Ads by Google Ads by Google

Tala I Vaifanua


[ata: foa'i]

ME 13, 1975 MALIU AI FITAFITA O SAMOA I VIETNAM A'O TAUTUA

 

O se tasi o fa'amaumauga ua fa'auia mai mo le toe fa'amanatu o le tautua a se tasi o alo o Amerika Samoa Sgt Falaagafua Ilaoa [K-9] a le USAir Force na auai ai o ia i le vaega o fitafita na malaga fa'apitoa i se misiona i le vaitau o le taua i Vietnam, na pa'u lea Helicopter ma e leai se tasi na sao.

 

Ma o nisi o Fitafita Samoa sa latou masani ma iloa lelei Sgt Ilaoa, ua latou fa'auia mai lenei tala ina ia manatua e i latou uma o totoe mai tafa o lea taua fita, le aso na motusia ai le latou mafutaga.

 

O lea Helicopter Tail #68-10933 Model CH-53 aso 14 Me, 1975 Unit 21st SOS, 56th SOW - Nu'u na pa'u ai Thailand. Call sign po'o le Faailo o lea Misiona - Knife 13.

 

Na tu'uva'a ese atu lea Helicopter mai Nakhon Phanom i le itula e 8:30 i le afiafi ia Me 13, 1975 ma lana auva'a e to'a 5 ma le to'a 18 o Fitafita Leoleo a le US Air Force ina ia fesoasoani e fa'asao mai le auva'a a le Mayaguez.

 

Na le toe maua mai se fa'ailoa i lea Helicopter e tusa ma le 40 maila i sisifo o le malae va'alele na tu'uvaa ese atu ai. O le fa'aletonu na matauina ua mafua ai ona pa lea helicopter, ona ua i ai se mea na misi mai le toe fa'aleleiga o lona peapea.

 

Fofomaitulagi Tuitele, o se tasi fo'i sa auai o fitafita Samoa i le taumafaiga i le fa'asaoga o nisi sa i luga o le va'a la'u pusa oloa o le Mayaguez, ua ia toe manatua lea fo'i uso i le galuega, o se alo fo'i o le atunu'u sa tautua mtaua i Vietnam.

 

ELISARA ELISARA - TOFIA O LE PULE FOU O LE OFISA O TIUTE

 

Ua tofia nei le pule fou mo le Ofisa o Tiute a le malo, ma o ia lea o Elisara Pita Elisara mai Vailoa, ma o se tasi o ali'i fitafita tuai ua ritaea mai lana tautua i le vaega au.

 

I se pepa o fa’amatalaga mai le Matagaluega o Tupe a le malo, o Elisara e 25 tausaga o lana tautua i le US Navy lea ua litaea ma lona tofiga Lieutenant Commander. Sa fa’au’u o ia mai le Aoga Maualuga a Leone.

 

Ua fa'ailoa mai i le mamalu o le aufaigaluega ma matagaluega ta'itasi, ina ia maua le agaga galulue fa'atasi ma lea fo'i tofiga fou ua tula'i mai, ina ia mafai ona fa'atautaia galuega i le Ofisa o Tiute, ina ia mautinoa ua ausia sini fa'atutu mo le galuega e pei ona fa'ataoto ai.

 

Talu mai le fa'amavaega a le susuga Liava'a Moevao ia Iulai o le tauaga ua te'a, ona ua tofia nei e avea ma Faife'au Tausi Ekalesia ma le faletua i Huntington Beach Kalefonia, o le susuga Iuliano Falaniko le sui Taitai o le Ofisa o Tiute, sa tauavea mai lea tofi se'ia o'o ina tofia nei Elisara.

 

FINAGALO O LE MALO - 'MV WISE HONEST' KOREA I MATU

 

O le aso Toanai ua te’a na taula ai i le uafu i Fagatogo le va’a oloa, Wise Honest, a le malo o Korea i Matu, leai se pasese, leai se uta ae na toso mai lenei va'a mai le Malo o Initonesia.

 

O lea va’a sa taofia i lalo o le malosiaga a le malo o Amerika ia Aperila 2018.

 

I se pepa o fa’amatalaga i le aso Toana’i, o lo’o fa’ailoa ai sa fono le Sui Kovana Lemanu Peleti Mauga ma sui sinia o le vaega a le malo o Amerika, e aofia ai le Coast Guard, sa malaga mai i le fa’aiuga o le vaiaso ua te’a.

 

E tolu vaiaso na malaga mai ai le Wise Honest mai Indonesia, ma o lo’o faia nei suesuega a le vaega o le Justice Department i lea va’a oloa. E le o iloa tonu le vaitau e ma’e ai lenei suesuega.

 

O le Coast Gaurd faatasi ai ma isi fo'i vaega eseese o le Malo o galulue fa'atasi ai, ina ia mautinoa a'ia'i le saogalemu o le taula ai lenei va'a i le tatou uafu tele i le taulaga, fa'atasi ai ma le tapenaga mautu sa faatalia ai le to'ai taunu'u mai o lea va'a i le tatou taulaga.

 

Ua fa'atino uma tiute o matagaluega eseese e patino i le saogalemu o tagata lautele mai ni fa'alavelave e ono tutupu mai ona o le to'ai taunu'u mai i lenei va'a. Ua mae'a faia siakiga o e uma e ulufale ma ulufafo i le Uafu i so'ose taimi a'o loma le taunu'u mai o le va'a lea, ua faia fo'i tiute o le Matagaluega o Uafu ma Taulaga, kilia fo'i le soifua maloloina o tagata uma na malaga mai le va'a na tosoina mai lea va'a, galulue fa'atasi fo'i le Homeland Security ma le Public Safety ia mautinoa o lo'o saogalemu mea uma.

 

Ua le taofia ai le fa'agaoioiga masani o tiute uma i luga o le tatou Uafu, ia mautinoa lava ua siakia ma fa'ataunu'u faiva e tatau ona faia mo fefa'ataua'iga ma galuega masani.  O lea ua taula nei lea va'a, ma ua fa'aauau fo'i suesuega ua mae'a fa'atulaga e faia i lenei va'a, lea o le a i ai lava tatou sui e galulue ma i latou na malaga fa'apitoa mai a le Feterale e fa'atino ia faiva.

 

FA’ATULAFONO SI’ITIA TOTOGI O PISINISI LAFO TUPE

 

O le masina o Oketopa 2019, e amata ai se tulafono fou i Amerika Samoa e ala i se pili ua ma’ea ona sainia e avea ma tulafono, e fa’atatau i pisinisi lafo tupe.

 

O lea pili, sa pasia e le Fono Faitulafono i le masina o Aperila, o lo’o fa’atulaga ai le tau fa’ae’e mo tupe e lafo i fafo mai kamupani lafo tupe, ae maise le totogi o le laisene ina ia lesitalaina nei pisinisi i le Ofisa o le Financial Institution, o se vaega o le Matagaluega o Tupe.

 

O lo’o fa’ailoa i lea tulafono fou, aiaiga fa'aletulafono o galuega tau felafoa'i o tupe, e Kamupani Lafo Tupe, e le fa'aaogaina pe feso'ota'i fo'i ma tautua a faletupe.

 

"Ua tula'i mai o le tele o aiaiga fa'aletupe fela'ua'i, ua fa'atautaia e le vasega o pisinisi nei ae ua le fa'aaogaina ai faletupe ma o nei pili ua fa'ae'e i tautua nei, ina ia mautinoa ai tali fetaui a latou tautua ma le totogi e tatau ona totogia ai." O se fa'amatalaga lea ua fa'ailoa mai e le susuga le Loia Sili, Talauega Eleasalo Ale, lea na sainia lea pili e avea ma tulafono, i le aso 29 o Aperila, i le vaitimi o avea ma kovana-le-tumau o le malo.