Ua fa’alauiloa mai e le Faatonusili o le Matagaluega o Tautua ma Alagamanuia mo Tagata Lautele (DHSS), ia Muavaefa’atasi John E. Suisala, le taliaina e le Matagaluega o Fa’ato’aga a le Malo o Amerika (USDA), ia se talosaga mo ni pepa taumafa fa’aopoopo (ponesi), e fa’atasi ona tau’a’aoina, ae e le’i tapunia le tausaga tupe 2024 po o penefiti i faaiuga o tausaga (EOY-End of the Year).

O le aofa’iga o nei pepa taumafa fa’aopoopo e $290 mo ē o lo’o talia nei pepa taumafa (food stamp) mai i le ASNAP (American Samoa Nutrition Assistance Program. 

O le ponesi lenei (EOY benefits) o le a fa’atupeina i tupe o lo’o totoe mai i le alagatupe mo le ASNAP mo le tausaga fa’aletupe 2024 e fa’agata ia Setema 30, 2024. O pepa taumafa fa’aopoopo (ponesi po’o le EOY benefits) mo le 2024 e $290, o le a tufatufaina fa’atasi ma pepa taumafa masani mo le masina o Setema i le ofisa a le ASNAP e amata atu i le Aso Lua, Setema 3, 2024, seia o’o i le Aso Gafua, Setema 30, 2024.  Ma e fa’asolo fo’i i mata’itusi e pei ona fa’atulagaina ina ia faigofie le fa’asoa atu. 

Ua fa’aalia e le susuga ia Muavaefa’atasi le agaga fa’afetai i le mamalu o le fa’auluuluga o le Matgaluega o Fa’ato’aga a le Malo (USDA), atoa ma le aufaigaluega, mo le sapasapaia pea o le polokalama a le ASNAP, aua le mamalu o le atunu’u o lo’o mana’omia lenei tautua.

Na fa’aalia foi le agaga fa’afetai o le Faatonusili i le afioga i le Kovana, Lemanu P. S. Mauga ma le Kovana Lutena, le tofa ia La’apui Talauega E. V. Ale, mo le ta’ita’iga ma le sapasapaia pea o lenei matagaluega ma ona polokalama.

Ua fa’amanatu mai foi e le faatonusili i le mamalu o le atunu’u o le a fa’amanuiaina i nei pepa taumafa faaopoopo, ina ia fa’aaoga tatau aua taumafa mo le tausiga o le soifua maloloina.

Mo nisi faamatalaga auiliili, e mafai ona fa’afeso’ota’i le ofisa a le ASNAP i le 633-7720/7451.