Pago Pago, AMERIKA SAMOA

MAE’A FONOTAGA & KOALSI FALELUANUU - TAPENA AOAOGA TAUA’AO AI TUSIPASI

Ua mae’a le aoaoga fa’atasi ai ma le fa’atula’ia o le Laulauafono a le Koalisi galulue a le Faleluanuu ina ia taumafai e taofiofia mai le Tupulaga talavou mai le tagofia o le sikaleti ae maise o le maua lea i le Ma’i Suka. O nei lava auau e fa’amoemoe ina ia fa’aauau nei e le Koalisi ua tofia lelei e le Faleluanuu, ia mautu le fa’amoemoe, ia fa’aititia le aotelega o latou tagata e maua i le ma’i suka, ma fa’aititia lava le aofai o e tagofia le sikaleti, e fa’aitiitia ai le aofai o e maua i ma’i tumau faigata e aofia ai le Ma’i Fatu, Kanesa o so’o se ituaiga, le soona mamafa o le tino, ma le fa’aleagaina o le mama mai le asu o le tapa’a.

Ona o le vaiaso atoa sa galulue fa’atasi ai sui o le DOH Tobacco Diabetes ma le Faleluanuu e fa’amautu le latou Laulautofi mo le fa’afoega o le Latou Koalsi mo le Tobacco/Diabetes, ua mae’a fono nei i latou ma fa’atulaga le latou polokalama e tata’i i ai latou fa’atasiga ua fuafua mo le lumana’i.

O le tausaga e 2018 na mua’i o mai ai le Koalisi Aoao i Tutuila ma latou fa’atautaia a’oa’oga fa’apitoa tau auala e mafai ai ona soifua le tagata ma gafataulima lona lava ma’i tumau ua maua ai, e aofia ai le Ma’i Suka, le ma’i Kanesa, le Ma’i Fatu, le Toto Maualuga ma isi. O lona uiga o lo’o i ai pea sui ua mae’a uma tusi pasi nei, o le fa’amoemoe tele lena o le Koalisi fou lenei, e mafai ona latou fa’atautaia lea lava ituaiga o a’oa’oga mo le Koalisi a le Faleluanuu, i le masina o Mati lea ua fa’atulaga ai nei.

O latou faia’oga e aofia ai le susuga le Faife’au Toeaina EFKAS i le afio’aga o Olosega, fa’apea ai ma le faletua o Olaipaolo Eseta Malaepule - Papalii, ma le tamatai tausima’i pasi o lo’o galue ai nei i le Matagaluega o le Soifua Maloloina  Ofu ma Olosega, Palefuiono Clint Ilaoa.

I le latou fonotaga ua maea faatulaga ai ina ia fa’atula’ia le latou laina mo fesoaosoani i le mamalu o talavou e mafai ona vala’au ane ai i so’o se sui o le Koalisi pe a oo ina omia tele o latou lagona ma ua tiga ai i latou. O le fa’asoa atu a nisi o sui nei o le Koalisi lea, o le a avea ma se fesoasoani sili e maua e le fanau talavou e fesoasoani i a latou fa’aiuga fai, ma maua ai pea le fiafia e soifua i le malu o latou aiga ma le mafutaga ma e ua pele i le olaga.

Pe afai e mae’a le fa’atasiga ia Mati 2021 a le Koalisi lea,  o lo ua fuafua nei la e faia le fa’atasiga tele a tupulaga talavou e una’ia ai le mau autu, “Fa’amalosi’au e Taofia le Tupulaga mai le Tagofia o le Sikaleti ma le A’afia i le Ma’i Suka a’o le’i oo i le 2025”

O lo ua fa’atulaga e tolu aso o lea mafutaga fa’atasi uma a le autalavou, e afua mai le 8 tausaga se’ia pa’ia le vasega o Ulugali’i talavou. O ekalesia uma e fa i totonu o le Faleluanuu ua aofia i lenei manulauti ma le galuega tima’i mo le fanau talavou.

Ua iloga mai le agaga o lea Koalisi a le Siklaleti ma le Ma’i Suka, ina ia faia le galuega tele lea mo tupulaga ina ia taofiofi mai le ma’i suka ma le tagofia o le tapa’a. 

“O le tulaga ua matou agaga tele ai i lenei taumafaiga, ona ua iloga mai ua to’atasi se tasi o matou talavou ua maumau le soifua ona o le pule i le soifua. Ua ia te’i matou fo’i le agaga e le toe oo fa’alua i matou i lea tulaga, ae sili ona gaoioi loa i matou, ao maua le fesoasoani mai a le Koalisi Autu a le tatou atunuu i Tutuila mo le fa’atinoga o le faamoemoe. O le tele o aoaoga ma mea ua folasia e taofiofi mai ai le tupulaga ia le faia mea sese nei, o se alamanuia sili lea ua matou maua fa’atasi, ma ua agaga fa’atasi i matou uma o faife’au galulue, ia fa’atino loa,” o se tala lea a le sui Taitaifono o le Koalisi fou a le Faleluanuu, Rev. Elder Lamese Fa’afili.

O le laulauafono ua tula’i mai ai le tina o Tala’u’ula Masoe Tuiolosega e avea ma Taitaifono, o Rev. Elder Lamese Fa’afili e avea ma Sui Taitaifono, o le Failautusi o Rev. Solomona Ierome Ta’i’i, Teutupe o le faletua o Palefuiono Clint Ilaoa. Peita’i o sui galulue o le Koalisi ua tula’i mai ai i latou uma ua mae’a maua tusi pasi mai le aoaoga fa’apitoa i le tausaga 2018 e aofia ai Olaipaolo Eseta Papali’i,  ma isi, le faletua o Senira Ta’i’i, o sui o e faigaluega mai le matagaluega o A’oga, sui o le Matagaluega o Galuega Lautele, Sui o le ASEPA i le Faleluanuu, sui o le Matagaluega o le Homeland Security, Sui o le ASPA ma le Sui o le ASTCA o loo galulue i Ofu ma Olosega i lenei vaitaimi.

Na maea le fonotaga ina ua mae’a fa’amalamalama uma tulafono ua fa’amamaluina nei i Amerika Samoa atoa e tusa o le Ulaula tapa’a i nofoaga faitele ma a’oga a le fanau talavou, fa’atasi ai ma luga o pasi ma taavale laiti, ae maise o nofoaga e faia ai saunga tetele ma fa’aatasiga i ta’aloga tau Bingo ma ta’aloga a le fanau talavou.

Ua fa’amanino atili fo’i suiga ma toe teuteuga o lenei tulafono ua i ai lea i luga o le laulau a le Kovana e afua ma lava i le taimi o Kovana Lolo Moliga, ma o le a toe una’ia atu nei ina ia faia i ai se fa’aiuga a Kovana Lemanu P. Mauga i lana nofoaiga fou. 

O nei suiga ua aofia ai le E-Sikaleti ma le fa’amalosia o le tulafono o le fa’asa le ulaula i nofoaga e le o malupuipuia i ni pa po’o puipui o fale. Ua fa’atulaga ai ma le mamao e 50futu le mamao e tatau ai ona ulaula se tasi mai le nofoaga o fa’apotopoto ai nisi e to’atele.

TASI FA’AMAONIA SUEGA MAUA I LE COVID-19 AUMALAGA SEILA I SAMOA

Ua fa’ailoa e le Fa’atonu o le Soifua Maloloina i Samoa Leausa Take Naseri, o le tulaga ua i ai pea le sui e to’atasi na fa’amaonia lana suega o lo’o maua i le Covid-19 mai le aumalaga a le au Seila ua toe fa’afo’i mai i Samoa, o lea la ua i’u lava na mae’a le taimi na nofova’ava’aia ai, ae le o maua lava e lea sui se auga lava e tasi o le Coronavirus.

“Mai lea umi talu ona faia pea suega i lenei aliiva’a, e le o va’aia ia te ia se foliga o lo’o maua i le Covid-19. E le o fiva pe i ai se suiga o le va’aiga o lona tino, o auga foi o le gasegase e le o va’aia lava ia te ia. Peta’i o loo fa’anofo esea o ia mai le isi to’atele o le aumalaga lea o seila Samoa sa tautua i le tele o atunuu eseese i le lalolagi ae maise ai o Europa.”

Ona o le toe aso le aso ananafi sa fa’atalitalia i ai se isi suiga, mo lenei aumalaga ua toe faia latou suega mulimuli ma ua tatalia lava  le oo ane o iuga o nei suega, ae ua fa’ailoa mai e nei ta’ita’i o Samoa Tuto’atasi i lana komiti fa’afoe fo’i o le Coronavirus, “Ua mautinoa ua sao fo’i le folauga a le atunuu mai lea aumalaga, e ui ina o lea ua tulai mai ua uma lava lenei 14 aso ae leai se tasi e suia mai lau vaaiga i o latou folga mai, pe vaaia ai auga o le covid-19, lea e muamua lava le  maualuga o le fiva.”

O le aso Faraile nei, ua faatulaga e oo mai ai le malaga a le va’alele togipau e tapena lava e Amerika, e fa’afo’i mai ai le to’aono o i latou o e toe tipoti mai le Iunate Setete o Amerika. Ua fa’ailoa mai e to’aono lava lea pasese, ma e aumai nei sui, ua mae’a uma lava ona faia o latou tui puipuia o le fa’ama’i Covid-19 i Amerika ma isi aiaiga uma e tatau ona faia fa’ato’a fa’afo’ia mai ai, ina ia mautinoa ai, o lo’o malutia Samoa mai le aumaia o se tasi ua maua i le gasegase.

Mai le va’alele foi e aumaia ai uta mai Niu Sila e to’afa i latou o le a malaga mai ai mai Niu Sila, o nisi o Seila e toatolu ma le Faiaoga e to’atasi sa le o mai i le aumalaga lea ua toeititi lava mae’a le latou nofova’ava’aia, ona o i latou sa maua muamua i le Coronavirus. Sa toe taofia lava e nofova’ava’aia atoa lelei le 14 aso i Niu Sila faato’a toe o mai ai. Lea la ua kilia i latou ma ua agava’a ai ona malaga mai le va’alele o le Cargo, ma e ese fo’i le nofoaga o le a nofova’ava’aia ai i latou e tulia ai le latou 14 aso pe a to’ai taunuu mai.