Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

 

30 FAITAUGA MALILIU I LE COVID-19 I AMERIKA SAMOA

 

Ua fa’ailoa e le Matagaluega o le Soifua Malolo, e o’o mai ia Me aso 9, ua le isi to’atasi ua maumau le soifua ona o a’afiaga o le Covid-19 ma ua atoa i ai le 30 o i latou ua maliliu ma a’afiaga o le Coronavirus. Ua le ua maliu e le’i faia ona tui puipuia. 

 

O le faitauga ua i ai nei le aofai o e ua a’afia i le Covid-19 e 5,930 i latou, peita’i ua toe malolosi le to’atele ma ua totoe nei na’o le 142 i latou o feoa’i ma le verusi i o latou tino i le atunuu.

 

I le taimi nei ua totoe le 32 o i latou o lo’o i ai pea le verusi i o latou tino, e to’a 19 mai Fitiuta ae toe to’a 13 i Ta’u o le Manu’atele. O le isi vaega o sui sa mua’i fa’amaonia suega o le Covid-19 i Manu’a ua malolosi lea.

 

Ua fa’ailoa mai fo’i i le aso Gafua lava, ina ua mae’a le tele o feoa’iga ma le pisi o aiga uma i le fa’amanatuina o le aso o Tina i lenei tausaga, na sailia ai le to’a 588 o tagata ma faia suega o le covid-19, ua fa’amaonia e na’o le 17 i latou o lo’o maua ai le verusi o le Covid-19.

 

I le taimi nei ua maea faia tui puipuia nei o le Covid-19 e le to’a 84.4% o le faitauga aofai o le atunuu, ae 66.6% ua ame’a faia o latou tui Boosters.

 

I le fa’ai’uga fo’i o le vaiaso, ua iloga ona to’atele ua tumutumu i faleoloa mo fa’atauga ua fa’apena fo’i fale’aiga ma uumi fo’i poloka o le alatele i feoaiga a le atunuu.  O se fa’aiuga ole vaiaso ua fa’aatagia ai ua tatala faasa uma o le Covid-19, ma ua vaaia fo’i le to’atele o aiga ua mafuta fa’atasi ae ua le faia ni pupuni fofoga.

 

Ua oo fo’i i sauniga lotu ua va’aia lava le to’atele ua le faia ni pupuni fofoga, e foliga mai ua manatu le to’atele ua mae’a le Covid-19.

 

FA’AMAE’A VAIASO O TAUSIMA’I I AMERIKA SAMOA

 

O le Aso Lulu i le taeao se’ia oo i le aoauli na faatulaga ai le fa’atasiga a Tausima’i uma o galulue i Amerika Samoa e fa’atautaia lea i le Malae i Faga’alu. 

 

O lea fa’atsiga sa alausu ai nisi o i latou e fa’atautaia le BBQ ma faatulaga ni ta’aloga e mafai ona fa’afiafia ai le vasega o tausima’i i le latou aso fa’apitoa faatasi ma latou aiga pe afai e manana’o i latou e avatu latou fanau ma ta’ito’alua.

 

Ua fa’ailoa mai e le tama’ita’i fa’atonu o Tausima’i uma a le LBJ Medical Center, Simamao Tuatoo, “O le toatele lava o i matou uma o tausima’i i le atunuu e matua leai se taimi avanoa e mafai ai ona faia se fa’atasiga tele e pei ona sa masani mai ai le matou Sosaiete a Tausima’i Amerika Samoa, peita’i ua taumafai lava se taimi se tasi e fa’atasia ai nisi e to’atele o avanoa, ina ia mafai tamau se fa’amaumauga, sa faia lava se matou fa’atasiga i lenei tausaga, ua fa’aopoopo mai le Covid-19 ma ua atili ai ona pisi i matou.”

 

O le aofai o nisi sa mafai ona oo ane i lea fa’atasiga e le atoa se to’a 50 ae na faia lava le mea sili e le vasega o pulega o tausima’i uma, le laulautofi o le latou Asosi, ma sa latou fa’atautaia ai le BBQ ae fa’aoo uma Ipu BBQ i tausima’i uma o lo’o tiute, ma o i latou fo’i o lo ua avanoa ae o lo’o malolo, ina ia ui ane e piki latou tausami ma toe o e faigaluega.

 

O se va’aiga lea i le taumafaiga lava ina so’o i latou uma i se mea tausami ua saunia, aua le fa’ailogaina o le latou vaiaso fa’apitoa i lenei tausaga.

 

O se isi mea e fiafia ai, aua sa fa’atasia atu ma nisi o tausima’i mai le FEMA ma le NuWest lea o lo’o fa’akonekarate e tautua i lo tatou atunuu, talu ona lutia i tatou i le Covid-19. O le tamaita’ tausimai o Lauren McGee sa malaga mai ona o le fesoasoani mai a le FEMA, ua ia fa’ailoa mai, “O a’u lea ua ou mana’o ou te nofo ma faigaluega iinei. Ua ou va’aia le mana’omia o i ai i la matou galuega fa’atino ma tiute i totonu o Amerika Samoa. O le taimi lenei ua mae’a fa’aulu la’u talosaga ina ia fa’atumauina lo’u galue ai i Amerika Samoa i le tatou falema’i LBJ Medical Center i le Potu Taofia a le ICU, lea e fa’apito augafa i ai o’u agava’a.”

 

E ese mai lea tamaitai ae o le isi to’atolu o tausima’i mai le polokalama a le NU-West ua latou fa’ailoa mai o latou lagona fiafia ona o le latou filifiliga e o mai i le tatou teritori e fesoasoani mo le tausiga lelei o tatou tagata i le vaitau lenei o le Covid-19.

 

O i latou nei o Christe Hara, Miranda Crothers ma Anna Beth Vance. Fa’ailoa mai o Christe, “O outou lea e nonofo i le Parataiso, o le tau e Summer fa’asoloatoa, e matua matagofie le tou aganuu ma e fa’aaloalo tagata. E foliga mai e le tele fo’i ni fevesia’iga tau soligatulafono o lutia tele ai tagata ma e fiafia tagata uma ma fa’amasani gofie i latou. Afai ae oo mai le aso e uma ai le matou konekarate, ou te lagona e to’atele i matou e fia toe fo’i mai e tautua iinei.”

 

O lo ua va’aia le galulue fa’atasi o nei tamaitai tausima’i mai fafo ma le to’atele o tatou tausima’i na aoaoina ma soifua a’e iinei. O lo ua i ai le latou so’otaga i le galuega o lo’o latou fa’atinoa fa’atasi, o le tausia lelei lea o tatou tagata ua fa’agasegasea.

 

Ina ua toe maua se avanoa ma le Fa’atonu o Tausima’i, sa fesiligia ai Simamao Tuatoo pe o latou va’ai i tausima’i nei mo se fesoasoani e fa’alava ai latou tausima’i tumau iinei, “O lo ua tuu ia i latou le faitalia. O lea ua oo mai ma matou faigaluega faatasi, ua latou vaaia fo’i ala ua fa’atino ai galuega e tusa o mea faigaluega ma le to’agaogao o i matou o tausima’i i le tatou teritori. Afai e lagona e i latou se vala’au ina ia fa’atasi ma i matou i lenei taumafaiga, o se fiafiaga lea ia i matou uma o uso tausima’i Samoa.”

 

$17.8 MILIONA MO LE GALUEGA FA’ATINO MALAEVA’ALELE

 

Ua faaloa mai e le tatou Faipule i le Konekeresi ua mae’a fa’atulaga le toina mai foi o le $17.8 million mo galuega o le tatou malaeva’alele tele Tafuna International Airport, ina ia fa’aleleia atili tatou malae e sese’e ai va’alele. O le tinoitupe lea e toina mai le Matagaluega o le USDOT poo le Matagaluega o Feoa’iga a le Malo tele.

 

O lo ua fa’amalo mai le tatou Faipule i le Konekeresi Uifa’atali Aumua Amata i le susuga le Fa’atonu o Uafu ma Malaeva’alele i le tatou malo, Christopher King ma le aufaigaluega i “Lo latou sogasoga ma lo latou fa’ataunuu o tiute uma na mafai ai ona maua mai lea seleni tele mo le fa’aleleiga o alasese’e o va’alele i le tatou malae va’alele.”

 

O le fa’aaogaina o lea seleni tele ua toina mai o le a tuu lea i le faitalia a le tatou matagaluega, ae mautinoa lava o le seleni mo le fa’aleleia o alasese’e o va’alele i o tatou malaeva’alele.

 

O le aotelega o le tinoitupe o le poloketi lea sa mafua ai ona talosagaina lea seleni e le Matagaluega o Uafu ma Malaeva’alele na pasia lelei lea ia Mati 2022 e le konekeresi ma o lea ua fa’aulu atu i lea matagaluega e fa’ataunuu ai le galuega.

 

Fa’afetaia e Uifa’atali le Matagaluega o le DOT aua o lea o le a fa’auia uma ane e i latou nisi o fa’amaumauga moomia mo lea poloketi, ae ua ia manatu ina ia fa’afetaia e le Failautusi o le DOT Pete Buttigieg ma le Administrator o le FAA Steve Dickson, mo lea fesoasoani tele ua toina mai mo Amerika Samoa. “E mautinoa o le a fa’aaoga tatau e Amerika Samoa lenei fesoasoani e fa’aleleia atili ai matou malae sese’e  o le Malaeva’alele Fa’avaomalo i Tafuna.”

 

“O se fa’amautinoa a’ia’i fo’i lea ua gafatia ona mautu le saogalemu o le tulaueleele o va’alele tetele e femalaga’iga i le va o Amerika Samoa ma isi uma atunuu o le lalolagi, ae maise lava o le va ma Honolulu Hawaii lea e matua iloga ona tumutumu va’alele e malaga atu ma tu’ua fo’i le matou teritori.”