Ads by Google Ads by Google

Tala I Vaifanua

TAPUNIA OFISA O LE MALO ASO GAFUA - ASO MALOLO

 

Talu ai ona o le aso Gafua, Novema 11, o le aso malolo mo Vetereni - Veterans Day - o le mafuaaga lea o le a tapunia ai ofisa o le malo i lea aso, e aloaia ai tautua a vetereni i le militeri.

 

Ua fa’atulagaina e le ofisa o vetereni a le malo o Amerika Samoa, se sauniga fa’apitoa i le aso Gafua, e amata i le itula e 8 i le taeao i le nofoga o le Veteran Memorial Center i le Tafuna Industrial Park.

 

I lea aso malolo e i ai nisi o kamupani ma pisinisi - e pei o le StarKist Samoa - o le a galulue pea i latou.

 

O nisi o pisinisi e tapunia i le aso malolo e aofia ai faletupe ae ua fa’ailoa mai e le Territorial Bank of American Samoa o le a tatalaina ia Novema 9, aso Toanai le latou lala i Tafuna mai le 8:30am i le 12noon.

 

PUIPUI MAI PEPESI O LE MISELA I AMERIKA SAMOA

 

I se pepa o fa’amatalaga mai le Matagaluega o le Soifua Maloloina (DoH) o lo’o talosagaina ai le mamalu o le atunu’u ina ia puipui mai i le pepesi o le misela i Amerika Samoa, aua e mafai ona fa’aumatia ai le soifua.

 

E pei ona lipotia mai i Samoa, o lo’o pepesi ai le Misela, ma e tele le avanoa e mafai ona a’afia ai tagata nu’u o Amerika Samoa “ma e mafai ona a’afia ai oe ma lou aiga pe afai e le’i faia tui puipui o lau fanau mo le misela,” o le tala lea mai le DoH.

 

Ua ripotia ni fanau laiti ua maliliu i Samoa ma o lo’o masalomia e mafua mai i le fa’ama’i o le Misela o lo’o pepesi i totonu o samoa.

 

Fa’ailoa e le DoH o le misela e mata’utia ma matuia, e faigofie ona pipisi pe a tale, pe a’afia fo’i i le ea o lo’o manavaina mai e le tagata o lo’o a’afia i le fa’ama’i.

 

Ua maitauina e le Soifua Maloloina, o le to’atele o fanau o lo’o ao’oga, e le o talafeagai le tulaga o i ai o latou tui puipui mo le misela ma o le a avea lea ma tulaga e te le ai le avanoa e ono a’afia ai le to’atele o tagata.

 

Talosaga le DoH i le atunu’u e galulue fa’atasi ina ia fa’asaoina le ola o tatou fanau ma ia mautinoa ua atoatoa lelei tui puipui o fanau mo le misela. Fautuaina le mamalu o le atunu’u e su su ane i falema’i itumalo e fai ai tui o fanau.

 

O aoga uma ma nofoaga o lo’o tausia ai fanau laiti, o le a tufatufaina atu iai le lisi o fanau e le’i atoatoa o latou tui puipui mo le misela. O le a fa’apea ona toe fa’afo’i fanau i o latou aiga pe afai e le’i atoa tui e lua mo le misela.

 

Mo le mamalu o le atunu’u o lo’o fuafua e faimalaga atu i atunu’u o lo’o pepesi ai le misela e i ai Samoa, Tonga ma Niu sila, ua fautuaina i latou nei e su su ane e va’ai se foma’i po’o se teine tausi ma’i ina ia siaki pe tatau ona faia ni tui puipui mo le misela ae le’i malaga ese atu.

 

O i latou uma o e agava’a mo tui puipui o le misela, o fanau e 12 masina ma i latou o e matutua o lo’o fuafua e faimalaga atu i atunu’u ua taua i luga.

 

O auga fa’aalia nei o le misela e iai le : maualuga o le fiva e sili atu ma le 104, o le tale, tafe o le isu, o mata e tagi ma mu mu ma le pata o le tino e alia’e mai pe a atoa le 3 i le 5 aso talu ona amata auga fa’aalia o le misela. Mo fesili telefoni - 633-5871 /5872.

 

TAUVAGA “FAGOTA MO TAEAO” - NOVEMA 8 & 9

 

Le taeao o le aso Faraile na te'a nei sa amata ai le tauvaga o fagotaga, “Fagota Mo Taeao”, na fa’ama’ea i le afiafi i le aso Toanai na te'a nei i le Malala Marina Dock.

 

O lenei tauvaga fagota e fa’atautaia e le National Marine Sanctuary o Amerika Samoa ma le Matagaluega o le Puipuiga o le Vaomatua ma le Gataifale ma nisi ua ofo mai latou te fesoasoani i lona fa’atupega.

 

Sa fai lenei fa’amalosi’au, ina ia mautu i le silafia a le atunu’u e aoga lava tatou faigafaiva sa masani ai i tulaga uma o le fa’asao, ma afai foi e fagota i tatou i ala ua fa’atulafonoina.

 

TOFIA PAUL YOUNG PULESILI FOU O LE “ASH CABLE”

 

O Novema 1, 2019 ua amata galue ai Paul Michael Young i lona tofiga fou ua mae’a tofia e le Amalgamated Telecom Holdings Limited[ATH] e avea ma Pule Sili fou o le American Samoa Hawaii Cable LLC (ASH Cable).

 

Sa avea muamua Young ma faufautua fa’apitoa mo Kovana Lolo Matalasi Moliga, ma sa galue foi o se tasi o taitai sinia i le Puleaga a le ASPA. Ma e i ai foi lona toma’i i mataupu tau fesootaiga ma sa galuega foi o ia e mataupu tau tupe i nisi o fa’alapotopotoga e aofia ai le USAID, le Lio o Malo Aufa’atasi, ma le Faletupe o Asia.

 

O le ASH o le cable lea ua taoto nei i le va o Amerika Samoa, Samoa ma Hawaii ma ua mafai ai ona feso’ota’i Samoa i si vaipanoa uma o le lalolagi po’o le Kelope, peita’i ua fa’aluaina ai feso’otaiga i le va o Samoa na lua, o le SAS, lea e fesootai ai Samoa ma Amerika Samoa fa’apea ma le feso’ota’iga faasoloatoa i feso’ota’iga fa’alaua’itele o le Kelope.

 

Ua fa’ailoa mai, o lo’o ua fa’apa’aga le ASH i le va o le ATH [Amalgamated Telecom Holdings] 67% ma le Malo o Amerika Samoa 33%.

 

Na maua e le ATH o latou siea nei ina ua latou fa’atauina le Blue Sky Communications  mai le Amper SA i le tausaga 2016.

 

O le susuga le CEO o le ATH Ivan Fong ua ia fa’ailoa mai, o le tofia ai o Paul Young i lea fo’i tofiga CEO o le ASH, “O se amataga fou, ma ua matou fa’atalitalia fo’i lona tula’i mai ina ia matou galulue fa’atasi ina ia fa’alauteleina le tautua mo tagata uma, fa’aleleia mea uma ina ia mafai ona fa’aaoga a’ia’i e Amerika Samoa le so’otaga fa’ainiteneti a le Hawaiki Cable, e fa’aleleia ai lona tamaoaiga tausi e maua mai ai. O se leleiga mo tagata uma ma lo tatou malo nei.”

 

E fa’amautu Young i Amerika Samoa i lalo o lona tofiga fou.