Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

FA’AMAE’AINA LE LIKI SOKA A AOGA TULAGA MUAMUA 

O lenei tausaga aoga, sa faapea ona galulue so’otau’au ai ia le Ofisa o Aoga ma le Faalapotopotoga o Soka a Amerika Samoa (Football Federation of Amerika Samoa-FFAS), aua le fa’atautaiaina o se liki soka mo fanau aoga tulaga muamua, lea sa amataina mai ia Mati 20 se’ia tapunia ia Aperila 15, 2024.

O le malae ta’alo i Pago Pago, na faataunuuina ai liki mo a’oga uma mai i le itu i Sasa’e, ae mo a’oga i le itu i Sisifo, sa faataunuuina a latou ta’aloga i le malae ta’alo a Malisi i Malaeloa.

I se fa’aaliga fa’alauaitele mai i le vaega o DCI (Dept. of Curriculum & Instruction) a le Ofisa o Aoga, na fa’alauiloa mai ai le siamupini o le a’oga tulaga muamua a Pago Pago, i ‘au uma a alii ma tamaitai.  O le ipu mo le Ta’alo Tausa’afia, sa mauaina lea e le ‘au a le aoga tulaga muamua a Fagalii.

Fa’aalia e le Ofisa o Aoga le agaga faafetai i le Peresetene o le FFAS, le afioga Faiivae Alex Godinet faapea ma le Asosi o le Soka, aua lo latou lagolago malosi i fuafuaga a le Ofisa o Aoga.  

Sa fa’amanauiaina a’oga uma na auai i lenei liki, i le ta’i $500, o se foa’i alofa mai i le Peresetene o le FFAS.

O aoga sa auai i le liki soka o lenei tausaga, na aofia ai Tafuna, Pavaiai, Lupelele, Fagalii, Coleman (Pago), Aua, Matafao, Leatele ma Masefau.

LE AOFIA SAMOA I LISI O ATUNUU E AGAVAA MO VISA FOU I AUSETALIA

Na lipotia mai e le Samoa Observer, le le aofia o Samoa o i luga o lisi o motu o le Pasefika, e mafai ona apalai ona tagata i se visa fou e ulufale ai i totonu o Ausetalia, lea e faatagaina ai tagata faigaluega faavaitaimi ma o latou aiga, ona apalai e nonofo tumau i totonu o Ausetalia.

E na o Samoa ma Kiribati motu o le Pasefika o lo’o aofia i le polokalama o le PALM (Pacific Australia Labor Mobility), ua le agava’a ona tagatanu’u, ona toe apalai e avea ma tagata nofotumau i lalo o se polokalama ua ta’ua o le PEV (Pacific Engagement Visa).

Ae e pei ona faamanino mai e le malo o Ausetalia, e ui ina e le o toe agavaa Samoa i le PEV, ae o lo’o tatalaina pea le avanoa mo i latou o lo’o i totonu o le polokalama a le PALM, e aumai ai o latou aiga e latou te faatasi i Ausetalia.

Ua faapea foi ona tatalaina e le malo o Ausetalia le avanoa e faataga ai tagata faigaluega ua leva ona i totonu o le polokalama a le PALM, e aumai ai o latou aiga i Ausetalia, lea sa amataina i le tausaga nei, i aiga e 200.  Ae o lo’o fa’atalitali pea le amataga o lenei polokalama.

MANUMALO LE ‘AU LAKAPI A SIUMU I LE TA’ITO’AFITU A MALISI MO LE SISIGA FU’A 2024

Sa molimauina i le aso mulimuli o le liki lakapi ta’ito’afitu a le Malisi, le malolosi o ‘au sa tausinio mo le Ipu a le Kovana Lemanu faapea le tinoitupe e $13,000, lea na fa’atuina ai e le ‘au mai i le afioaga o Siumu i Samoa, ia se matati’a, ina ua o latou fa’ato’ilaloina le ‘au malosi a le Malisi lea sa puipuia le talita mai i le tausaga ua tuanai, ae o le uluai tausaga lenei ua auai mai ai le latou ‘au i fa’agatama ta’ito’afitu.

Sa na o le pau le mea na lauiloa ai le ‘au a Siumu, ona o le latou kapeteni, o le susuga ia  Siaosi Asofolau, lea na ta’alo i le ‘au lakapi ta’ito’afitu a le Manu Samoa.  Ae sa maoa’e le latou taumafaiga ina ua o latou manumalo i le latou ulua’i ta’aloga ma Malie (14-10), faapea le ‘au mai i le afioaga o ‘Iva, Savaii (33-0), ae faiaina i le Apia Maroons (12-7), i le aso muamua, ma latou sao atu ai mo le ‘Cup Quarterfinals’.

Sa le’i manatu nisi o le a mafai e Siumu ona fa’ato’ilaloina le ‘au malosi mai Moata’a, ae peitai, sa le’i tu’umamaina foi e Asofolau ma lana ‘au ia le latou sailiga ipu ma Moata’a.  Lea na i’u ai lava ina mauaina e Asofolau o le fa’ailoga o le ‘Most Valuable Player – MVP’ o le liki.