PATIPATIA FAIVA FAIA’OGA MAOA’E GALUEGA 2019-2020:

O le afiafi o le aso Tofi na te’a i le Sadies by the Sea,sa fa’atasia ai faia’oga na lautogia galuega fa’atino na fa’atauva ai mo le avea ma “Faiaoga o le Tausaga 2019-2020”.

O i latou e to’aono ma ausia la togi maualuluga e saili mai ai ni faia’oga se to’alua e toe fili ai le ua agava’a mo le Faiaoga o le Taugasa i le Teritori o Amerika Samoa na aofia ai: Akenese Ah Kuoi mai Pavaiai Elementary; Konelio Alofaituli mao le Tafuna Elementary; Edney Apului mai le Tafuna High; Prixie Lou Scanlan - Fruean mai Aua Elementary; Penelope Mareko mai Samoana High; June Seiuli mai Uifa’atali Peter Coleman Elementary i Pago Pago.

Mai lea to’aono na toe fa’amasinoina i latou i galuega sa fa’aulu mai e tauva ai, ma ua tula’i mai ai le to’alua o sui na filifilia. O i laua ia o Mareko ma Apulu - o ia la ua aveama Faiaoga o le Tausaga - Teacher of the Year.

Saunoa Apulu i le fa’atasiga, “Afai e te a’oa’oina le fanau, e mautinoa e ao ina e aoaoina i latou fa’atasi ma o latou agaga, ia fiafia i le poto ma le aoaoina.”

O i latou sa auai i lea fa’atasiga e aofia ai aoga o faiaoga, ae maise sui o le malo, ma le Matagaluega o Aoga.

E i ai nisi o e na vala’aulia fa’apitoa e le’i auai i lenei sauniga fa’apitoa, o nisi fo’i o faia’oga ua loa ona mae’a litaea mai lea tofi, peita’i o nisi sa mafal ona auai, o i latou ua mae’a tofo i le matagofie o lea fo’i fa’aeaga.

Na tofu fa’ailoga i latou e to’aono sa mua’i fili mai e tausaili ai se ua agava’a. Ma sa tele fa’ailoga eseese na tapena i ai le vaega a le Teacher Quality ma le Komisi o le Filifiliga o se Faia’oga o le Tausaga, ma latou pa’aga na agalelei mo lea fa’amoemoe.

O le aiga fa’apitoa ma siva fo’i nei sui taito’atasi, na iloga ai fo’i le alofagia o sui faia’oga i lenei tausaga, ma fa’atasi atu le susuga le Faife’au a le Faia’oga o le Tausaga 2019-2020, Pr Westerlund ma le Faletua ina ia ta’ita’ia lea sauniga lotu mamalu i lea afiafi. O le faletua o Cynthia Moliga, sa avea lea ma sui o le afioga le Kovana Sili Lolo Moliga.

O le faia’oga o le tausaga, na tutula’i ma ia fa’afetaia le Matagaluega, le komisi fo’i o le filifiliga o se Faia’oga o le Tausaga, o latou aiga, ae maise lava le fanau a’oga i potu a’oga, i latou o lo’o latou aoaoina. Fa’afetai i le fa’aeaga, “Ae le o le fa’amoemoe lea na mafua ai ona avea ma faia’oga. O le agaga ia aoaoina fanau, ia agava’a i latou e feagai ma lu’itau o latou olaga i le lumana’i, aua o lo’o aga atu i le tele o suiga eseese e feagai ma i latou i o latou taimi o soifua ai.”

O lana fa’afetai fo’i sa fa’ao’o i ona uso a faia’oga, sa latou nopiai fa’atasi i le fa’amoemoe. Ae maise nai o latou aiga ua fa’atasia i le po fiafia. “E le se togi lava ma se lavea, e toe fa’aauau fo’i lenei fa’amoemoe mo le tausaga fou. O le fa’amoemoe sili, ia mafai ona fa’aosofia lagona lelei e aoao ai le fanau i potu aoga i aso uma, o i latou o fua o tatou galuega. A a’oa’o i latou, ia le na’o le atamai ia maua, ae ia a’oa’o ma latou loto ma agaga ia iloa lelei le taua o le olaga a’oa’oina.”

FA’AUAU POLOAIGA FA’ALAUAITELE A LE KOVANA PUIPUIA MAI LE MISELA:

O le aso Sa na toe fa’ailoa mai ai e le afioga le Kovana Sili, e fa’aauau pea ona fa’amalosia tulafono uma ua mae’a fa’atulaga mo le puipuiga o le mamalu lautele mai le a’afia atu i le Misela.

O le poloaiga fa’alauaitele ona o le misela ua tapunia ai aoga a le malo ma aoga tua, fa’apea ma Day Care Centers. Ma ua fa’asaina fa’atasiga lautele e aofia ai ta’aloga bingo.

“Ua fa’aauauina e lenei poloa’iga le fa’asa na mua’i fa’amalosia mai ia Novema 13, 2019, ma ua fa’ataga ai foi le matagaluega o le Soifua Maloloina e fa’atino ma fa’amalosia o latou tiute uma e alagatatau ai ona mautinoa le taofiofi mai o le pepesi o le Misela i le teritori. E le gata i lea ae ua toe fa’amalosia atili ai fo’i le galulue fa’atasi o matagaluega uma e so’otaga ma le taumafaiga e fa’amalosia le taofi ua mae’a fa’ataoto e le Malo e tusa ai o ituaiga fa’afitauli tau le soifua maloloina ua feagai nei ma le atunu’u, ona fa’ama’i pepesi ma e afaina ai le soifua maloloina o le mamalu lautele o le atunu’u.”

Ua pa’ia fo’i e le tautalaga a le Kovana le tulaga o i latou uma o lo’o nonofo ae ua ova aso na fa’atagaina ai i le atunu’u, e mafai ona e o’o ane e faia ou tui puipuia o le Misela, ma e agava’a ai fo’i oe e talosagaina ou pepa nofo mau i Amerika Samoa. E 30 aso le malosi o lea fa’atagaga fa’aletulafono e fa’aleleia ai ou pepa e te nofo mau ai i Amerika Samoa, ona mae’a lea o lea  avanoa.

O isi mea uma na mae’a fa’atulaga mai e tusa o i latou e malaga i fafo atu o Amerika Samoa ma e fo’i e ulufale mai i Amerika Samoa o lo’o fa’amalosia uma lava i lenei toe soso’oga o le fa’amalosiga o le taofia ona so’ona feoa’i o tagata i le va o atumotu ma malo i fafo, fa’apea ai ma fa’atasiga e fa’apotopoto ai le to’atele o fanauiti se’ia o’o i fanau talavou.

O lo’o fa’ataga pea lava ona fa’atasi fanau i sauniga lotu, ae ua le toe fa’ataga ona fa’atasia i ta’aloga, fa’atasiga autalavou, ma nisi nofoaga e pei o matafaga ma fa’amalositno. Ia utagia mai lenei poloaiga fa’alaua’itele, aua ua fa’amalosia fo’i nei tulafono uma e le mamalu o Leoleo o le Matagaluega o le Saogalemu Lautele.

O le poloaiga fa’alauaitele atonu o le a maua mai ai nisi fesoasoani fou mai le malo tele mo Amerika Samoa.

FANAU AOGA LEONE HIGH - GAOSIA TEUTEUGA LA’AU KERISIMASI D.C

I le Kerisimasi o lenei tausaga, e to’a 56 le aofa’iga o le fanau a’oga i Leone High sa saunia teuteuga o le La’au Kerisimasi ua fa’atuina i le President’s Park i le Laumua i Washington D.C.

O Leone High sa filifilia e le Matagaluega o A’oga i lona ofisa o le Curriculum Instruction & Art Department e latou tofu sao e fa’atino lea fo’i galuega taua, ma ua pule lava latou i mamanu e latou te tapenaina ai teuteuga o lea La’au Kerisimasi ua mae’a tapena mai e le National Park Service.

I le taita’iga a le Faia’oga Tusiata Tony Esau, e 26 polo la’au kerisimasi ua mae’a tapena lelei e le vasega Atisi a Leone High ua mae’a tusia ma ua fa’ao’o atu mo lea fa’amoemoe. O nei polo mo le la’au kerisimasi  o se galuega e le totogi, ua ofo mo le fa’amoemoe maualuga ma ua fiafia i latou nei e tapena: Haulani Lafua, Sema Papalii, Chelsea Save, Adonai Tinae, Beverly Ludgate, April Liu, Lagi Sooalo, Piulamalua Taua, Numia Taaleifi, Dimitrus Philip, Paul Isaako ma Peter Isaako.

Ua fa’ailoa mai e silia ma le to’a 1,500 fanau a’oga ua aofia i le teuteuga o lenei la’au Kerisimasi i tausaga ta’itasi.