O lo o su’esu’eina e le Ofisa o Leoleo a le malo i le taimi nei se mataupu o lo o tu’uaia ai se faiaoga mai se aoga maualuga i le itu i Sisifo, i lona faia lea o uiga mataga i ni tamaiti aoga se to’alua.

E tusa ai ma ni fa’amatalaga ua tu’uina mai i le Samoa News, o lo o taua ai le taumafai malosi o le Ofisa o Leoleo e saili ni fa’amatalaga e uiga i lenei mataupu, i le mae’a ai lea ona o latou taulimaina o se ripoti e fa’atatau i ni ali’i aoga se to’alua o lo o tu’uaia le faia i ai e le faiaoga o uiga mataga.

E tusa ai ma fa’amatalaga ua maua e Leoleo e pei ona fa’asoa mai i le Samoa News, ua mae’a ona faia se su’ega i le falema’i (test) fa’asaga i ali’i aoga e to’alua o lo o tu’uaia na a’afia, pe sa a’afia i laua i ni faiga mataga fa’afeusuaiga, ma fa’amaonia ai le a’afia o i laua i nei a’afiga (sexual transmitted desease - STD).

“O lo o taumafai malosi pea le Ofisa o Leoleo e saili mai le ripoti mai le Foma’i sa ia faia le su’ega fa’asaga i ali’i aoga e to’alua na a’afia, ona e taua tele le ripoti lea e mafai ai ona fa’aauau le su’esu’ega fa’asaga i le Faiaoga o lo o masalomia i lenei mataupu. O lo o fesiligia fo’i e le Ofisa o Leoleo le tulafono lea e fa’amalosia ai le ripotia mai o mataupu fa’apenei i le matou Ofisa (mandatory reporting) ina ia vave ai ona puipuia fanau laiti e a’afia i faiga mataga fa’afeusuaiga, peita’i e le mafai ona fa’aauau la matou su’esu’ega pe afai e le mafai ona matou galulue fa’atasi ma le vaega a le Falema’i o lo o taulimaina lenei ripoti”, o le saunoaga lea a se tasi o Leoleo Sinia mai le Matagaluega o Leoleo.

O le Faiaoga e pei ona taua i ripoti a Leoleo o lo o masalomia i lenei mataupu, o se Faiaoga ali’i o lo o fa’aigoaina i le latou ripoti o se “Faiaoga Fa’afafine”, ma o lo o tu’uaia o ia i lona faia o uiga mataga fa’asaga i ni ali’i aoga se to’alua, e aofia ai le faia o uiga mataga fa’afeusuaiga e fa’atino i auala fa’asotoma.

O lo o talosagaina e le Ofisa o Leoleo le fesoasoani a le atunu’u mo le tu’uina atu o ni isi fa’amatalaga e uiga i lenei mataupu.