Ads by Google Ads by Google

Tala I Vaifanua


O le tama’ita’i Samoa o Tofuola Jednitta Ta’amu-Clark ua fa’aeaina nei lona soifua tautua i le American Airlines i le tulaga Pule o le Lala i Madison Wisconsin. Malo le tauata’i, malo fo’i le fa’aeaea malo ia te oe Mrs Clark, o ou mama na. [ata: foa’i]

TOFUOLA TA’AMU-CLARK FA’ATONU AMERIAN AIRLINES MADISON WI

 

Ia Mati 26, 2020 na maua ai e le tama’ita’i Samoa o Tofuola Jednitta Ta’amu-Clark le tusi mai le pulega a le Envoy Air Services ua fa’ailoa ai ia te ia ma lona aiga, ua siitia le tulaga o le a faigaluega ai i totonu lava o le latou Kamupani Va’alele.

 

“Ou te fiafia e fa’ailoa atu ia te, Tofuola Jednitta Ta’amu-Clark, ua avea nei oe ma Pule Sili o le American Airlines i Madison WI e afua mai ia Aperila 01, 2020,” o se vaega lea o le tusi.

 

O se mea ua fa’afiafiaina atili ai o ia fa’atasi ma lona to’alua William Clark, ua atoa le 20 tausaga talu ona la’ua mafuta ma ua i ai fo’i o la’ua alo e toatolu. O lo ua faailoa fo’i e Clark, “Afai sa i ai Tofuola Jednitta i o’u autafa e fesoasoani ia te a’u ma ls’u galuega o se fitafita o tausagam e 20, ua tatau foi ia te a’u ona ou fiafia e sapaia lana taumafaiga i lana galuega ua siitia ai nei lona tofiga e galue ai.”

 

Ua fa’aalia i fa’asalalauga fa’alaua’itele a le Envoy Air Services le i ai o le avanoa i le Ofisa Autu o lea lava kamupani i Madison, Wisconsin peita’i ua fa’ailoa mulimuli mai ua mae’a tofia nei i ai le tamaita’i Samoa o Ta’amu-Clark.

 

O Ta’amu-Clark o se alo e fa’asino i le tamaitai o Vaosa Simanu o Utumea i Sasa’e ma Fili Ta’amuovaigafa o Fagatogo.

 

I le tala ua fa’alauiloaina, ua fa’ailoa ai le olaga galue o lenei alo o Amerika Samoa, na amata mai i lona galue ai i le Ofisa o le Envoy Air Services i Del Rio Texas, lea sa ia amatalia ia Novema 2018. Peitai na amatalia mai lana lea tautua i lona avea ma se tasi e talia i latou e gasolo atu e fia maua se fesoasoani i Charleston, South Carolina i le 2006.

 

Na mua’i maua le Tikeri Associate Degree i Pulega o Pisinisi ma sosoo ai loa ma lona faigaluega mo le American Airline i le 2018. O iina sa i’u ai lava ina tula’i o ia i tofiga sinia i le American Airlines i Nashville, Tennessee, lea na oo ai i lona tofiga Sui Pule i le vaega e ta’imua mai i le tautuaina o tagata fegasoloa’i i latou va’alele.

 

Na fa’aauau pea ana aoaoga mo lona fa’ailoga Bachelor i Pulega o Pisinisi ma ua fa’apitoa mo le pulega o tagata faigaluega, lea na toe taua’aoina ia te ia i le fa’aiuga lava o Oketopa 2018. O lona to’alua o William Clark ma le fanau e to’atolu.

 

MALO NANA’S FAUSIA FALETA’ALO NUUULI VOCTECH HIGH

 

Ua faafetaia e Nuuuli Voctech High le faaiuga ua mae’a faia a le Kovana ma le Matagaluega o A’oga ina ia amata tauofo le galuega tele, o le fausia lea o le Faleta’alo mo lea Laumua.

 

“Mai le tele o tausaga ua toe pau lava lea o le a’oga maualuga a le malo e leai se faleta’alo. Na muamua lava fa’atuina e le faigamalo a Tauese -Togiola le falea’oga mo Matata Eseese, ua manaia fo’i lena galuega, ae fa’ailo mai ai loa le fausia o le matou faleta’alo,” o se tala lea a se tasi o matua o le PTA a Nuuuli VocTech High sa i ai ona alo i lea a’oga mai lena lava tausaga e oo mai i lenei tausaga.

 

“Na savalia lava fo’i le faigamalo ua tuana’i, Togila-Faoa ona o le naunau ia fausia se faleta’alo. Ona o le eleele e ao ina fa’atuina ai lea faleta’alo e tatau ona muamua matu’u ese le lisi o lo’o fa’amau ai le Pacific Products, lea e ao ai ona fa’atali mo nai isi tausaga, ae ua mae’a fa’amauina lava lea eleele mo le galuega lena.”

 

“Lea ua oo mai i le faigamalo lenei a Lolo-Lemanu ua feagai tonu ai ma le mae’a o lea lisi, ae va’aia loa ua amata lolofi pisinisi e fia maua nei eleele. Peita’i ua fa’afetaia ua taga’i le afioga Kovana Lolo Moliga i le tautuaina o fanau ma ni taleni o lo’o fa’afaigofie atili ai latou sailiga manuia i le lumana’i,” se toe tala fiafia lea a lea sui iloga o le PTA.

 

Ua fa’ailoa mai ua mae’a manumalo le kamupani a le Nana’s Construction i le tauofoga mo le fausia o le faleta’alo ma ua fiafia fo’i le fa’auluuluga o lea Kamupani Faufale o le a latou galulue mo le DOE i lea poloketi matagofie.

 

O Nana’s Construction o lo’o fausia i le taimi nei le faleta’alo mo le Central ma le falelima i sisifo i le nofoaga lea sa i ai muamua le fale o le VA, e tuaoi ma le a’oga maualuga a Tafuna. Ua fa’ailoa mai ua tusa ma le 70% o lea galuega ua mae’a lelei nei.

 

O le isi latou galuega e aofia ai le fausaga o le faletele o le LBJ Medical Center lea e fa’atuina e soso’o ma le falema’i ua togafitia ai gasegase tau le Mafaufau. Ua fa’ailoa mai ua tusa ma le 50% o lea galuega ua mae’a nei fo’i.

 

FOA’I FA’ALAPOTOPOTOGA A.B.L.E. FOMA’I GALULUE TETEE  CORONAVIRUS

 

O le fa’alapotopotoga a le Agency fo Better Living Endeavors (A.B.L.E.)  sa faia i le aso Faraile ua te’a sa latou foa’i taua i le Matagaluega o le Soifua Maloloina i le taumafaiga ina ia fa’aauau pea le fa’amamaina ma le suesuea leleia o i tatou ua fa’anofo va’ava’aia ona o le Coronavirus.

 

O i latou lava na e aofia faatasi ai ma isi uma o le matagaluega o le Soifua Maloloina o loo feoa’i solo lava I aiga o loo nofo va’ava’aia ai le toatele o le atunuu e lei atoa le 14 aso o nono va’ava’aia mai tua tatou aida, ina ne’i i ai lava se tasi e alia’i mai  ai auga o le Coronavirus.

 

O le foai a le fa’alapotopotoga sa tauaaoina atu e le taitai fono ia Kimberly Lutu-Fuiava ma se tasi o sui totino o le ABLE Elinor Lutu McMoore. Sa tuuina atu lea foai ia Dr Saipale Fuimaono o le Soifua Maloloina.

 

O lea foai o mea fa’amama, pupuni foliga e puipuia ai mai siama, fa’apea ma ofu puipuia ai i latou o lo’o gafa ma le galuega.

 

Sa talia ma le fa’afetai e Dr. Fuimaono lea foai, “Itiiti pe tele, ae o le agaga lava ia o le foa’i e sili ona fa’afetaia aua e le o toe faigofie ona maua nei sapalai iinei, ae maise o fafo, lea ua matua faigata ona maua nei oloa i faleoloa sa masani ona matua tele ai. Fa’afetai i le ABLE mo le foa’i taua.”

 

TALOSAGA $2 MILIONA MAI LE FEMA

 

Ua fa’ailoa e se tasi o sui o le FEMA, “Ua taua’aoina nei le toe talosaga mai fo’i a le Malo o Amerika Samoa ina ia fesoasoani atu le FEMA e fa’amatuu atu le $2miliona e fesoasoani i le Malo o Amerika Samoa ma ona tagata ona o le pagatia i le Coronavirus i le taimi nei.”

 

Peita’i ua fa’ailoa mai e lea sui iloga o le FEMA e le’i oo atu le Coronavirus i Amerika Samoa, ma ua leai se fa’amaumauga ua fa’aoo atu o se tasi ua maua i lea gasegase i le teritori.

 

E ui ina matua lelei lea fa’ata’otoga ua fa’atino e Amerika Samoa, ae o le aiaiga ua tamau e le FEMA, e le mafai ona toina mai se vaega tupe mai ia te’i latou e fesoasoani i le a’afia o lo ua i ai le tatou Malo, ona e le’i oo mai lava le Coronavirus i o tatou laufanua nei.

 

Peita’i ua i ai alagatupe a le fetarale ua mafai ona talosaga i ai Amerika Samoa i lenei vaitau ina ua ma’ea ona pasia e le Konekersi ma sainia e Peresitene Trump, ma avea ai ma tulafono.

 

O nisi o nei alagatupe e aofia ai le silia ma le $800,000 mai le US Small Business Administration.

 

Pe afai o loo manatu Amerika Samoa e fa’ailoa le tulaga o le taofia o tagata faigaluega mai galuega i aso nei ua fa’amamalu ai lenei vavao, ua tatau ona i ai se ofisa autu a le malo o Amerika Samoa e fa’amaumau uma ai le aotelega o i atou ua mae’a vaea mai galuega ona o le Coronavirus i le vaitau nei. O se faamaoniga tonu lena e moomia ia mua’i tu’ufa’atasia ai le aofa’i o e ua le toe faigaluega ona ua afaina le tupe maua a pisinisi sa faigaluega ai i latou po’o matagaluega ma Ofisa fo’i o le Malo sa faigaluega ai.