Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

FA’ALAUILOA – JUSTIN TUIASOSOPO – CEO O LE BLUESKY COMMUNICATIONS:

Ua fa’ailuailoa mai e le Kamupani o le ASTTelecom LLC lea e fa’aigoaina i le tatou malo, Bluesky Communications, le suiga o le pulega ua i ai nei i le latou foi tautua. Ma ua avea nei se tasi o alo o le atunuu, Justin Tuiasosopo e fai ma Pule Sili po o le CEO o le Bluesky.

O Tuiasosopo sa avea ma Teutupe a le Bluesky, ae ua amatalia nei lona tofiga fou ia Ianuari 15, 2021.

Fa’ailoa mai e se tasi o le Komiti fa’afoe a le Bluesky, Ivan Fong, “Ua iloga le fiafia ma le naunau o Justin e galue ma filiga mo se leleiga o le Kamupani ma pisinisi fa’afoe a le Bluesky, ma ua talafeagai lelei le siitia fo’i o lona tulaga e galue mai ai i le pulega. Ua tele fo’i lona agava’a e iloga mai i le mautu o ana fuafuaga ma galuega fa’atino i taimi e fesuia’i ai aluga o lenei fo’i ituaiga o matata.”

“E iloga fo’i le agava’a o lea atalii o le atunuu, i lona gafatia ona fa’amaea mai o galuega i le taimi e tatau ai, ae ua iloga lona naunau e tautua ona tagatanuu ae maise o tautua eseese e mana’omia ma aoga e patino i tagata lautele.”

O Tuiasosopo o se tasi na soifua a’e ma amatalia ana aoaoga mai le Manu’atele, mae’a le a’oga maualuga i Tafuna ma fa’asolo atu i le tatou Kolisi Tuufa’atasi.

O lona faailoga MBA i le Suetusi ma Tausitusi mai Chaminade University i Hawaii, lea sa ia fa’aaogaina tatau mo le sailiga o ana galuega Tausitusi i Kamupani tetele e pei o le Enterprise Holdings i Sacramento ma le Orange County, Kalefonia ona fa’ato’a taliu mai lea i Samoa.

Ua fa’ailoa mai le agaga fiafia o Justin Tuiasosopo ma na saunoa mai, “O le tatou Kamupani nei a le Bluesky o lo’o aluga lelei tele ana fefa’atauaiga ma o se vaega tele o le maketi mo i latou o nai o tatou tagata lava i Amerika Samoa nei. Ua fa’apea foi ona agaga le Bluesky e avea ma se kaupani e toe foa’i atu mo le atunuu i ala eseese e pei ona amatalia mai i le tausaga e 1999.”

“E avatu le fa’afetai mo le avanoa ua mau fa’atuatuaina ai a’u e le Komiti Fa’afoe ou te tautua ai o le Pule o le Bluesky i Amerika Samoa nei. O le a taumafai e galulue fa’atasi, fefa’asoai i mea e lelei ai le galuega ma ia tautuaina le atunuu atoa ma le agaga fa’aaloalo ma le fiafia. O le mataituina fo’i me e aoga ai i a matou pa’aga ma fa’alautele atili le tautua ia tupu ma olaola lelei le taumafaiga, ma ia avatu i tau fo’i e gafatia ma le tamaoaiga tausi o le mamalu lautele o le atunuu.”

O lo ua suia nei e Tuiasosopo le ali’i pule sa tautua mai i lea tofiga talu le tausaga e 2017, o Raj Deo. 

FOA’I A LE KALAPU LIONA – FA’ALELEIA ATILI LE POTU TALAVAI MO FANAU ITI

O Ianuari 11, 2021 na fa’ailoa mai ai le fiafia tele o foma’I ma tausima’i galulue o le potu o talavai a le fanauiti I le falema’I tele i Faga’alu, LBJ Medical Center, ona o se galuega matagofie a le Kalapu agalelei a le Liona. 

“O le ulufale mai i lea taeao o le fanau, ua foliga mai o lo’o masani lelei i latou i nei mea uma ua valia ma fa’amatagofie ai puipui o le latou potu talavai. E o tagotago i ata ma ua tusitusi i ai latou lima ae maise lava i le tamaitai toa o Moana.” O se tala lea a le tina matua tausima’i o lo’o ua tiute i lea potu o talavai a le fanau.

Na saunoa se tasi o sui o lea Kalapu, Rep Larry Sanitoa, “O le agaga moni lava lea na filifili ai sui mamalu o le Liona, ae maise lava o tina ma tamaitai talavou, ina ia tusia ai ata nei. Aua o ata na e fiafia ma fa’amama’i i ai fanau e fia maimoa ai i le tele o taimi, e amata mai lava a’o laiti. O le agaga ia fa’anofo filemu o latou lagona ootia i le tiga o tui ma le fa’ainumaga o vai a le au foma’i ma tausima’i e faia ia i latou. Ae le o se mea leaga le faia o latou tuiga ma togafitiga, ae tau lava ina avea i latou ma Maui.”

 “O le faamoemoe lenei e mananao lava le Kalapu a le Liona ina ia fa’aauau le galuega fa’atino a i latou mo le Falema’i tele a le atunuu. E masani ona faia le poloketi o Mata Tioata Faitau Tusi poo Va’aiga a le atunuu, peita’i o lea ua i ai le fuafuaga e le taunuu, ona o le taofiga o femalaga’iga i le taimi nei talu le Covid-19. Peitai ua faliu nei i latou ma ua fa’auia le tautua e ala i lea fo’i galuega ua tino mai mo le fanauiti o le lumana’i lava o le atunuu.” O se tala lea a Tafa Tua – Tupuola.

“Ina ua amata ona valia ata nei, sa manatu ina ia valia i lanu e fiafia ma atagia ai le gaga fa’agae’etia o le fanau pe maimoa i ai. Mana’omia ona fa’aofi le lagona matagofie o le auai i totonu o le ata fa’asolo o loo fiafia tele i ai latou e maimoa ai i televise.”

O lenei poloketi na galulue faatasi ai totino o le Kalapu Liona ma Dr. Maria gayapa ma le vaega Inisinia a le LBJ.

I le taimi nei ua toe suia nei le taimi e fa’ataunuu ai le poloketi o Va’aiga a le Atunuu, fa’atasi ai ma le Talavai o Nifo e faataunuu ia Iulai 26-30, 2021.

FILIFILIA SE ALO AMERIKA SAMOA MA FA’AMASINO O LE KING COUNTY SETETE O UASIGITONE:

O le susuga le ali’i Fa’amasino Fa’amomoi Masaniai ua mae’a lisia mai lona suafa o le a fa’atauto I le tofiga Fa’amasino I le King County o le Setete o Washington.

Ua fa’ailoa fo’i le agaga fa’afetai o aiga ma ua fa’amanuia atu ia te ia ma le to’alua, Polu Masaniai.

O lo ua fa’ailoa mai, o se alo muamua fo’i lenei o Amerika Samoa ua tofia ma ausia le tomai e galue ai i lea setete i nei tofiga tau Fa’amasino.

O se tala mai ia Fa’amomoi ma Polu Masaniai, “E muamua lava sii a’e le fa’afetai i le fa’amaoni ma le alofa tunoa o le Atua, e leai lava se mea e mafai ona tino mai pe a aunoa ma le fa’atasi mai o le Tama i le Lagi i le taumafaiga. O le fa’amalosi ma le sapaia o le fa’amoemoe e ala i talosaga, e fa’afetai atu ai i o ma’ua aiga. E lagona le mafanafana o talosaga si’itia ma ua oo ai ina taunuu le fa’amoemoe. Fa’afetai tele i o ma’ua aiga, Matua ae maise matua faaleagaga i Amerika Samoa.”

SAPAIA KOVANA LEMANU MAUGA – IA LELEI PUIPUIA LE ATUNUU, SOSO’O LE NOFOVA’AVA’AIA I HAWAII:

“Ou te sapaia atoatoa le taumafaiga ina ia le ulufale mai le Coronavirus I le atunuu, po o le a lava le tapenaga e tatau ona fa’atino ina ia le oo mai le fa’ama’i Covid-19 i le atunuu, e ao lava ina faia. Ou te fa’alogo fo’i i fautuaga mai Komiti Fa’afoe e lua ua mae’a fa’atulaga, le komiti i Honolulu fa’apea ma le tatou Komiti Fa’afoe i le tatou nei malo.”

O se saunoaga lea a le kovana i sa latou fonotaga ma le Komiti fa’afoe o le Covid-19, ona ua fa’ailoa mai nei e foma’i o le Komiti Fa’afoe a le Covid-19 le tatau lava ona fa’aatoa pea le 14 aso e nofo va’ava’aia ai le pasese a le ulua’i va’alele e toe fa’afoi mai ai tagata o opea i fafo, talu ai le fa’asa.

Ua toe fautua mai fo’i Kovana Lemanu i le mamalu o le atunuu, “Ia tatou talosia lenei fa’amoemoe, ua fia aumaia o tatou pelega, ae le mafai ona faigofie le popole fo’i i le lautele o le atunuu i ulufale mai ai ma le fa’ama’i, e ao la ina tatou onosa’i ma fa’atino uma galuega ina ia mautinoa e le o tatou malaga mai ma le fa’ama’i ma a’afia ai le to’atele o tatou tagata.”

“Ua fautuaina ina ia toe nonofo va’ava’aia le pasese mo le isi lua aso, ua toe tolopo atu ai le malaga i tua ia Fepuari 01, 2021. E tatau lava ona mautinoa le saogalemu, tatpou usita’i i foma’i.”

O le tala mai, “Ona o le to’atele o i latou nei e malaga mai, e le o na’o e sa nonofo I Hawaii, ae o nisi sa malaga mai isi setete o le Malo tele, ma ua tatau ai ona sailiili lelei e ala i suega e faatautaia fa’atolu ma latou aso e nonofo ai ma mita’I lelei i le nofoaga e malupuipuia ai i Honolulu lea sa fa’apea e na’o le 10 aso, tuu mai lea i le 12 aso, ae ua toe fautuaina e fa’aatoa pea le 14 aso, lea la ua toe tolopo ai le malaga ia Fepuari 01, 2021.”

“Ua le gata ai la i lenei taumafaiga le tatou vaega e fai, ia manatua o i tatou fo’i iinei, ia matua nofouta. Ia mautinoa ua fa’aaogaina tatou pupuni fofoga, fa’avavamamao ma tatou pelega e malaga mai, fa’alogo i fautuaga mai foma’i pe a oo ina fautuaina outou i nofoaga o lo’o fa’atulaga e fa’atalitalia ai tuiga puipuia mo le Coronavirus. O na fautuaga uma ua faia ina ia mautinoa lo tatou saogalemu atoatoa.Fai lou tui puipuia ma ia taofiofia mai le fia feiloa’i ma outou pelega se’ia mae’a lelei taimi atofa mo le nofova’ava’aia ai i lo latou to’ai taunuu mai.”

Ina ia atoatoa lava le auaunaga a le Komiti fa’afoe o le Covid-19, ua toe fa’alauiloa mai ai le isi sui fou ua filifilia e Kovana Lemanu Mauga, o Lydia Faleafine o le Matagaluega o le Initeria a le Malo Tele. O ia lea e gafa ma mataupu uma fa’alotoifale a lea matagaluega.