Ads by Google Ads by Google

Tala I Vaifanua


O tatou sui iloga usufono i le fonotaga a le CDC National i Minneapolis Minnesota, Farah Lesa ma o lo’o soso’o lava ma le tama’ita’i fa’atonu o le CDC Tobacco Helen Hacker ma isi sui usufono o lo’o ua feso’otas’i fo’i i lea fonotele a le CDC i lenei tausaga. [ata: foa’i]

MAUA FA’AILOGA DOH GAOIOIGA TAOFIA LE ULAULA TAPAA

 

Mai le fonotaga aoao a le Centers for Disease (CDC) a le fetarale sa faia i Amerika , ua fa’amau fa’ailogaina ai le tatou Matagaluega o le Soifua Maloloina i le taumafaiga ina ia Taofia le Ulaula Tapa’a i le teritori.

 

“Ua iloga mai o Amerika Samoa o le ulua’i teritori o le Iunaite Setete o Amerila ma ona Teritori ua matua maoa’e le latu taumafaiga faa-kemupeni ma ua tamau fo’i e ala i a latou tulafono pasia, ma ua fa’amalosia, ua i ai fo’i i latou ua molia ma ua fa’asalaina ai,” o se lea a le sui sinia o le CDC Aoao, Helen Hacker, i pepa o fa’amatalaga.

 

O sui e to’alua o le DOH Tobaaco/Diabetes Coalition, o lo’o auai i lea fonotaga le fa’atonu ia Farah Lesa ma se tasi o le aufaigaluega na fa’atulaga mo le folasaga sa  fa’amanino ai le mau i Amerika Samoa, “Ia taofia le Ulaula Tapa’a i Nofoaga Faitele ma fale faigaluega i le atunu’u atoa.”

 

O le fa’amau fa’ailoga ua taua’aoina aloaia le Tusi Pasi e tamau ai lea agava’a maoa’e ua o’o i ai taumafaiga a lea Kemipeni o loo fa’atino e le DOH Tobacco Diabetes ma ana pa’aga uma.

 

“I le taua’aoina mai o lea tusi pasi, o se mitamitaga ma o le fa’afetai e tatau ona fa’ao’o ia i latou uma o lo’o latou fa’atino galuega e tua i ai lenei taumafaiga, i a matou pa’aga, le ASEPA, DPS ma le DHSS, le matou aufaigaluega galulue malosi, ae maise le atunu’u atoa i lo latou sapaia o le taumafaiga. Fa’afetai galulue malosi, ua tatou ausia lenei matati’a,” o le saunoaga lea a Lesa.

 

I le saunoaga a Hacker, sa ia fa’ailoa, “Amerika Samoa, ua outou manumalo i se taumafaiga sili ona faigata, e fa’asagatau i le Ulaula Tapa’a ma le taumafaiga taua, ina ia soifua mai a outou fanau i se atunu’u e le o toe fetaia’i ma le ulaula tapa’a.”

 

O se mataupu fou a faaalia nei i lea fonotaga, o le fa’amaoniga lea ua tu’uina mai i le afaina o fanauiti ua a’afia i le ma’i lili ma tele a’afiaga o latou mama, ona o le asu fo’i o sikaleti “e-cigarette” lea sa fa’apea e mafai ona faaaogaina e nisi e suia i ai le fia ulaula, ae leai o lea fo’i ua fa’amaonia e ala i suesuega loloto ua folasia nei i lea fonotaga, o le to’atele o fanauiti e manavaina e i latou lea asu, ma pepe fo’i a i latou e ulaula e-cigarette, e maua lava i nei gasegase.

 

O SE MITI NEI, TAEAO UA TINO MAI” - SINI O LE FONOTELE A LE ASDOE:

 

O le autu o le tauaofiaga masani a le Matagaluega o A’oga na faia i le aso Gafua na te’a nei, ‘ae le’i amata aoga, ua fa’aautu ai, “O le Miti nei, Taeao ua Tino Mai!”

 

O le aufaigaluega sa fa’ataua i lenei tauaofiaga i le Faletaalo a Tafuna High, sa ave ai le fa’amua i le vasega o e galuluega i le Polokalama o Mea’ai a le Fanau A’oga, po’o le SLP.

 

I le saunoaga a Kovana Lolo Matalasi Moliga, sa ia fa’ailoa “O le lumana’i o le atunu’u ua fa’amoemoe maumaua’i i le fanau talavou a’oa’oina lelei, aua ua lelei ona a’oa’oina i mataupu eseese ua fa’atulaga e sailia ai tomai mo’omia mo le fausaga o se malo mautu ma le malosi.”

 

“O i tatou uma o tofu sao i le a’oa’oina o fanau i ona itu uma o le tautua, ia tatou fai le faiva ma le onosa’i, fa’apalepale ma le alofa. Peita’i o le ki o loo i le vasega o faia’oga i le potu a’oga, o outou na o le la’asaga sili ona taua mo le fanau o saili le atamai.”

 

O lo’o outou a’oa’oina Loia, fa’amasino, kovana, faipule, senatoa, fa’atonu sili, kamuta, palama, inisinia, tamaiti o le tekonolosi fou o lo’o tatou taumafai ina fa’amati’e lo latou atamamai ina ia folau ma le manuia Amerika Samoa i atuvasa o lumana’i.”

 

“O le miti a le tatou Malo i le taimi nei, e fa’ato’a tino mai a taeao, ma o fua fo’i na o a tatou galuega uma o lo’o faia i potu a’oga i le vaitaimi nei. O le afuaga fo’i lea o le fa’atula’ia o le “Polokalama Tausi Sau A’oga” mo matagaluega ta’itasi o le Malo, ina ua ulua’i asiasia potu a’oga i a’oga ta’itasi, ua fai lava se to’atele o fanau a’oga i vasega taitasi i le tele o a’oga tulaga muamua ma a’oga tulaga lua fo’i. Ia fesoasoani nei polokalama e fa’aleleia atili nofoaga o lo’o aoaoina ai fanau, ina ia fiafia i latou e talia a’oa’oga, ma atamamai ai.”

 

“Talu mai le amataga o lenei faigamalo ua atoa le 100 o potu a’oga ua mae’a fa’atula’ia i totonu o le atunu’u. O a’oga fo’i e 500 ma sili atu o latou fanau a’oga o aooga ai, ua mae’a ona fa’atulaga le fausia o latou fale ta’alo, pe ua mae’a fausia fo’i o latou faleta’alo.”

 

Ua toetoe maea le faleta’alo o Tafuna Elementary, ua amata fausia fo’i i Masefau Elementary, ona soso’o lea ma Leone Midkiff, Lupelele Elementary, Pago Pago Elementary ma Pavaiai Elementary.

 

“O le masina o Oketopa 2019, o le a suaina ai le eleele e fa’atula’ia ai le Faleta’alo o le Nuuuli VocTech High, ma o se mea ua loa fo’i o molimana’o i ai lea a’oga i tausaga ta’itasi i vaitau e fa’atautaia ai faau’uga o fanau a’oga mai nei tausaga ma pulega e tele ua mavae.”

 

O ana toe upu na ia fa’ailoa ai, “Faafetai ua outou maua se Fa’atonu o A’oga e matua le fo’i lava i lona taumafai e maua mea e fa’atalosagaina e ia mo lana matagaluega. Afai e sau le tali e le mafai se mea na mana’o ai, e toe fo’i atu lava e matua fa’amatala ma fa’amalamalama le aoga o lea mea, ma ‘aisea ua mafua ai ona talosagaina. E tatau lava ona pasia mai ana talosaga uma.”

 

Ua mae’a nei ona taoto le alafua fou mo totogi o faia’oga i potu a’oga, ae maise ai fo’i o le fa’auluuluga o a’oga ta’itasi ma le matagaluega o A’oga, ma ua pasia ua fa’atautaia ai le galeuga a le Matagaluega o A’oga i le taimi nei.