Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA - 

 

FIAFIA AUFAILOTU TATALA AVANOA MO SAUNIGA LOTU

 

Ua fa’aalia le agaga fiafia o taitai o Ekalesia i le atunu’u ina ua faia suiga i le fa’asa mo le COVID-19 e mafai ai ona toe tatala sauniga lotu ae limiti tagata e fa’apotopoto i le na’o le 150.

 

“Ona o a’u o se faife’au e le’i leva ona tula’i mai e laugaina le Upu i le matou fo’i ekalesia, ae toe taofia sauniga e fa’atasitasi ai ma la’u ekalesia, o lea ua matua lagona le fiafia o le loto ma le agaga ina ua toe talia e fa’ataga sauniga, ae ia limiti tagata i le na’o le 150 i le taimi e tasi,” o se tala fiafia lea a le susuga Rev, David Katina o le AOG Leone.

 

I le taimi na fa’asaina ai le toe fa’atasia o le Ekalesia i aso Sa ta’itasi, sa la’ua tatalaina ai se isi avanoa fou ua fa’ailoa mai e le Mana o le Atua e ala i feso’ota’iga tau initeneti, ma ua la’ua maua ai le avanoa e mafuta fa’atasi ai ma le isi ekalesia e matua la’ua le’i masani muamua i o latou totino. 

 

O lona uiga ua le tasi le ekalesia o le a la’ua tautuaina, ae o le Ekalesia i Leone ma o le a fa’aauau ma le la’ua ekalesia fou lea i so’otaga tau initeneti.

 

Fa’ailoa e le afioga le Epikopo Peter Brown “O se luiga fou fo’i i le au failotu le fa’asa na fa’amamaluina nei, aua ua fa’atulaga ai nisi o ituaiga o le talutalufou e mafai ona fa’ataunuu ai sauniga ae mafai ona maimoaina mai e le mamalu lasilasi o le ekalesia fa’aopoopo i ai ma nisi uso fou, e le’i masani muamua, e le’i feiloa’i i ai, ae ua auai ma fa’afofogaina le sauniga ma le laugaina o le Upu a le Atua ua tapena i aso Sa ta’itasi talu ona fa’amamalu le fa’asa mo le fa’ama’i o le Covid -19.”

 

O se tasi i ositaulaga ua ia fa’ailoa mai, “Ua tatala tonu lava le fa’atasitasi o ekalesia e pei ona masani ai, e ui ina na’o le to’a 150 o i latou i se taimie tasi, ae ua mafai ona toe tatala sauniga e fai a’e i le Atua, fa’afetai mo lea suiga fou. Peita’i e ao ia i tatou ona fa’aaoga tatau lea avanoa ua tatou maua, e tatalo fa’atauanau ai i le Atua ina ia sisila ona fofoga i le feeseeseaiga o taofi o lo’o sasao nei i o tatou uso i Amerika, ona ua manatu fa’apito nisi.”

 

SUEGA COVID-19 AUVA’A VA’A FAGOTA 

 

O le to’a 25 o le auva’a a le va’a fagota Cape Ferret, na va’aia ua feoa’i solo i luga o le uafu, ma sa fa’apopoleina ai le to’aele, ua fa’ailoa e Dr AIfili John Tufa,“Ua uma lelei ona faia suega a lenei auva’a o le va’a fagota, e leai ma se tasi o fa’amaonia le maua i le Coronavirus.”

 

O le fa’amatalaga lea a Dr. Tufa sa faia i le fonotaga a le komiti fa’afoe o le COVID-19 i le aso sa ua te’a. 

 

Ona o le fa’apopoleina o le atunuu, ua tuua’ia ai e le Kovana le Matagaluega o le Soifua Maloloina, ina ua latou le fa’ailoa atu i le auva’a lea, e le tatau ona o mai i lalo i latou mai le latou va’a. Ua fa’ailoa atu fo’i e le Kovana, “Ua le o i ai fo’i le foma’i a le DOH i le taimi na taula mai ai lea va’a, o se mea e le tatau lava ona fa’atamala ai le tatou Matagaluega ma lona ta’ita’iga. E muamua lava tofia ma fa’atulaga foma’i e i ai i luga o le Uafu i so’o se taimi o le ao ma le po e to’ai taunuu ai so’o se va’a i le Uafu.”

 

Na saunoa ai le tamaitai fa’atonu o le Uafu ma Malaeva’alele, Taimalelagi Dr. Claire Poumele, “Ua i ai nei le aiaiga fou ua fa’atulaga e tusa o le lua vaiaso ua te’a. O so’o se va’a lava e fia ulufale mai i le tatou Uafu, o le a taofia i fafo atu o le Pole lanumumu ma e fa’atalia ai e i latou se foma’i ina ia ulufale atu e sailia le latou auva’a ma le va’a atoa, fa’ato’a talia ai le ulufale mai e taula.”