Ads by Google Ads by Google

Tala I Vaifanua


O le va’aiga i le mae’a ai ona o’otia le lipine ma le sauniga lotu na fa’apa’ia ai lea fa’amoemoe i le faleta’alo i Leone High i le taeao o le aso Faraile na te’a nei. Ua aofia fa’atasi i latou na tofu sao i le fa’amoemoe, Rep Andra Samoa, [lona lua mai le taumatau] ma le susuga Patrick Danielson, pule a’oga i lenei [Tupito i le taumatau] ma le tama’ita’i sa ia togia le polo muamua ia fafao i le mama o le malae ua mae’a fa’afouina. [ata: Leua Aiono Frost]

5 TAUSAGA & 2 VAIASO - MAE’A FA’ALELEIA FALETA’ALO O LEONE MO TA’ALOGA

 

I le taeao o le aso Faraile na matua fa’afiafiaina ai le a’oga maualuga i Leone, aua ua tatala ai le latou Malae Basketball i totonu o le Faleta’alo i le laumua.

 

O le tatalaga sa saunoa fa’apitoa a le tama’ita’i Faipule o Leone, Andra Samoa, “Sa le mafai ona toe fa’aaogaina le malae lea mo ni ta’aloga faitaulia aua e i ai mea sa tatau ona fa’aleleia muamua, peita’i e lima lelei tausaga o tatalia nei mea e toe fa’aleleia, ae le’i faia lava.”

 

Ona o le umi o tatalia o le toe fa’aleleia o le faleta’alo, e lima lelei tausaga o tatalia, ae ina ua fa’atau e le tamaita’i faipule mea uma e fa’aaogaina mo le galuega, ofo mai ma le tina e ona e le Kamupani Faufale a le Primo Construction e faia fua uma le galuega toe fa’aleleia, o iina loa e na’o le 2 vaiaso ae tula’i mai ua mae’a le galuega.

 

“A o’o ina e loto e fa’atino se galuega lelei, e fa’auia mai e le Atua mafaufauga lelei e fa’atino ai le galuega toe aumai ma le fesoasoani. Fa’afetai i le Primo Construction ma lana taupulega, aua o ia lea ua agaga e fa’aleleia lea faleta’alo, sa mua’i galue malosi ai le tama o le aiga ma le la’ua kamupani lava lea e fausia le faleta’alo i le Laumua o le Liona,” o se tala lea a Samoa.

 

“Fa’afetaia le avanoa ua ou maua, e fa’aaoga ai se seleni fa’atauva’a mo le galuega ua mae’a aua outou le fanau talavou. Fa’afetai i le Fa’atonu o A’oga ina ua fa’ataga mai a’u e fa’atinoa lea galuega. Fa’afetai i le Pule A’oga ma le taupulega fa’apea ma outou le fanau, aua sa outou talisapaia se taumafaiga ina ia tatou galulue fa’atasi, ia maua le taeao lenei. Sili lava ona fa’afetaia le afio’aga o Leone, ona o le latou filifilia o a’u, ua ou mafaia ai ona fai nisi galuega fa’apenei mo le afio’aga ma le lumana’i o le afio’aga, o outou nei e saiiia le atamai i le taimi nei.”

 

Sa ia fa’afetaia fo’i nisi sa fesoasoani malosi i le fa’atauga o mea e fa’aaoga i le toe fa’aleleia o le faleta’alo, le Tool Shop, le Faipule Larry Sanitoa mo le foa’i i le fa’amoemoe, lea ua tino mai ma ua fa’afiafiaina le fanau a’oga, o le a fa’aaogaina lelei lea malae ma le faleta’alo mo ta’aloga faitaulia, e fa’aaogaina ai mea ua mae’a faaleleia.

 

Na tutula’i atoa le fanau a’oga i totonu i le faleta’alo, e fa’ata’amilomilo atoa i latou ma mataituina le o’otia fa’apitoa o le Lipine e tatala ai le faleta’alo ua mae’a fo’i ona fa’aleleia uma e o’o i laina o le malae ma ua toetoe mae’a fo’i ona fa’aleleia lea lava malae mo ta’aloga Volleyball. O le tamaiatai faipule sa ia ootia le lipine.

 

Ina ua mae’a o’otia le lipine sa maimoaina loa le tama’ita’i ua atoa lona 17 tausaga i le aso lenei, o lo’o togia le polo e fa’aulu i le mama Basketball i le malae ta’alo ua mae’a nei.

 

O le tama’ita’i lea o le afafine o le faia’oga o ta’aloga a Leone High, o le tuagane fo’i o le tama’ita’i Faipule Samoa, o ia fo’i lea na mafua ai ona iloa e le faipule, le mana’omia o feagai ma le fanau a’oga i le latou faleta’alo e fia fa’aleleia.

 

I le folasaga a le Pule Aoga, Patrick Danielson mo le fanau aoga, “ua mae’a nei le tatou sauniga e tatala aloa’ia ai le tatou faleta’alo e toe fa’aaogaina i a tatou ta’aloga faitaulia. O se mea ua tatou fiafia tele ai i le amataga o lenei tausaga a’oga. Fa’afetai lea i e na aumaia e le Atua e fa’atinoa o tatou mana’oga. Peita’i, e i ai lo tatou sao e ao ina faia. Ia mautinoa ua e ta’alo ma lou mafaufau, ia taula i le aso lenei ma lona fa’amoemoe, ia alofagia, tausi lelei tatou meatotino ua mae’a fa’aleleia ma aoga e fa’atino ai tatou ta’aloga.”

 

“O nei mea uma e tapena mai e le Malo, ae maise o le tama’ita’i Faipule ua fa’aaogaina mai se vaega o lona totogi, ina ia toe fa’aleleia ai le malae ta’alo ma isi mea uma o le faleta’alo sa leaga ma ua le mafai ai ona fa’aaogaina le tatou Malae i le atoatoa sa sau a’i i le amataga, ia e manatu i le tautiga ma le agaga foa’i o i latou na fa’atinoa lea fa’amoemoe lelei. Tausi fa’alelei nai tatou meatotino ua i o tatou lima.”

 

Ina ua fesiligia le tamaiatai faipule, sa ia fa’ailoa mai, “Ona o lau alauni e $30,000 i le tausaga e ese mai le totogi e $25,000 o lea ua manatu ai e fa’aaoga le Alauni mo nisi o mea e ao ina faaleleia i lo’u itumalo, ma fesoasoani fo’i i le manuia lautele o nai tagata o le matou itumalo.”

 

O nisi o poloketi ua ia fa’aaogaina ai lana lea vaega tupe na amata mai i le fa’atauga fo’i ma la’au suisui e faia ai suisuiga a tina i Leone. Soso’o lea ma le a’oga ta ukulele a le fanau talavou, “ua ou faliu fo’i ma fa’atau Ukulele a le fanau uma o aofia i lea vasega, ina ia mautinoa o lo’o maua lea fo’i agava’a e le fanau talavou, o le lumana’i o le afio’aga ma le tatou atunu’u fo’i.”

 

“Peita’i o le avanoa lea ua ou maua e fa’atupe ai lea galuega lelei mo le fanau talavou o lo’o ua a’oa’oina uma i le Laumua i Leone nei, le nu’u ma le a’oga e pele lava i lo’u agaga,” o sana tala lea.

 

E tusa ai me aofa’iga o le seleni ua ia fa’aaogaina mo lea polokalama mo le fanau a’oga i Leone, sa ia le fa’ailoaina se aotelega ae ua ia fa’ailoa mai, “O na mea e le tau fa’alauiloaina, pau o le mea, ua fa’afetaia ua mafai ona fa’atino.”

 

TOEGA GALUEGA FITA - AUALA I LE FALEMA’I I FAGA’ALU

 

O le aso taeao, aso Lua, ua fuafua e tatala ai le galuega o le fa’alelei o le auala agai atu i le falema’i o le LBJ i Fagaalu.

 

“Ona o tulaga ia mautinoa ua malo lelei le sima, ia le vave fo’i ona toe fa’aleagaina, e ala ai lava ona taofia le solia e ta’avale mo sina taimi. Peita’i o le toe vaega i le ogatotonu o itu e lua o le alatele, lea ua mulimuli ona fa’asima, ma ua iloga ai le loloto fo’i o le sima o folasia ai le alatele e afua mai le magatolu i lumafale o le faleoloa o Ho Ching seia pa’ia le fa’atausi’usi’uga i pito i uta o le falema’i tele,” o se tala lea a Papali’itele Lauli’i Alofa, le e ona le Paramount Builders e tusa o lea galuega.

 

O le ala lea sa fa’aigoaina e Kovana Peter Tali Coleman i lana nofoaiga i le vaitau 1980s ia Dr George Turner Road, ma o se ala fo’i e sili ona faigata lona fausaga ona o le tele o laina o loo feso’ota’i atu ai i le falema’i, e le gata i paipa vai taumafa, o laina fo’i o le eletise ma paipa o le telefoni ua mae’a elia ma fa’auia ai i autafa tonu o le alatele lea.

 

Ua fa’ailoa mai e le Public Works, e le sui mai le vaega a le Highway, “Fa’afetai lava i le Paramount aua o lea e maua lelei e i latou le taimi atofa, e le’i mae’a le 365 aso na fa’atulaga e fa’amae’a lelei ai lea galuega.”