Pago Pago, AMERIKA SAMOA

TO’AFA LE FANAU TALAVOU MAUMAU OLA I LE PULE ILE OLA – 2 VAIASO

E to’afa le fanau talavou ua maumau o latou soifua ina ua pule i le ola i totonu o le lua vaiaso talu ai. O se mea lea ua sili ona fa’anoanoa ai le agaga, aua o nei vaitau o lo’o fevesia’i tagata uma i le palota o sauni atu i ai le malo, ae ua to’atele ai ma le fanau ua iloga ona maumau le soifua. E toatolu ali’I ae toatasi le tamaitai ua oo i ai lea tulaga.  

O se tasi o alii faipisinisi ae o se ta’ita’i fo’i o le Ekalesia, o se tasi sa umi le taimi o avea ma fa’aliliu upu a le vaega o Fa’amasinoga, Tone Tamali’i, lea o lo’o fiafia e galulue ma nisi o le fanau talavou ua fa’alogoina ua ia te ia lagona o’otia matuia, sa ia fa’ailoa mai lona agaga alofa I nei aiga, ae maise o talavou ua maliliu ona ua ootia tele lagona.

“Vala’au mai, e leai se mea e faigata pe afai e tatala lou loto ina ia fa’asoa atu i se isi, e maua lava le fesoasoani i so’o se taimi. Aua nei punitia lou olaga fa’asoa ona o manatu matamuli pe ua e manatu ifo ua leai se tasi e talitonu ia te oe, pe ua le toe taua oe i nisi e to’atele. E sili lou tau i penina, e mautinoa e to’atele e alolofa moni ia te oe,” o sana tima’i lea i so’o se tasi lava ua i ai lagona ootia.

“A’apa Atu & U’u lou Lima” o le laulauafono lea o le a fa’atino fa’alaua’itele e fai ma ala e mafai ai ona talanoa mai so’o se tasi ua lagona ootia i so’o se mea lava i lenei olaga pisi ma le le mautonu i nisi. Lea ua tatala mai nei lea avanoa mo fetufa’iga i le a o lea auauna ma le fanau talavou o le atunuu, fa’aaoga mai!

Ua tuuina mai ana numera telefoni mo le silafia e le mamalu lautele e vala’au mai ai i latou ua mana’omia ona talanoa i se tasi ua gaua’i e fa’alogologo ma le toto’a, fa’atalanoa le o’otiaga o e i ai, ma taumafai ona soalaupule se vaifofo o lo’o a’afia ai lou tagata taua.

Numeera 699-1596; 699-9791 poo le telefoni feavea’I I taimi uma: 258-5516. O le upega tafa’ilagi ua lisia mai  ntamalii@gmail.com 

O le tamaitai o Pua Tofaeono o le Alliance Against Violence & Sexual Assault ua fa’ailoa lona fa’anoanoa ma le misialofa i nei talavou ua aafia lagona ma ua filifili ai e sili ona maliu.

“O nei ituaiga o fa’alavelave ua matua pogisa lagona ma ua ootia loto ona ua maumau le soifua talavou o nei fanau. Ua fa’afaigata ona iloga se mana’omia o’oo’o o a’afia ai le fanau ona o lo tatou soifuaga e matele ina le va’ai toto’a i lagona o fanau talavou, ae ua fa’atonu ma otegia le fanau i taimi uma e fa’aletonu ai latou ata ma ni tu ua le taupulea. O mea nei e lagona ai le ma e fanau ma ootia ai o latou loto, ua faigata ona toe fa’agalo.”

“Ua tatau ona tatou mataituina foliga mai poo ni fa’ailo i fanau ua ootia lagona, ina ia vave ona fa’atalanoa ma ia faia i ai se gaoioiga a’o le’I faia se filifiliga e le tatau e i latou i o latou soifua.”

Ua tusia e Tofaeono sana solo tusia e avea ma se toe fa’ailo i le fanau talavou, e taua tele i latou i loto ma agaga o latou matua, aiga ma e pele ia i latou, ae maise fo’i ua i ai le vasega o foma’i faapitoa, e mafai ona fa’atalanoaina o latou fa’afitauli ma ootiaga i taimi o mafatiaga ogaoga o le loto.

O oe e te nofo pea iinei, 

E alofaina lava oe,

E te le o to’atasi,

Na faia oe e le Atua Soifua,

E alofa le Atua ia te Oe,

E le’i uma galuega na fuafua e le Atua mo oe,

E tele fuafuaga a le Atua mo oe.

FA’AILOA E SOLIAI LE’I MAUA SE SIAKI $200,000

Ua saunia e le afioga le Ma’opu Soliai Tuipine Fuimaono lana tusi e fa’ao’o i le teutupe a le Malo o Amerika Samoa, Ueligitone Tonumaipe’a fa’atasi ai ma le Fa’atonu o le Tupe Fa’asoa a le Malo, Catherine Saelua, fa’atasi ai ma tusi fo’i i le vasega o e fa’asalalau, ma sui tofia uma o le Maota o le Fono Faitulafono ina ia fa’amanino a’ia’i le mataupu, e matua leai se tinoitupe e $200,000 ua taua’aoina mai ia te ia ma lona aiga.

Ua ia fa’ailoa ai fo’i i lea tusitusiga, e le’i i ai fo’i se maliliega po’o se sainiga a’ao ua faia e tusa o le mataupu tau le ala alo e uia ai le afio’aga o Nuuuli ma e aofia ai eleele o le Aiga Sa Soliai.

O lenei tusi ua fa’amauina le aso na tusia ai o Aukuso 10, 2020 ua ia fa’ailoa manino ai, “Ua matua fa’ate’ia a’u ina ua fa’asalalau mai le tala, o le lipoti, ua lisia i tupe fa’aalu, sa taua’aoina e le Teutupe a le Malo ma le fa’atonu o le Tupe Fa’asoa, o lo’o aofia ai ma le $200,000 ua taua’aoina lea i le Aiga Sa Soliai mo le alatele i Nuuuli.

“Ona o a’u o le Sa’o o le matou aiga, o lo ua ou mana’omia nei se fa’asa’oga o lea mataupu, aua e afua mai ia te a’u o le sa’o, se’ia oo lava i se tasi o suli o lenei aiga i Nuuuli, matou te le o mauaina pe talia lea vaega tupe mai le Malo o Amerika Samoa aua le alatele o lo’o ta’ua.”

“Ou te le’i sainia lava fo’i se pepa o se feagaiga mo se fa’atupega mo le matou aiga pe sapaia lea fa’amoemoe mo se alatele e toe fa’auia i totonu o le afio’aga e lisia ai fanua o le aiga,” o se vaega lea o le tusi.

“Ina ua fesiligia so’u taofi e le Kovana Sili tau lea mataupu, sa ou fa’ailoa i ai, e mana’omia ona tele se taimi e taga’i toto’a ai a’u ma lo’u aiga i lea fuafuaga a le Malo i totonu o le afio’aga, ao le’i malilie atu le aiga i se lisi mo lena poloketi.”

Ua fa’ailoa e Soliai, e ao ia Tonumaipe’a ma Saelua ona fa’asa’o le la’ua lipoti ua mae’a taua’aoina i le Fono  Faitulafono 

“Pe afai e moni ua i ai se siaki ua mae’a saunia mo le Aiga Sa Soliai i le taimi nei, o lona uiga ua faia lenei siaki, ae le’i i ai sa’u fa’atagaga pe ou te sapaia fo’i le fa’amoemoe o le malo e pei ona manatu e totogia ai.”

“Ona o lea tulaga, ou te fa’ailoa aloa’ia atu ai, pe afai o i ai se siaki ua tapena mo lea fa’amoemoe, ia toe fa’aleaogaina, se’ia mae’a fono aiga, ona fa’ailoa atu lea o se totogi o se lisi ua malilie i ai, pe a manatu tasi i latou e fausia se ala alo lea.”

O kopi o le tusi a Soliai sa auina atu i le kovana, taiatai o le Fono Faitulafono ma le loia sili a le malo ae maise le vaega fa’asalalau ma le ‘au tusitala.