O le talosaga ai o le malo ina ia solofua moliaga mamafa o le umia faasolitulafono o fualaau faasaina faasaga i se alii talavou, na faasala ai loa e le Faamasinoga le ua molia e nofosala i le Toese mo aso e 90, ina ua ta’usala o ia i le moliaga mama o lona umia faasolitulafono lea o ni pulu fana.

O le vaiaso na te’a nei na tula’i ai le susuga a Johnny Vou i luma o le Fa’amasinoga Maualuga mo le lauina o lana fa’asalaga. O le ali’i Loia Fautua  ia Rob McNeill na tula’i mo Vou ae o le tamaitai loia sili lagolago ia Kristine Soule na fai ma sui o le malo.

Na ulua’i tu’uaia Vou i moliaga e aofia ai le umia faasolitulafono o vaega o le pauta faasaina o le aisa ma le faamoemoe e tulei ma faatau atu i isi tagata; umia faasolitulafono o le aisa; faapea ai ma isi moliaga mamafa e 2 o le umia faasolitulafono o ni pulufana.

Ae i lalo o se maliliega aufaatasi na sainia e le ua molia ma le malo, lea fo’i na talia e le Fa’amasinoga Maualuga i le masina na tea nei, na malie ai Vou e tali ioe i le moliaga o lona umia faasolitulafono o ni pulufana, o le vaega A lea o solitulafono mama, lea e mafai ona faasala ai se tasi i le Toese mo le umi e oo atu i le tasi le tausaga, faasala i le salatupe e mafai ona oo atu i le $1,000, poo le faasala fo’i i faasalaga uma ia e 2.

I le tali ioe ai o Vou i le moliaga e pei ona ta’usala ai o ia e le Fa’amasinoga Maualuga, sa ia ta’utino ai loa e fa’apea, i se taimi o le aso 30 o Novema 2018, na ia umia faasolitulafono ai ni pulufana e aunoa ma se faatanaga faaletulafono.

O se tasi o tuutuuga o le maliliega i le va o le malo ma Vou, o le malie lea o le malo e solofua moliaga pito sili ona mamafa sa latou faila faasaga ia Vou, lea e aofia ai moliaga o le umia faasolitulafono o fualaau faasaina, faapea ai ma le umia faasolitulafono o aisa ma le faamoemoe e tulei ma faatau atu i isi tagata.

E manatu le malo, e ono fesiligia le auala na maua ai e Leoleo fualaau faasaina i le fale o Vou i le aso na tula’i mai ai le faalavelave, ona o Leoleo na tali atu i le talosaga mo se fesoasoani ina ua manu’a tigaina Vou i se vevesi, ae maua ai e Leoleo fualaau faasaina ma pulufana i totonu o le fale a le ua molia.

Ina ua maua le avanoa a Vou mai le Fa’amasinoga, sa ia faatoese ai loa e tusa ai o lana solitulafono, atoa ai ma lona talosagaina o se isi avanoa mo ia se’i toe fo’i atu ai i tua e saili sana galuega e tausi ai ona matua ma auauna ai i le Ekalesia, nu’u faapea ai lona aiga.

Na talosaga le loia a Vou ia McNeill i le Fa’amasinoga e talia le fautuaga a le Ofisa Faanofovaavaaia, ma ia faasala le ua molia i se faasalaga faanofovaavaaia. Na taua e McNeill e faapea, o Vou, o se alii talavou e le i aafia lava lona olaga i se solitulafono, a e o le taimi muamua lenei ua nofosala ai o ia i se solitulafono.

O ia o se alii e tautua ma le faamaoni i ona matua ma lona aiga, e faatuatuaina fo’i o ia e lona aiga i soo se mea e fai. I le talitonuga o McNeill, e alaga tatau ona faasala Vou i se faasalaga nofovaavaaia e aunoa ma le toe tuuina atu i ai o se isi taimi na te tuliina i le Toese, a ia fa’aaoga aso e 72 lea sa taofia ai o ia i le Toese a o faagasolo lana mataupu e fai ma ana faasalaga.

Na tete’e le loia a le malo i le talosaga a le itu tete’e. Na taua e le loia a le malo e fa’apea, talu ai le matuia o tu’uaiga faasaga ia Vou, lea e aofia ai ma moliaga ua solofua e le Fa’amasinoga o le umia faasolitulafono o fualaau faasaina ma le faamoemoe e faatau atu, e manatu ai le malo, e alaga tatau lava ona tuu atu se faasalaga faa falepuipui i lenei ali’i.

Na fesili le afioga i le ali’i Faamasino Sili lagolago ia Fiti Sunia i le loia a le malo, pe faapefea ona tupu le tulaga lea, o le finau o le malo e faasala le ua molia i se solitulafono ua uma ona latou talosaga e solofua.

Ae na tali le loia a le malo, e ui ua uma ona solofua moliaga pito sili ona mamafa sa tu’uaia ai le ua molia, peita’i e tumau pea mau faamaonia e lagolago ai tu’uaiga faasaga ia te ia, aemaise ai o le maua ai e Leoleo o fualaau fa’asaina i totonu o lona fale i le aso na pu’e faapagota ai o ia.

O le mae’a ai ona iloilo e ali’i Fa’amasino o faamaumauga uma e faatatau i lenei mataupu, na latou tuuina mai ai loa le faasalaga mo le ua molia, ina ia nofovaavaaia o ia mo le 5 tausaga i lalo o tuutuuga faapitoa e ao ona usita’i i ai, e aofia ai lona tuliina o aso e 90 i le Toese i Tafuna, ae faitau ai ma aso e 72 lea ua mae’a ona ia tuliina.

Saunoa Sunia e faapea, o le mataupu e pei ona ta’usala ai le ua molia, na alia’e mai ina ua talosagaina e lona aiga se ta’avale Falema’i atoa ai ma le fesoasoani a Leoleo, ina ua tula’i mai se vevesi ma manu’a ai le ua molia.

E to’atele Leoleo na tali atu i lea valaau, ma maua ai le avanoa e feiloa’i ai ma le alii ua molia i lona fale i Ottoville. A o faatalatalanoa e Leoleo le ua molia i le faalavelave na mafua ai ona manu’a, na iloa atu e le isi Leoleo se pusa e tuu ai pulufana o le ituaiga fana o le .32 caliber o loo taatia i autafa o le moega o loo taoto ai le ua molia. Na saili le fale ma maua ai fualaau fa’asaina faapea ai pulufana.

Saunoa Sunia e faapea, ua manino i faamaumauga ua mae’a ona tauaao atu i luma o le Laulau o Faamasinoga faamatalaga uma e faatatau i le alii ua molia. O ia o se tagata na soifua i se olaga lelei toe sogasoga. Sa faauu mai i le Aoga Maualuga ma amata ai loa ona atia’e lona olaga seia oo ina malaga atu i Alaska ma faigaluega ai. Mulimuli ane na toe fo’i mai o ia i Amerika Samoa e tausi ona matua ma lona aiga ma faaauau ai pea lona olaga faigaluega, seia oo loa ina tula’i mai le fa’alavelave e pei ona aafia ai o ia.

E talitonu le Fa’amasinoga, e agava’a le ua molia i se faasalaga faanofovaavaaia, ona o le tele o itu tetele ua maitauina i lona olaga.

O nisi o tuutuuga o le nofovaavaaia a Vou e 24 masina, o lona tuliina lea o aso e 90 i le Toese i Tafuna ma totogi le salatupe e $1,000. Ua fautuaina o ia ina ia tau mamao ma le ‘ava ma fualaau fa’asaina, e mafai fo’i ona faia se suega i lona tino i soo se taimi ina ia faamaonia ai lona nofo mama mai fualaau fa’asaina.

O le afioga i le Faamasino Lagolago Sinia ia Mamea Sala ma le afioga a Tunupopo Alalafaga Tunupopo na lagolago ia Sunia i le iloiloina o se faasalaga i lenei mataupu.