FEAGAI LEOLEO FA’AFITAULI FA’AMOLISIA TULAFONO O LE CORONAVIRUS

I le fonotaga o COVID-19 a le malo se faia i le aso Faraile ua te’a, e pei ona talosagaina e le kovana, sa fa’ailoa ai e le Komesina o Leoleo Le’i Sonny Thompson, e le o faigofie i leoleo tulafono o le fa’asa ua i ai nei. Ua fa’atulafonoina ia le atoatoa le tautuaina o le atunuu e ala i feoa’iga i ta’avale la’u pasese, ia afa le pasese e malaga ma le pasi fa’apea ma le Taxi.

Ua le fa’asalaina se ave ta’avale o le a fa’ato’a maua, e fa’amatala ia te ia le tulafono, ae peita’i afai e maua fa’alua, ona fa’ato’a fa’asala lea ma taua’aoina i ai lana pepa e fa’ailoa ai lona aso i le fa’amasinoga.

Ma e to’alua ave pasi sa taofia ona o le le usitaia o tulafono ma tulai i le Fa’amasinoga Itumalo i le aso Faraile ua te’a.

“E mana’omia tele e tagata uma ona malamalama lelei i aiaiga o tulafono o le fa’asa ua tuu atu nei i le vasega o leoleo e fa’amalosia mo tagata uma ia latou usita’ia. E le o se galuega faigofie lona fa’amalosiga, ae ua mae’a tauto Leoleo o le Malo, ia latou faia o latou tiute, pe aiga pe leai,” o le saunoaga lea a Le’i

Ua talosagaina fo’i e le Komesina o Leoleo le talisapaia lelei e le mamalu lautele o nei tulafono uma ua fa’amamafa mai e le Malo ina ia nofo puipuia ai le atunuu atoa mai le Coronavirus.

“E i ai fo’i aiga o leoleo latou o lo’o fia mafuta i ai i latou ma le saogalemu pe a mae’a galuega o aso ta’itasi,” o sana tala lea.

“O pasi a le Kamupani I’a ua fa’atulaga mo latou tagata faigaluega, ua le taofia lea e leoleo, aua ua ese fo’i le ala ua fa’agafua ai nei pasi ma latou pasese i le aiaiga o le tulafono o fa’amamaluina nei. Ua fa’ataga pasi nei e ave latou pasese ma e fa’atumu lava latou pasese ona ua manava pe le’i amatalia fo’i latou galuega.”

E afua mai le 6:00 i le taeao se’ia oo i le 6:00 i le afiafi e la’uina ai pasese a pasi o lo’o nafa ma le toatele o le atunuu. O pasi a le Kamupani I’a e tatau ona latou la’uina pasese i le taimi lava e tatau ai ona oo atu tagata faigaluega i le Kamupani.

O le tulafono tau le ‘afa o le pasese a pasi e la’uina le mamalu o le atunuu, lea ua fa’amamaluina mo isi pasi uma lava. Peita’i, i le fonotaga lea, ua fa’atonuina ai e le afioga le Kovana le komiti fa’afoe o le Coronavirus, ina ia logo atu i le Kamupani, o le a totogia e le Malo nisi malaga a Pasi, ae ia usita’ia fa’atasi le tulaga, ia afa le pasese a le pasi.

9 SUESUEGA AUINA FAFO FAAMAONIA  CORONAVIRUS

E 9 suesuega na atuina atu i Hawaii i le aso Tofi ua te’a i le va’alele a le Coast Guard mo e saiki pe o maua i le coronavirus, ae leai se tasi ua maua.

O lona uiga ua tumau pea e leai se isi i atunu’u aafia i le coronavirus, e pei ona fa’ailoa e le Matagaluega o le Soifua Maloloina.

Ua i ai foi le i si 8 o suega ua tatalia nei le auina atu i fafo mo le fa’amaoniga i le Hawaii State Laboratory.

I le taimi nei ua atoa le 12 o suesuega ua auina atu ma ua toe fa’aoo mai le fa’aiuga, e leai lava ma se tasi o nei suesuega ua fa’amaonia ai se tasi ua maua i le Coronavirus. O le a tatalia nei le isi valu lea ua fa’atali nei e avea i le va’alele e soso’o mai, pe ua i ai se isi o latou na suesuea ua maua i le Coronavirus.

MALIU SAEANISI TAUTAUA I HAWAII - 4 AI MALIU UA FA’AMAUINA

I se lipoti mai Honolulu - o se tasi i ali’i saeanisi mo la’au toto e aoga mo le togafitiga o gasegase, ua avea nei ma se tasi o sui ua amia le ola e le Coronavirus i Hawaii, ma sa alaala o ia  ma galue. Peita’i ona sa malaga o ia i Seattle Washington, o lona toe taliu mai i Honolulu ae fa’ato’a maua ane ai i ana suesuega o le Coronavirus ua po’ia o ia i lea fa’ama’i pipisi.

O Dr. Art Whisler, o se tasi sa avea ma faia’oga Peace Corp i Samoa ma sa faia’oga o ia i le Kolisi o Samoa i na tausaga, peita’i ua avea nei o ia ma se to’atasi o le to’a 9 ua maliliu i le setete o Hawaii ona o le Coronavirus. Ua atoa lona 75 tausaga o lona soifua, ma o se tasi ua iloga lana tautua i ana suesuega o la’au e aoga e avea ma vaifofo i gasegase. O ia lea na lona tolu i ai maliu i lea setete, ma sa umi fo’i o tau togafitia lona maua ai i lea gasegase. O i latou uma e maua mai i le motu o Oahu.