O le taeao ananafi na fa’apaiaina ai le eleele mo le fausiaina o le Ofisa fou mo le Vaega Tosova’a a le malo i Satala, lea ua fa’amoemoe e faatupe i se vaega tupe sa maua mai i le Pone a le malo.

Na molimauina e ta’ita’i o le malo fa’apea ai le Fono Faitulafono ma sui o le itumalo o le Maoputasi lenei fa’amoemoe taua, lea na fa’ataunu’uina lava i le nofoaga autu o le Vaega Tosova’a i Satala.

O le mae’a ai o se sauniga lotu puupuu na saunia e le susuga Rev. Patolo Mageo, o le Faifeau o le Ekalesia Fa’apotopotoga a le Atua i Pago Pago, na sosoo ai loa ma saunoaga autu o le aso, lea na saunoa i ai le Ta’ita’ifono o le Komiti Fa’afoe o le Vaega Tosova’a, afioga Fuiavailiili Keniseli Lafaele, fa’apea ai ma le afioga i le kovana ia Lolo Matalasi Moliga.

O le masina o Aokuso 2015 ina ua mae’a ona tofia e le ali’i kovana le Komiti Fa’afoe mo le Vaega Tosova’a, na taua ai e Fuiavailiili le finagalo o le ali’i kovana ina ia fausia se fale fogafalelua e avea ma Ofisa tutotonu o le Vaega Tosova’a.

“E ui e leai se tupe sa i ai i lena taimi, ae sa ou tali i le ali’i kovana, ua lelei, o le a saili se auala e fa’atino ai lea fuafuaga”, o le saunoaga lea a Fuiavailiili e fa’atatau i le tau amataina mai o lenei galuega.

O le fale e pei ona fa’apaiaina i le taeao ananafi lona fausiaina, o le a fa’atinoina ai galuega eseese e pei o galuega inisinia ma le uela, lea o le a galulue ai alo ma fanau a le atunu’u ua i ai le tomai i le fa’atinoina o nei galuega.

Saunoa atili fo’i Fuiavailiili e fa’apea, o le fale fo’i lea ua fa’amoemoe e fausia ai le ituaiga alia fagota lea ua taua o le “Supa-Alia”, e fa’aaoga ai mo faiga faiva.

Na taua e le afioga i le ali’i kovana i lana saunoaga le lata i le $5 miliona le tupe ua fa’aalu e le malo mo le toe tau fa’aleleia o le tautua a le Vaega Tosova’a, ona o le talitonuga a le malo o lo o i ai, o le Vaega Tosova’a, o le ola lea o kamupani i’a, malo fa’apea ai ma tagata.

“Fa’afetai atu i le Komiti o le Pone mo le vaega tupe ua mafai ai ona fa’ataunu’u lenei fa’amoemoe taua, o la’u lu’itau ua mae’a ona tu’uina atu ia Fuiavailiili ma le Komiti Fa’afoe, ia uma le 2018 ua o o le Vaega Tosova’a i le maualuga e tatau ona i ai lana tautua, aua o le taimi nei, e le o i ai se Inisiua e puipuia galuega fa’atino a le Vaega Tosova’a, ae afai e mautu vaega e pei ona fuafuaina, ona tula’i mai ai loa lea o le Vaega Tosova’a i se tulaga manuia ma lelei mo le atunu’u atoa”, o se vaega lea o le saunoaga a le ali’i kovana.

O le isi itu taua o le taumafai malosi pea o le malo e faaleleia le Vaega Tosova’a, o tama fanau lava a le atunuu lea ua latou fa’atinoina galuega uma o lo o fa’atinoina mo le manuia o soo se va’a o lo o auina mai mo le fa’alelei, e pei ona saunoa le ali’i kovana.

Ae mo le aga’i i luma o le tautua a le Vaega Tosova’a, ua fautuaina e le ali’i kovana le Komiti Fa’afoe ma le Pulega ina ia saili ni isi vaega tupe e fa’atupe ai le aveeseina o ni isi o ativa’a ma u’amea o lo o ta’atitia i le isi itu o le sami, ina ia mafai ai ona fa’amatagofie le nofoaga e fa’atinoina ai galuega uma a le Vaega Tosova’a.

Saunoa le Pulesili o le Vaega Tosova’a, tofa Moefa’auo Bill Emmsley, e ui i le tele o fa’asea o lo o fa’alogoina mai ni isi o le atunu’u i le le tatau lea ona toe fa’aalu e le malo ni isi tupe mo le Vaega Tosova’a, ona o lea ua valoia le tapunia o le isi kamupani i’a, peita’i e manatu le Vaega Tosova’a, e tele naua isi va’a o lo o mafai ona toso mai i Satala mo le fa’aleleia o vaega ua fa’aleagaina.

Sa ia taua foi e fa’apea, tusa lava pe na o le tasi le kamupani i’a i Amerika Samoa, e mana’omia pea le tautua a le Vaega Tosova’a i Satala.