Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA - 

 

TALOSAGA AIGA AUINA MAI LE SA FITAFITA TUAI LAGOMAU I LONA AIGA

 

O aiga o le susuga le ali’i vetereni Mata’utia Vailuu Ma’anaima Lang o Leone ua tusi talosaga i le kovana, fa’apea ma le Faipule i le Konekeresi Aumua Amata, e aofia ai ma le Sui i le Konekeresi a le Setete o Hawaii Tulsi Gabbard, e fesoasoani i se auala e mafai ai ona fa’aoo mai le Sa o le ali’i vetereni i lona aiga i Amerika Samoa nei e lagomau ai.

 

Ua faailoa i nei tusi, “O le toe mana’oga fa’amau lea a lenei ali’i vetereni, a’o le ta’ita’i fo’i o aiga, o lona lagomau lea i lona aiga i Leone, Amerika Samoa, lona nuu na soifua a’e ai.”

 

Ua faailoa na malaga o ia mo ana talavai e faia i Hawaii i Queens Hosipital ae maliu ai i le masina o Fepuari 2020, ma o loo ua tatalia ai pea se avanoa e toe auina mai ai lona Sa i ona aiga i Leone, ona o lo’o tapunia i le taimi nei malaga a le Hawaiian Airlines i le va o Hawaii ma le teritori.

 

I tusitusiga ua fa’amauina ai talosaga a sui nei o aiga, “Ia alofagia e ta’ita’i o le malo, le pa’ia o i latou e faia fa’ai’uga tatau i nei vaitau ma tulafono tamau o le fa’asa ona o le coronavirus, ia alofagia toe tepa lava i se tautua ua au a lenei sui vetereni. Sa ia faia le tautua le leoa a le fitafita i taua, sa ia tuuina lona ola i luga o le laina vaiti e toe sao mai ai, ina faliu ai se fa’aiuga e fia fa’ao’o mai lona Sa i lona aiga na ola a’e ai, e toe fa’amauina ai lona maliu ua malolo ai mai ona tiute fai i le pa’ia lasi o ona aiga, lana ekalesia ma lona nuu, ae maise ai lona malo ma le Malo tele o Amerika.”

 

Fa’ailoa e Aumua Amata, “E le o fesiligia le taua o le tautua a lenei tama, o le afioga Mata’utia i lona malo, le malo tele ma lona aiga ae maise le Ekalesia sa tautua ai o ia, o lona nuu fo’i, aua e tele ina ataata lava o ia ma le tautala soo, ae e tautala ana galuega.” 

 

O le taua i Vietnam na ave fa’alua i ai le tama a’o avea ma fitafita ma e lua fo’i tausaga lana tautua i le vaega a le Maligi Koa ae faamalolo manumalo mai o ia i lana tautua ona o manu’aga tumau i lona tino ona o le taua lava lea i Vietnam. E lua ana Purple Heart na taua’aoina o lana tautua lava lea e tasi.

 

O Ma’anaima e i ai ona atali’i matutua o lo’o faipisinisi i la’ua i Seattle Washington. E ui la ina tele ona alo o fa’amautu i fafo, ae le o lona mana’oga tupito lea, ua naunau o ia i lona aiga, lona nuu ma lana ekalesia ae maise lona atunuu pele, e toe fa’amautu mai lava i ai i ona toe taimi. 

 

E 21 tausaga o lana tatuua i le falemeli i Amerika Samoa nei ina ua taliu mai i fanua.

 

4 AFIOAGA MAUA $10,000 MO AUMAGA E LEOLEO LE COVID-19

 

O afio’aga e 4 i le atunu’u ua mae’a taua’aoina atu i ai le latou fa’atupega e ta’i $10,000 ona o lo ua avea nei aumaga a afio’aga nei ma leoleo o le fa’asa o le coronavirus i o latou afio’aga.

 

O lo ua galulue sootau’au lelei aumaga nei ma le vasega o leoleo tiute a le Matagaluega o le Puipuiga o le Saogalemu Lautele, ina ia fa’amalosia tulafono ma aiaiga uma o le fa’asa o lo’o fa’amamaluina nei, ina ia le ulufale mai pea le covid-19 i le atunuu. O latou taimi tiute ua fa’atulaga le taimi e mae’a ai ona tapunia faleoloa i le itula e 9:00 se’ia oo ina toe tatala fo’i pisinisi ma fefa’ataua’iga ae maise feoaiga i le isi taeao fou e soso’o ai.

 

O afioaga nei - Leone, Nuuuli, Pago Pago ma Faleniu. Ua mafai fo’i ona talosaga isi Aumaga mai isi afio’aga e auai i lea polokalama a le malo. Peita’i ia mua’i mae’a ona fa’atuina e le aumaga o latou fale mo leoleoga, ia va’aia ua amata leoleoga o latou afio’aga e latou aumaga ua mae’a tofia ma pulea lelei. 

 

O le fonotaga a le komiti fa’afoe o le coronavirus a le malo i le aso Sa  lea na fa’ailoa ai e Kovana Lolo Matalasi Moliga ia siaki e tatau ona tauaaooina atu e le komesina o leoleo i nei afioga e fa. 

 

Ae peitai e le’i fa’aalia e le kovana le aofai o le tupe, ae sa fa’ailoa e nisi o sui o le malo e fa’apea e ta’i $10,000 le saiki mo afioaga ta’itasi.

 

Na esiligia fo’i le fa’aaogaina o lenei vaega tupe i le ta’ita’ifono o le Komiti Fa’afoe o le Coronavirus, Iulogologo Pereira ma ia fa’aalia ai, “E fa’aaogaina lava lenei tinoitupe i mea e mana’omia mo le tausiga lelei o le aumaga, ae ia fa’amaoni i le faiva e tapunia uma pisinisi i le itula e 9:00 i le afiafi. Ia sefe mai le afio’aga i le fa’ama’i ona o fa’atasiga fai fai umi ma ua le usita’ia fo’i le tulaga vavalalata o e alaala i nei fa’atasiga. Ia faia fo’i tapuni fofoga i taimi uma e fa’atasi ai tagata.”

 

O le Komesina o Leoleo e gafa ma le talia o talosaga a nu’u e fia auai i lenei polokalama a le malo.