Ads by Google Ads by Google

Tala I Vaifanua

POLOKALAMA TI’ETI’E PASI A LE TAOA - AMATA IA FEPUARI 04

 

Ua mae’a ona fa’ailoa e le Pulega a le TAOA se polokalama e le gata ina fa’afiafiaina ai sui uma ua maea lesitala o le TAOA, ae o le a aoga foi e fesoasoani atili i nai matua matutua i le taumafaiga e o’o mai i a latou nofoaga e piki atu ai latou tausami faatolu i le vaiaso.

 

O le igoa o le polokalama o le Tietie Pasi ma e tatau ona aoga uma lava i tagata matutua o le teritori e o mai ai e avatu a latou ‘aiga i aso ta’itasi ua fa’atulaga mo le latou falelima.

 

O le falelima i sisifo e aga’i ane i si i Leone, ae o isi e aga’i ane i Pavaiai. Ua mae’a fa’atulagaina pasi e susu mai ai matua e piki a latou mea’ai, ma e amata ona piki mai e le pasi i latou i le itula e 8:30 i le taeao, ma agai mai ai i isi afio’aga lea e talamai o le afioaga tupito.

 

Mai le Alataua i le afioaga o Fagalii e aga’i mai i Leone, ma e malaga mai i latou i le aso Fepuari 03 i le taeao i le 8:30 ae tu’ua loa Fagali’i e lea pasi mo Leone. E fa’apea fo’i ona faia i le aso Lulu ma mle aso Faraile o lea vaiaso. Ua faapea foi mo

 

Matua uma i Aoloau, Aasu ma Tafeta, Mapusaga fou ma Pavaiai e aga’i mai i Pavaiai i le Malumalu Katoliko i Pavaiai lava I le aso Gafua, Aso Lulu ma le aso Faraile.

 

I le falelima i sasa’e ua fa’atulaga ai i latou e amata ona Tietie Pasi i le aso Lua, aso Tofi ma le aso Faraile o le vaiaso asau ma e tu’ua le mai Onenoa i Fagaitua i le itula e 8:30 ma faasolo mai ai e piki mai uma nisi e tau mai ai i le ala e aga’i mai i Fagaitua EFKAS Maota o le galuega mo a latou tausami ua mae’a saunia.

 

Ua fa’apena fo’i le isi pasi e malaga mai Sailele Masausi ma Masefau se’ia aga’i mai i Fagaitua ma le Pasi mai Aoa se’ia agai mai i Amouli ma fa’asolo mai i Fagaitua. O le pasi fo’i mai Vatia, Afonotele ma Aua e aga’i mai i le Center i Pago Pago ma le Pasi mai le afioaga o Fagasa ma le vaega pito i mauga o Pago Pago e agai mai uma i Pago Pago mo a latou tausami.

 

O nei pasi ua togipau uma e le polokalama, o lona uiga ua nao le oso i luga o le matua fa’asavili ma aga’i mai e fai sina talatalanoa ma isi foi a latou uo mamae, piki le tausami ma toe foi i le pasi, e 30 minute e fa’atali ai le pasi mo i latou ona toe malaga tuusao fo’i lea i lona afio’aga na malaga mai ai.

 

O lenei fa’amanuiaga ua agatonu mo nao le tagata matua lava ua maea lesitala, ae afai o i ai sou suli momo’e e ao ina sau lea sui momo’e ma aumai le ID o le matua ua lesitalaina i le TAOA.

 

O le tauvaga pese fo’i mo le Census  po’o le Tusigaigoa a le Iunaite Setete, o lo’o tapena i ai le TAOA ina ia fa’aulu atu a latou pese fa’atauva, ua toe tolopoina nei se’ia o’o i le aso 14 Fepuari, 2020 e faia ai lea tauvaga. O le sini poo le autu - ia tusia lou igoa i le fa’amaumauga 2020

 

FALEMA’I ITUMALO I LEONE MA NOFOAGA SUESUEA GASEGASE PIPISI

 

I le taimi nei ua fa’atulaga falema’i fa’aitumalo i Leone e avea ma nofoaga e tausia ma suesuea atili ai gasegase ua tau masalomia o a’afia i faamai pepesi e pei o le misela ma le Conornavirus lea ua sau nei.

 

Ua fa’atonuina e le kovana sili, le Matagaluega o le Soifua Maloloina ma le LBJ Medical Center e galulue fa’atasi i lea mataupu.

 

O se ulugalii mai Amerika o le tama o le Samoa ae o le to’alua o se tasi mai le Carribeans lea ua taofia i lea falema’i fa’aitumalo mo suesuega fa’apitoa, ina ia fa’amautu pe o a’afia i la’ua i le Coronaviru pe leai.

 

Fa’ailoa e le fa’atonu o le Soiifua Maloloina, Motusa Tuileama Nua, “O lenei ulugali’i na malaga mai i le malaga a le Hawaiian Air i le aso Tofi ua tuana’i, peita’i ua iloga na malaga mai Florida, oso mai Atlanta ma o’o mai ai i Hawaii. Na malaga lea o i la’ua i Samoa ma ua sailia i la’ua i Faleolo, ae maua ane e matua maualuga lava o la’ua fiva na fuaina ai e i latou o le DOH o galulue i le tatou malae va’alele. O lea ua toe fa’afo’i mai ai i la’ua i Amerika Samoa ma ua taofia ai mo suesuega ma togafitiga i le nofoaga lea i Leone.”

 

Ua mautinoa nei e le o maua i la’ua nei i le Coronavirus po’o le misela, peitai e le’o fa’atamala lava le tatou Matagaluega o le Soifua Maloloina, ua mae’a tu’ufa’atasia suesuega uma ma fa’ao’o atu i Hawaii mo sailiga po’o le a lea fo’i ituaiga gasegase ua maua ai i la’ua.

 

Ua fa’apea fo’i ona fa’alauiloa e ala i fa’asalalauga fa’alaua’itele a le DOH ua le toe fa’aaogaina nei le falema’i fa’aitumalo a Leone e faia ai ni talavai masani e pei ona fa’atautaia ai muamua, ua tapunia mai lena ituaiga o tautua, ae ua fa’aaogaina mo le avea lea ma nofoaga fa’apitoa e tausi esea ai i latou ua masalomia o lo ua a’afia i fa’ama’i pepesi e pei o le Coronavirus ma le Misela.

 

TIMA’I FA’AAOGA SOLOFUA O TULAFONO “SHORT AMNESTY”

 

Ole aso Toonai nei ua toe fa’atulaga e le Ofisa o Femalaga’iga e fa’ailoa atu i nisi o e ua ovasiteia i le tatou atunu’u, ia fa’aaoga le avanoa i lalo o le polokalama a le kovana, “short amnesty” e faia ai pepa nofomau i latou o lo’o nonofo fa’asolitulafono i Amerika Samoa.  O lea polokalama e tapunia lesitala ia Fepuari 6.

 

Fa’ailoa e le Pule o Femalga’iga Peseta Dennis Lutu e 146 i latou na mafai ona lesitala i le aso To’anai ua te’a.

 

Ua fa’ailoa atu fo’i i le mamalu o e o loo fa’aulua nei talosaga mo nai o latou aiga, “E maua foi le fesoasoani tau le taimi e faamuta ai le totogia o nei pili e fa’aulu ai le fa’afouga o pepa e alaala nai aiga i le atunuu, ae mana’omia lava ona faamaoni i le taumafaiga ma aiaiga o lo’o ua fa’amatu’u atu ai lenei feagaiga, ia mafai ai ona faaleleia pepa nofo mau o sui o tou talosagaina.”

 

O nisi o nei ua talosagaina, ua leva ona le toe fa’afouina latou ID, o nisi na ulufale mai i Pemtia ae ua mae’a le taimi na atofa ai e le pemita, ae ua le toe fo’i lava ona o nisi o mafuaga le ma’alofia.

 

O nofoaga o le a i ai le Ofisa o Femalagaiga, mai le itula e 7:30 i le taeao se’ia paia fo’i le aoauli, CBT Falesamoa; Maketi i Fagatogo ma le Ofisa o le Matagaluega o Tina ma Tupulaga ma luma o le KS Mart i Iliili.

 

O se tasi lea o aiaiga tamau o le talosaga ai mo lou nofo mau i lenei fa’agafua, ia fa’ailoa fo’i ua mae’a faia lou tui puipuia o le Misela.