Vaega: 90

O le a toe fa’aauaua atu la tatou tala mo lenei aso. Na muta mai la tatou tala, ina ua toe savali ane le tama’ita’i tausima’i ma fesili po’o Luisa lea o lo’o i ai i le taimi lea. Na tali le teine, “Ioe o ia o Luisa, ae pe ua i ai se mea ua tupu i si ona uso.”

Na tali le tama’ita’i tausima’i, “Luisa, o lou igoa na ta’u mai e lou uso, fa’atasi ai ma le igoa o Roger, o ai Roger?” Na tali fiafia ane i ai Luisa, “O le to’alua o lo’u uso, ae o lo’o malaga le tamaloa, ona e kapeteni i va’alele, o lo’o alu lana malaga i Ausetalia.”

“Ua mafai ona toe tautala mai Filipina, ae mo le taimi nei, e mo’omia lava sana malologa, fa’afetai atu i lo outou onosa’i, ae ua ma’ea galuega a ali’i foma’i, ua tulaga lelei lava Filipina i le taimi lenei.” Ua fafa le isi fa’afetai i luga o le isi fa’afetai, ua maligi ifo loimata o Luisa i lea taimi.

Fai mai, o loimata o le fiafia ma le loto fa’afetai i le Atua, ina ua tali mai i talosaga le leoa sa fai i le taimi na logo ane ai, ua tulaga fa’aletonu Filipina. O lea ua tali mai le Ali’i, e lagona ai le loto fa’afetai i mea uma.

Ua tu nei i luga Lolesio, “Fa’afetai tele ia te oe le tama’ita’i, momoli atu fo’i le fa’afetai i ali’i foma’i, fa’amalolo le galulue.” Na toe fa’apea ane le tama’ita’i tausima’i, “E mo’omia la oe Luisa, e ta te o, se e va’ai i le pepe, oka, o le aulelei o le pepe, leitioa fo’i, ona o le na o le palagi lona tama.”

Ua ‘ata Mareta ma tilotilo ane ia Lolesio, ae ua punou Lolesio ua le tautala. Na tilotilo ane nei Luisa i si ona tausoga o Mareta, ae tali ane i ai Mareta e alu ia e va’ai le pepe, ae fa’atali atu ma Lolesio. Ua fa’apea lava ona fai, fai mai, na savali fiafia nei Luisa i totonu o le potu o lo’o i ai le tama a lona uso.

Na iloa mamao atu lava e Luisa le pepe pa’epa’e o lo’o autafiti solo mai i luga o lona moega. Ua ‘ata Luisa ma savali atu i ai, “Oka, oka e, ailoga e te iloa toe titi a tupu le fa’alavelave i lou tina talutalu oe, sau, sau se i o’u si’i muamua ia te oe.”

E moni lava, o le toto e sosolo, fai mai, ina ua si’i i lima o Luisa le pepe, ua na o le autafiti solo. Ae fai mai le tala, o matua’i lapo’a lava o le pepe, e iva pauna, leitioa a tau oso le fatu o si ona tina i le taimi na fanau mai ai. E le i iloa e Filipina po’o le a si ana tama, e le i fa’ailoa fo’i i ai e ali’i foma’i, ona o lo latou manatu, se i fai se malologa a Filipina, e sau se taimi ona ta’u lea i ai.

Ae fai mai, a’o i ai Luisa i totonu o le potu failele, o le taimi lea ua alu le talanoaga a Lolesio ma Mareta. Na fa’amatala nei e Lolesio i a Mareta le latou feiloa’iga ma Lilo ma Loleta. Ua toe manatua vave ai loa e le tama, e tatau ona toe logo vave Lilo, o lea ua i ai le suiga lelei o Filipina, ina ia ‘aua ne i ta’uina i le lo’omatua, ne i tupu mai ai se fa’alavelave.

Na a’apa ifo nei Lolesio ma vili loa le telefoni a Lilo ma Loleta, fai mai, na tali mai e Loleta le telefoni i lea taimi, ae ua amata le talatalanoaga a Lilo i lo’omatutua, o Malia ma lona uso la’ititi. Na savali atu nei Loleta ma tu’u atu le telefoni i a Lilo, “Lilo, o Lolesioa, o lea ua uma galuega a ali’i foma’i, ua toe ala mai i luga Filipina, o Luisa o lo’o i totonu o le potu, o lo’o alu e va’ai le pepe, ae ‘aua le popole, alofa atu i nai lo’omatutua.”

E faia pea...