Ads by Google Ads by Google

Falepuipui le ali’i na ia faia uiga mataga i lona niece 16 tausaga

ausage@samoanews.com

E 20 masina lea ua faasala ai i le Toese i Tafuna le ali’i e 40 tausaga le matua, lea ua ta’usala i lona faia o uiga mataga i lona niece e 16 tausaga le matua i le tausaga na te’a nei.

 

[O le a taofia e le Samoa News le faailoa o le igoa o le alii ua molia i lenei mataupu, ona o le taumafai e puipuia le ono iloa atu ai ma le suafa o le tamaitai na aafia i lenei solitulafono]

 

O le vaiaso na te’a nei na tulai ai le alii ua molia i luma o le Fa’amasinoga Maualuga mo le lauina o lana fa’asalaga. O le ali’i Loia Fautua lagolago ia Rob McNeill na tula’i mo le ua molia, ae o le tamaitai Loia Sili lagolago ia Laura Garvey na tulai mo le malo.

 

Na uluai tuuaia e le malo le ua molia i moliaga e 2 o le faiaiga faamalosi ma se tamaitai; 2 moliaga o le faia o gaioiga faafeusuaiga; tasi le moliaga o le faiaiga i se tagata e aiga i ai; 2 moliaga o le tagofia o itutinosa o se tamaitai e laitiiti i le tulafono.

 

Ae i lalo o se maliliega na sainia e le ua molia ma le malo, na malie ai le alii ua molia e tali ioe i le moliaga e tasi o le tagofia lea o itutinosa o se tamaitai e talavou i lalo o le tulafono i le tulaga maumua, o le vaega D lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, pe faasala foi i faasalaga uma ia e lua.

 

I le tali ioe ai o le alii ua molia i lenei mataupu, sa ia ta’utino ai e fa’apea, i le va o le aso 1 o Novema o le 2018 ma Fepuari 25 o le 2019, na ia faia ai uiga mataga i le tamaitai na aafia e aofia ai ma se la mafutaga faaleulugalii.

 

Ina ua maua le avanoa o le alii ua molia mai le Faamasinoga, sa ia faatoese ai loa e tusa ai o lana solitulafono sa faia, ma ia talosaga ai mo se faasalaga mama mo ia.

 

Sa ia taua e fa’apea, o lana solitulafono lea ua mafua ai ona faaletonu le la ulugalii ma lona to’alua, ma tuua ai e lona to’alua o ia ma le la fanau e toafa ae malaga ese atu ma le aiga. Sa ia tuuaia o ia lava i lona faamatala ua mafua ai ona tutupu nei faaletonu i lona aiga ma lona olaga. 

 

Na talosaga McNeill mo se faasalaga faanofovaavaaia, ia mafai ai ona vave alu le ua molia i tua e saili sana galuega e tausi ai lana fanau ma lona aiga. E ui i le matuia o le gaioiga sa faia e le ua molia, ae na taua e lana Loia fautua, e agavaa le ua molia mo se faasalaga faanofovaavaaia.

 

Na lagolagoina e Garvey le talosaga a McNeill mo se faasalaga faanofovaavaaia, e aofia ai ma le tuutuuga o le tuua lea e le ua molia o le atunuu ae toe foi atu i Samoa, pe afai ae maea ona tuli se faasalaga faa falepuipui e finagalo i ai le Fa’amasinoga.

 

Na taua atili e Garvey e fa’apea, o le faasalaga o le a tuu atu i le alii ua molia, o le a momoli atu ai foi ma se feau taua i isi tagata o loo faia lenei solitulafono mataga, e le manatu mama le Faamasinoga i ituaiga amioga mataga faapenei.

 

A o le i aumaia le faasalaga a le Fa’amasinoga, na toe faatepa e le Fa’amasinoga itu e lua e tusa ai o mau faamaonia o le faalavelave sa tulai mai.

 

E pei ona taua e le Fa’amasinoga e faapea, o lenei mataupu na tofu atu i le Ofisa o Leoleo i Tafuna, ina ua ripotia le faaoolima o le alii ua molia i lona toalua ma lona niece na aafia. E le gata na ia ta tu’i foliga o lona to’alua ae sa ia kiki fo’i le tua o lona niece ma ta tu’i o ia.

 

Na taua e le to’alua o le alii na aafia i Leoleo e fa’apea, e le gata na faaoolima lona to’alua ia te ia ma lona niece, ae sa ia faia foi uiga mataga i lona niece, o le mafuaaga lena na tulai mai ai le vevesi e pei ona faaoolima ai le ua molia ia te ia ma lona niece.

 

Na taumafai le to’alua o le alii na aafia e fesiligia le ua molia pe faamaonia o lo o faia le la mafutaga faaleulugalii ma le tamaitai na aafia, ae na avea ma itu na ita ai le ua molia ma faaoolima ai loa i lona toalua ma lona niece.

 

Na fesiligia e Leoleo le tamaitai na aafia ma ia faamaonia ai mea uma sa tutupu i le la va ma lona uncle (le ua molia), e aofia ai le tauanau faamalosi o ia e lona uncle la te momoe, peitai sa musu ma tago ua tuli i fafo ma lona potu.

 

I le va o le masina o Novema ma Tesema o le 2018, na faia ai loa e le ua molia uiga mataga faafeusuaiga i le tamaitai na aafia, ma faaauau mai ai lava seia oo mai i le masina o Ianuari ma Fepuari o le tausaga e 2019.

 

Ina ua fesiligia e Leoleo le ua molia e tusa ai o lenei mataupu, sa ia ta’utino ai, e moni tu’uaiga faasaga ia te ia. Sa ia faailoa foi i Leoleo, sa malie le tamaitai na aafia i le la mafutaga faaleulugalii.

 

Na taua e le Fa’amasinoga e fa’apea, o le gaioiga sa faia e le alii ua molia, ua atagia mai ai lona aveesea o le talitonuga sa tuuina atu e le tamaitai na aafia ia te ia, e avea ai o ia ma ona Tama. Na taua atili e le Fa’amasinoga e faapea, o le itu e sili ai ona matuia lenei solitulafono, o le faatino lea e le alii ua molia o uiga mataga i lona lava niece i totonu o le fale o lo o nonofo ai ma lona toalua ma lana fanau.

 

“O le tamaitai na aafia na nofo i lalo o le tausiga ma le vaavaaiga a le alii ua molia. Sa tuu atu uma lona talitonuga atoa ai ma lona faatuatuaga i le ua molia, e fai ai o ia ma ona Tama ma tausi faalelei ia te ia,” o le saunoaga lea a le Fa’amasinoga.

 

E 5 tausaga e nofosala ai i le Falepuipui ma le salatupe e $5,000 le faasalaga a le Fa’amasinoga mo le alii ua molia, peita’i ua manatu le Faamasinoga, o le a faamalumalu le usitaia e le ua molia o lenei faasalaga, ae o le a nofovaavaaia o ia mo le 5 tausaga i lalo o poloaiga e tatau ona usitai i ai.

 

O ia poloaiga e aofia ai lona tulia o masina e 20 i le Toese, a mae’a, ona ia tuua lea o Amerika Samoa ae toe fo’i atu i Samoa ma aumau ai mo le umi e 5 tausaga o lana nofovaavaaia.

 

E tusa ai ma le tulafono, e tatau ona lesitala le igoa o le alii ua molia i le lisi o tagata ua nofosala i le faia o uiga mataga i fanau laiti, atoa ai ma le faia o se suega i lona tino e faamaonia ai, na te le o tauavea le siama o le faama’i o le HIV.

 

Ua faatonu foi e le Faamasinoga le Loia a le malo e tuu atu se kopi o lenei faaiuga i le Pulesili o le Ofisa o Femalagaaiga, ma ia mautinoa e aofia le igoa o le ua molia i le Lisi o tagata e le mafai ona toe ulufale mai i Amerika Samoa.