Ads by Google Ads by Google

Tala I Vaifanua


O se va’aiga i le vasega o fanau ma aiga na auai i le toe sauniga o le susuga le Fa’afeagaiga Rev. Fa’atui Laolagi i le aso Lulu i le malumalu EFKAS i Matuu ma Faganeanea. [ata: Leua Aiono Frost

FA’AMAVAE ATU I LE TAMA FAIFE’AU FA’AVAOMALO - REV. FA’ATUI LAOLAGI

 

O toe sauniga o le susuga i le Faife’au, o se misionare Kerisiano fa’avaomalo, Rev. Fa’atui Laolagi, sa faia i le taeao o le aso Lulu, Ianuari 29, i le Malumalu EFKAS i Matuu ma Faganeanea. Sa auai uma atu fa’atasi ma Aiga, pelega ma e masani i lona toe sauniga.

 

O molimau na fa’afofogaina, na mafai ona fa’amautu ai le soifua auauna o lenei Tama, ma o se Failauga Kerisiano A’ia’i o le Upu, ma e maliu lava o ia, e le o avea e se tasi lona fa’anaunauta’iga, “Ia faia le finagalo moni o le Atua i ana auauna, Ia tala’i le Talalelei i so’o se atunuu, i so’o se gagana, ona fa’ato’a afio mai ai lea o Iesu.”

 

O se tasi o molimau o Rev. Siaosi o se tasi sa tautua mai i Aferika i Saute, ma o ia fo’i o se tasi sa aoga i ai Rev. Laolagi e ala i lona fa’amalosi ma le a’ao fesoasoani i le tele o mea e tua i ai i le galuega, mai le amataga o le la’ua galuega ma le faletua, se’ia o’o mai lava ina fa’ataotolia i gasegase.

 

Na malaga mamao mai fo’i nisi o lona aiga mai le Manu’atele, o tama matutua sa latou soifua fa’atasi a’e ma latou molimau i uiga o lea tama, “O le loto maulalo ma ona uiga talitiga i so’o se mea, ae le avea ai lona soifua e tautua i le galuega a le Atua ma lona silafia o lona Atua, e le fa’alualuagia lava i so’o se oa, po’o ni mea o lenei olaga!.”

 

Na malaga mamao mai fo’i se tasi o tama’ita’i tuafafine fa’aevagelia mai Amouli ma Samoa, ae o lo’o galue mai i le Malo o Saina, lea sa ia molimauina le faigata ona ulufale mai i Amerika Samoa ina ua ‘a’ave atu tala, ua malolo le tama Kerisiano, ma o lo’o tele fo’i aiaiga e le faigofie ai ona ulufale mai iinei ona o le atunuu o tautua ai. Sa ia fa’ailoa mai i lana molimau, “Ae ua fa’aavanoa e le Atua lenei taimi, ina ia mafai ona molimauina le galuega sa fa’aauau mai e lana auauna fa’amaoni, ma e tatau ona tula’i mai nisi e suitulaga i le galuega lelei mo le Malo o Atua! Pa’u se toa ae toe tu se toa mo le Atua.”

 

Na tuua le mafutaga mafana i le alofa ma le tina o Elisapeta Laolagi ma le fanau ia Ianuari 12, 2020 ae ua atoa ai le 89 tausaga o lona soifua. O ia o se tasi sa lalamua ana galuega na fa’atino i le avea ai ma Faife’au o le Upu a le Atua, ae maise o lona soifua o se Faia’oga mo fanau talavou.

 

O le amataga fo’i o lona soifua tautua sa mua’i avea ai ma Faia’oga, ona soso’o lea ma le avea ma Faufautua i le fanau a’oga i le Samoana High, ona avea lea ma Failautusi Aoao a le EFKAS ma na tautua fo’i o se Faife’au Tausinuu i Fagasa ma Faga’alu.

 

Ma o ia sa fa’atuina le South Pacific International Christian Church Center i Fatumafuti.

 

I se tasi o molimau a nisi o e vavalalata le mafutaga ma Rev. Laolagi, sa latou fa’ailoa ai se tasi o taimi ina ua tatala mai le CD pese o vi’iga o le Atua na tapena e nai ona alo tama’ita’i ma le tina o le aiga, ma sa ia fa’ailoa ai, “Afai ae pepese si a’u fanau, ua pei lava ua ou o’o i le lagi, i le suamalie o a latou pesega, ua fa’afoliga lea i le vasega o pesega e vi’ia ai e agelu lo tatou Atua!”

 

I le soifua fa’aleaoaoga o lenei tama ua umia le Bachelor in Theology mai le Iunivesite o VanGuard, Orange County; ma le Master in Education mai le San Francisco State College ma le Master in Divinity mai le American Baptist University i Berkley.

 

O lo’o soifua mai le tina o le aiga, Elisapeta Saelua Laolagi, nai ona alo e to’a 5 ma le la’ua fanau a fanau e to’a 12 i latou.