Ads by Google Ads by Google

TALA I VAIFANUA


Le taitai o le autalavou Sieni Ah To ma le fa’atama o le Autalavou, Peniamina Siatunuu ua la’ua taua’aoina aloaia le fa’ailoga togisilia i le amio tausa’afia, loto fesoasoani ma le amio lelei i le tamaitai o Tausala Iefata i le vaiaso atoa o le Tolauapi 2021 a le SISDAC-AS - Ottoville Center. [ata: Leua Aiono Frost]

Pago Pago, AMERIKA SAMOA

 

TOLAUAPI AUTALAVOU SISDAC AMERIKA SAMOA – MO LE VAIASO ATOA

 

Mai ia Iulai 11 se’ia pa’ia Iulai 18, 2021 na fa’ataunuu ai le Tolauapi a le Autalavou a le Ekalesia Aso Fitu Samoa Tuto’atasi (SISDAC) i le latou  Lotoa Tutotonu i Ottoville ma sa tele se aoga o le Tolauapi ma ona polokalama na fa’agasolo ai i le latou autalavou, ma le ekalesia atoa. Na moe tasi uma le autalavou aua sa aoga ia i latou aoaoga fa’apitoa o le iloa lelei ona soifua i le vaomatua pe afai ae se ai, o ituaiga o aoaoga fa’apitoa mo le fanau, e fa’atulaga i vaitau o talavou, e tatau ona silafia.

 

E alafa’i  i taeao taitasi i le faia o fa’amalositino eseese, ae fa’aiu i le po o aso ta’itasi i ta’aloga Volleyball e faia lava i totonu o le latou faletaalo, o le fa’ato’a fa’aaogaina lea o le latou faleta’alo ua atoa le 4 tausaga talu ona mae’a fausia. Mai le fa fo’i lenei o tausaga ua faato’a toe tolauapi lea o le Autalavou a lea Ekalesia.

 

E pei lava o so’o se mafutaga fa’apea e ao ina mautinoa e le Autalavou, o taimi uma lava, o lo’o sailia ma va’ava’aia toto’a i latou uma e le Komiti po’o le Laulauatofi a le Autalavou a lea Ekalesia, ina ia sailia nisi e lautogia mo latou fa’ailoga fa’apitoa i le mae’a ai o le Tolauapi 2021.

 

Ua va’aia le suia o le to’atele o le autalavou. Ua mafai ona soofaatasi o latou agaga i tiute fa’aautalavou e ao ina fa’atino i totonu o le Ekalesia i ana sauniga fa’atasi e faia. Ua talia le tele o a latou fa’afesili e tusa o le amio fa’akerisiano e tatau ona ausia e i latou ona ola ai, o le tele lava o nei amioga e masani ona va’aia e i latou ma fia fa’ata’ita’ia a’o talavou i latou.

 

O se tasi o tautalaga fa’apitoa lava sa nafa ma le vasega o taitai fa’apitoa o lea ekalesia, le vasega o Failauga. sa talanoaina ai le tulaga o le Pule i le Soifua. Aisea e tupu ai, aisea ua avea ai ma mea suamalie i le vaitaimi nei, ma ua fa’afesiligia, poo le a se tala mai le Tusi Pa’ia i se tasi e pule i le soifua?

 

E mafua ona tupu lea tulaga, ona ua fete’ena’i lagona o le talavou ma lagona o se tasi o la’ua uo poo matua fo’i i totonu o le mafutaga sa ola feso’ota’i ai. Ua manatu ane le sui ua faia lea tulaga, ua leai se mea nate filifilia e fa’atalitonu ai lana pa’aga faauo poo ona matua, ua na’o le pau lea.

 

“I le soifuaga o le talavou Kerisiano, e te le va’ai atu i le a’oa’iga a ou matua o se mea leaga, ae o se fa’amanuiaga, aua o lo ua fa’ailoa mai ia te oe, e tele se manuia o lo’o mulimuli mai ia te oe, pe afai o le a soifua usiusita’i i fa’atonuga a Matua, tusa poo se mea e faigata ona e fa’atinoa, ia e usita’i i ai, e te maua ai manuia. O lou taumafai e fa’ailoa atu i lau pa’aga lou alofa naunau ia te ia, e le o se mea lelei. E tatau ona e mua’I alofa naunau ai i le Atua nai lo lau uo tamaitai poo lau uo tama. Ua iloa ai lou vaivai, pe e le o lava le malosi o lou mafaufau e taofiofi ai le so’ona alofa fa’avalea, ua latalata tele ai lou alofa lena, i le tulaga o le tu’inanau sese, e le o se alofa moni lea. E muamua i le lisi a le autalavou Kerisiano, ona e matua alofa i lou Atua, aua o lou Fa’aola o Iesu, foa’i lona ola e sui ai ana Uo. E leai la se alofa e sili atu i lo lea alofa. Mafuaga lea ua fa’ailoa mai ai e le Tusi Pa’ia, pe a matua le tuinanau, ona fanau mai ai lea o le Oti. O le oti fa’alua lea, pe a mavae lenei ola, ua le toe mafai e oe le talavou, ona fa’amagaloina e le Maliu o Iesu lau agasala, ona ua e pule i le Soifua a le Atua, na foa’i mai lona manava ola, tatou te ola ai i lenei olaga. Ia e fa’aaoga tatau lou avanoa e te soifua ai, ma e faia ai galuega lelei, mo isi, ae le mo na’o o oe lava!”

 

“Ia outou ola feso’ota’i ma ia fa’amautu ai lou agaga feso’ota’I lelei ma isi. Aua ete mana’o fa’apito na’o o oe ou fa’anaunauga, ae ia e silafia, e ao ina e foa’I atu au mea pe a tele. Ia e alofa fa’asalafa i tagata uma, ae silisili ona e alofaina ou matua, ava ia i la’ua, aua ua fa’atulafonoina e le Atua lou ava ma alofa i ou matua. E matua tiga ou matua na tausia oe, pe a oo ina e sola ese mai le mafutaga, ona ua e fa’asili lou alofa i se teine poo se tama nai lo la’ua. Ua galo ia te oe le tausiga a ou matua mai le amataga ona afuafua oe i le manava? ”

 

“Afai e te ava i ou matua, e te naunauta’i e te usita’i i le la’ua fa’atonuga, e te taumafai e fa’afiafia i la’ua pe a fa’anoanoa, e te fia fa’asoaina o la’ua tiga, ona e le faigofie ona fa’atino le la’ua tausiga o outou uma le fanau. Ia e le manatu fa’apitoa ma e fia maua na’o mea lelei. O le olaga e tele mea tiga e ootia ai lagona. Fa’amasani e ola ma mea tiga, e te le toe ila ai i ni omiga o le olaga matua. Ua masani ma le tiga e pei o Keriso. O lou ola fa’anoanoa e liua i le fiafia, ae o le ola fiafia e liua i le fa’anoanoa, aua e leai se me e tumau i le olaga atoa lenei. E mafuta nei ae mavae a taeao.”

 

“Afai ete pule i le soifua on aua maasiasi ua tia’i oe e le tamaitai poo se alii talavou, o ai e pule i lou soifua? O oe poo lou Atua? E toe aumaia e le Atua se isi tamaitai e sili atu lona lalelei ma amio lelei mo oe pe a onosa’ia na tiga o le alofa mitimiti, ae suamalie le isi mafutaga o le a e aga atu i ai. Aua ete manatu fa’apito i lou alofa, afai fo’i o otegia le teine latou e ona matua e tuu le faigauo, e tatau ona usita’i le tamaitai poo le taulealea i ona matua, nai lo oe le uo, aua e ala mai ai lua manuia, i le ava i matua ma le fa’atonuga o latou aumaia. Fa’amuamua le Atua, ona fa’amuamua fo’i lea e le Atua o oe i manuia.”

 

“E lasi avanoa ua tuuina mai e le Atua mo oe, ma lona fa’amoemoe e te maua le ola e fa’avavau. O le afuaga lea o le Togiola na saunia lelei e le Atua mo i tatou uma. Ina ia saofaga i tatou uma i le ola e fa’avavau.Afai e te pule i le soifua, e leai se Togiola e toe lava mo lea agasala i le fa’amasinoga a le Atua. O se tasi o agasala e le fa’amagaloina.”

 

O se fa’asoa e aoga mo le fofoga faitau o le atunuu. O nisi o tupulaga e le o mafai ona mautu lo latou silafia i le iuga o lea solitulafono i luma o le Atua na ia aumaia le ola. E aoga le utuvai i magavai e tele e fa’alautele ai le silafia i so’o se mea o lenei olaga, ia e matua suesue ma sailiili, e foa’i mai e le Atua lona atamai.

 

I le toe fa’aiuga o le vaiaso o le tolauapi, sa faia ai le sauniga e ta’ita’ia fa’apitoa e le Au Ofisa o le Autalavou a le matagaluega SISDAC i Amerika Samoa, ma ua toe vala’auina ai le autalavou, ina ia fa’afouina le mafutaga ma le Atua, ina ua atoa le vaiaso o toe fafagaina lo latou soifua auauna i le Atua e ala i aoaoga o le amio fa’akerisiano e tatau mo le Talavou mo Iesu.

 

O le ulua’i aso ina ua mavae le Sapati na toe poto ai le Matagaluega atoa ma latou sapaia le toe aso o le mafutaga i se ‘aiga tele. O toe tima’iga fa’aleagaga, aua o le a amatalia fo’i le tausaga a’oga fou, e tele fo’i luiga o le a feagai ma talavou, aua o le a feiloa’i ma uo e to’atele i le aso e tasi i a’oga, e tele fo’i fa’aosoosoga o so’o se ituaiga o le a feagai ma i latou e ala i le amio, fefa’auoga ma le soifua taumafai ina ia aoaoina lelei.

 

“A oo mai mea na, ia e manatua le a’oaiga a lout ama ma lou tina, aua nei galo le upu a lou tama fa’aleagaga ua tuuina atu, e te manuia ai. Savali ile ala, o le ala vaiti, e le to’atele fo’i nisi e uia, ae tau atu i le manuia.” Ina ua mae’a le aiga tele, sa toe tuuina i lalo fu’a na sisia mai le amataga o le tolauapi, e fa’amau fa’ailoga, ua mae’a le fa’atasiga a le autalavou i lenei tausaga. Na tumuli mea uma i le latou fa’atasiga ae se’i fa’ao’o mai le fa’afetai a le Laulauafono a le Autalavou ma o iina sa fa’ailoa mai ai loa I la’ua ua ausia fa’ailoga o le talavou sili ona amio pulea ma fa’ailoa le soifua naunau e soofa’atasi ma isi uma, ma ola fesoasoani. O le sui na tulaga lua i le Tolauapi 2021 na maua lea e Meliko Mafi Tuipulotu mai Aoloau, ae o le fa’ailoga tumati’e i le amio lelei, ola fesoasoani, fiafia e mafuta fa’atasi ma amio tausa’afia na maua lea e le tamaitai o Tausala Iefata mai le afio’aga o Aua.

 

O ta’aloga Volleyball i le Hall tele i Ottoville a le Ekalesia na fa’aiu ai mea uma o le aso ma le Tolaupi 2021. E le’I fa’atauva nei ta’aloga, ma ua leai fo’I ni fa’ailoga faapitoa na saunia mo ‘au, ae o le togi o la fa’atamasoali’i, “Ia e iloa ta’a’alo fa’atasi ma soifua soofa’atasi ma isi, ave’esea ai lagona fa’apito.”

 

LE TOE NOFOVA’AVA’AIA MO ASO E TOLU SUI MALAGA MAI SAMOA

 

O i latou uma e malaga mai Samoa, e le o toe mana’omia ona nofova’ava’aia mo le tolu o aso. Ae peita’i, ua nofova’ava’aia mo le 24 itula pe o le a se va’aiga lautele ia i latou pe o atagia mai ai foliga o le sui ua a’afia i le Covid-19, ona tu’ua loa lea o i latou e o i o latou aiga.

 

O se tusi fa’alauiloa na tuuina mai e le Komiti Fa’afoe o le Covid-19, ua fa’ailoa mai ai, ona o Samoa o loo o gatasi lava ma Amerika Samoa e le o a’afia uma i le fa’ama’ o le Coronavirus, e oo mai i le taimi nei.

 

Peita’I, e mana’omia lava ona talosaga mai uma sui e fia malaga mai ma malaga atu i Samoa, i  luga o le Uepesite a le Matagaluega o le Soifua Maloloina a le tatou nei malo.

 

E i ai lava foi ma pepa fa’atumu e manaomia ona fa’atumu lelei, ma ia mautinoa ua fa’amauina ma lau kopi o lou pepa tui e fa’ailoa ai ua mae’a faia lou tui puipuia o le Covid-19. Ia i ai ma le fa’ailo, ua mae’a faia lau suega o le Covid-19 ma o lo ua kilia mai oe.

 

O sui uma e feamalagai e uia ai Samoa ae fia oo mai I Amerika Samoa e tatau ona nofo va’ava’aia i Samoa mo le 14 aso ona fa’ato’a malaga mai ai lea.

 

O le mafuaga ua faia ai lea tulaga, on aua i ai nei nisi o lo’o malaga mai fafo e uia ai Samoa ae fa’amoemoe e malaga mai i Amerika Samoa, ae o lo’o malaga mai i atunuu ua mae’a i ai le fa’ama’i o le Covid-19. O malo nei e aofia ai Ausetalia ma Niu Sila poo Fiti fo’I lea ua a’asa ai le fa’ama’i lenei.

 

E tusa ai ma fa’asalalauga a le Komiti Fa’afoe o le covid-19 lea sa faia i le aso Gafua Iulai 19, ua fa’ailoa ai,” O le 24 itula lea e nofo va’ava’aia ai sui nei mai Samoa i nofoaga fa’apitoa ACF, e faia ai siakiga o e malaga mai, mafai ona tuia ai sui  malaga mai Samoa ma toe siakia lelei o latou tui fa’ato’a tuua ai e alu i lona aiga.”