Ads by Google Ads by Google

Avea pea Turisi mai fafo o se fa’amanuiaga mo pisinisi laiti


Pisi solo le to’atele o turisi i totonu o le atunu’u ina ua taunu’u mai va’a meli e lua sa asia le atunu’u i le aso Faraile o le vaiaso na te’a nei. [ata AF]

Ni isi o turisi sa malaga mai i va’a meli e lua ia na asia Amerika Samoa i le vaiaso na te’a nei, i le taimi na maimoa ai i le tele o oloa Samoa mai pisinisi lotoifale i le atunu’u. [ata AF]
ausage@samoanews.com

Soo se taimi e afea ai laufanua lanu lau’ava o Amerika Samoa e so o se va’a meli mai fafo, e le fesiligia le avea pea lea ma auala e fa’amanuiaina ai le tele o pisinisi laiti o lo o tau atina’e i totonu o le atunu’u.

 

O le aso Faraile na te’a nei na toe fa’amanuiaina ai Amerika Samoa aemaise ai o le to’atele o pisinisi laiti i le atunu’u, ina ua afea le atunu’u e va’a meli tetele se lua na malaga mai ai le silia i le to’a 5,000 le aofa’i o turisi, fa’aopoopo ai ma le silia i le to’a 1,000 le aofa’i o tagata faigaluega.

 

E ui i le puupuu o le taimi na i ai va’a meli ia e lua i le taulaga i Fagatogo, ae o se tulaga na matua fa’amanuiaina ai ni isi o le aufai pasi, taxi ma le aufai pisinisi, ina ua feololo nai fa’atauga na mafai ona maua ai.

 

O le itula e 8:00 i le taeao na taunu’u mai ai le va’a o le Noordam, o se va’a mai le kamupani va’a a le Holland America Lines i le taulaga i Fagatogo, ma ia aumaia ai turisi e to’a 2,366, aemaise ai o le aofa’i o ana tagata faigaluega e to’a 820, ma toe tu’uva’a ese atu ai ma Amerika Samoa i le itula e 6:00 i le afiafi. O le fa’alua ai lea ona malaga mai o le va’a meli lenei o le Noordam i Amerika Samoa, ma ua malaga sa’o atu nei i Suva i Fiti, o se vaega lea o lana malaga na amata mai i Hawaii e aga’i atu i Ausetalia.

 

O le isi va’a meli na sosoo mai ai, o le va’a meli lea o le Costa Lumisona mai le kamupani va’a o le Costa Cruises, lea fo’i na taunu’u mai i le vaiaso na te’a nei mo lana malaga lona lua lea i Amerika Samoa.

 

E to’a 2,712 le aofa’i o turisi na malaga mai i le va’a lona lua lea, atoa ai ma le auva’a e to’a 1,050, la na taunu’u mai i le itula e 12:00 i le aoauli ae toe tu’uva’a ese atu ma Amerika Samoa i le itula e 6:00 i le afiafi, ma ua aga’i sa’o atu nei Nuku’alofa i Tonga, o se vaega lea o lana malaga o lo o fa’aauau mo le toe fo’i atu i le aai o Savona i Italia.

 

Na matua pisi solo vaega eseese o le alatele i le taulaga i Fagatogo i le to’atele o turisi na tafafao solo ai, ae o le isi vaega to’atele sa la’u i pasi ma fa’ata’amilo solo i vaega eseese o le atunu’u, ae o isi i taxi la’upasese ma malaga solo ai i vaega eseese o le atunu’u o lo o fia maimoa ai.

 

O ni isi o turisi sa maua le avanoa latou te molimauina ai le Fa’aaliga o Galuega Taulima sa fa’atinoina i le nofoaga autu o lo o i ai le Fale Mata’aga a le atunu’u i Fagatogo, ae o isi sa malaga i vaega eseese e pei o le maketi, faleoloa o lo o fa’atau ai galuega taulima, fa’apea ai maimoaga i luga o pasi ma vaega eseese o le taulaga.

 

Na taua e le ali’i o Mark Saluve, 68 tausaga o lona soifua mai Italia, o se ali’i foma’i ua malolo litaea mai lana galuega sa galue ai mo le 41 tausaga e fa’apea, o le itu e pito sili ona ia fiafia ai i atumotu eseese uma o le Pasefika e aofia ai Amerika Samoa ma Samoa, e le gata e tausisi i le latou tu ma agaifanua, ae loto alolofa ma laufofoga fiafia o latou tagata.

 

“Ou te iloa o le atina’e turisi lea o lo o fai ma alagatupe tele mo ni isi o atumotu o le Pasefika, o le mafua’aga fo’i lena ou te fiafia ai e ta’amilo i atumotu o le Pasefika, ou te fiafia e talanoa ma feiloa’i i ona tagata, e fa’apena fo’i lo’u i ai i Amerika Samoa nei, ou te fiafia e mafuta ma talanoa atu i ona tagata, aemaise ai o ana meaai sa ou tofo muamua ai fo’i”, o le saunoaga lea a le susuga ia Saluve, ae molimauina lona fealua’i solo ai i totonu o le nofoaga autu o le Fale Mata’aga a le atunu’u.

 

Mo le aufaipisinisi, o le to’atele o le au ave pasi ma taxi na maua le avanoa o le Samoa News e fesiligia ai i le vaiaso na te’a nei, sa latou taua le agaga fiafia ina ua mafai ona maua ni tupe feololo mai le feavea’iina o turisi i vaega eseese o le atunu’u.

 

Na taua e le ali’i ave taxi o Talavou Sapolu o Lauli’i e fa’apea, e silia i le $150 lana tupe na maua mai va’a meli e lua, ina ua maua le avanoa na te feavea’iina ai turisi e to’afa, lea na momoli i Vaitogi ma toe fo’i mai, ae o le isi pasese na momoli aga’i i Vatia ma toe fo’i mai.

 

“O isi nei auala o lo o mafai ai e matou nei tagata faipisinisi laiti ona maua ni nai vaega tupe e fesoasoani ai i le tau atina’eina o a matou pisinisi, tasi lava le malaga o le aso ae maua le $100, o se talosaga fo’i la i le Ofisa o Turisi, fa’amalolosi e fai auala uma e fa’atosina mai ai turisi i Amerika Samoa, ina ia mafai ai fo’i ona ola nai a matou tama’i pisinisi”, o le saunoaga lea a Sapolu.

 

Ae na taua e le ali’i ave pasi ia Mika Lealofi i le Samoa News le fa’amanuiaina o ia i le aso Faraile na te’a nei, ina ua maua ana malaga sosoo e lua mo le to’atele o turisi sa fia malaga asiasi solo i le atunu’u.

 

O ana pasese uma lava sa maua i va’a meli e lua, sa fa’ata’amilo uma lava i le itu i sisifo o le atunu’u, e aofia ai ma le mata’aga o le Laumei ma le Malie i Vaitogi.

 

“Manaia le tulaga ua i ai le atina’e o turisi i le atunu’u i le taimi nei, ou te iloa e le na o a’u le ave pasi sa fa’amanuiaina, ae sa maua fo’i fa’amanuiaga tau tupe mo isi uso ave pasi ma taxi, atoa ai ma ni isi o faleoloa sa mafai ona fa’atau ai oloa taulima a le to’atele o turisi, sa ou vaaia fo’i le fiafia o turisi e fa’atau le niu malulu, o isi ia o taumafa e tatau ona matua tele i soo se taimi e taunu’u mai ai ni isi meli i le lumana’i”, o le saunoaga lea a Lealofi.