Ads by Google Ads by Google

IOE LE FBI PEPELO I ONA MOLIAGA

Na fa’amanino e le alii faamasino sili ia Michael Kruse i luma o le faamasinoga i le aso ananafi e faapea, o le tali e “Le Tete’e” i se solitulafono, e tali tutusa lelei lava ma le tali “Ioe”.

 

Na afua le saunoaga a le alii faamasino sili, ina ua tali le alii o Alatise Fonoti, e 63 tausaga, e “Le Tete’e” i moliaga o le gaoi ma le tau faavalea, ina ua o la pelogia ma le alii o Aperaamo Levi ni tagata se to’a 25, o i laua o ni sui o le FBI ma o lo o ia i laua se tupe e totogi ai ni tagata faigaluega e faamama se fanua e fau ai se fale tele, ae mae’a ifo le galuega, ua fiu tagata e tulituli a latou totogi.

 

Ua maea nei ona sainia se maliliega a Fonoti ma le malo ma ua tuuina atu lana tali e le tete’e i le moliaga o le gaoi ae o lo o faagasolo pea feutanaiga a le loia a Levi ma le itu a le malo mo se maliliega e faamuta ai lana mataupu.

 

I le tali ai o Fonoti e le tete’e i le moliaga o le gaoi, sa ia tautino ai i luma o le faamasinoga ananafi e faapea, i le va o le masina o Fepuari ma Mati 2010 na la o ai ma le alii o Aperaamo Levi ma fai sa laua taupulepulega, ina ia la o e saili ni tagata e faa faigaluega i le faamamaina o lona fanua, ae pepelo i ai o laua e faigaluega i le Ofisa o le FBI i Amerika Samoa, ma o lo o i ai se tupe ia te i laua e mafai ai ona faa faigaluega ni tagata.

 

Sa le gata ina folafola i ai e nei alii i tagata ia totogi e ta’i $10 i le itula, ae faapea foi ponesi e ta’i $400, ma le $100 e maua e le tagata i le vaiaso pe afai e ofo atu e se tagata lana taavale e la’u atu ai tagata faigaluega i le taeao ma toe momoli i o latou aiga i le afiafi

 

Sa ia folafola fo’i i tagata nei isi faamanuiaga latou te maua e pei o masini faapa’u falaoa, masini DVD ma T.V pe afai ae lelei le faatinoina o le galuega.

 

Na ta’utino Fonoti i luma o le faamasinoga e faapea, e leai ma se isi o nei tagata e to’a 25 na maua se totogi po o ni ponesi ta’i $400 e pei ona sa ia folafolaina, ma isi lava mau mea na o la folafolaina atu.

 

Na fa’aalia foi e Fonoti, lona malie e toe totogi vaega tupe i tagata e to’atolu o lo o ia nofo aitalafu ai, e pei o le $430 mo Penoa Lafaele; $2,040 ia Feiloaiga Sauni; ma le $660 ia Pelosi Laulu.

 

Ua sauni loia a itu e lua mo a laua faafinauga i luma o le faamasinoga aua se faasalaga mama mo Fonoti, peitai ua malamalama Fonoti, e pule le faamasinoga pe talia pe teena ia talosaga, aua o lo o i ai i le faamasinoga le malosi i soo se faasalaga e manatu ua talafeagai ma lana solitulafono.

 

Ina ua fesiligia e le alii faamasino sili le ua molia po o fea na aoga ai, sa ia taua na faauu mai i le aoga maualuga a Leone, ma ulufale atu ai i se tasi o Iunivesite i Niu Sila.

 

O le alii loia fautua ia Douglas Fiaui o lo o tulai mo Fonoti ae o le tamaitai loia ia Camil Phillipe o lo o tula’i mo le itu a le malo i lenei mataupu.

 

O le afioga i le faamasino sili ia Michael Kruse o lo o taulimaina lenei mataupu, i le lagolagosua a afioga i alii faamasino lagolago ia Logoai ma Faamausili,

 

Ua toe taofia nei Fonoti i le toese i Tafuna e faatali ai le isi ana iloiloga i le aso a taeao.