou atunu’u.