Ina ua fofoga e le fa’amasinoga lana fa’asalaga fa’asaga i se ali’i ua ta’usala i lona faia o uiga mataga i se tama’ita’i e talavou i lalo o le tulafono, na taua ai le afioga i le ali’i fa’amsino sili ia Michael Kruse, ona finagalo ina ia fa’amalosia uma tulafono e lua lea e poloaina ai le lesitala o le ioga o le tagata ua ta’usala i le faia o uiga mataga i fanau laiti.

O tulafono e lua e pei ona fa’atatau i ai le saunoaga a le afioga i le ali’i fa’amasino sili, o le tulafono 46.2801 o lo o i lalo o le Tulafono Toe Teuteu a Amerika Samoa, atoa ai ma le tulafono fou lea na fa’atoa pasia e le Fono Faitulafono i le nofoaiga ua mavae atu (SORNA acts), lea fo’i ua sainia e le ali’i kovana.

O le taua o le fa’amalosia uma o tulafono nei e lua e pei ona saunoa Kruse, ina ia mautinoa ai e le pau se vaega o nei tulafono i le taimi e fa’amalosia ai.

I lalo o le tulafono tuai o lo o i ai e lesitala ai i latou e ta’usala i le faia o amioga mataga i fanau laiti, o lo o i lalo lea o le vaavaaiga a le Pule o le Toese, peit’ai i le tulafono fou o le SORNA e pei ona pasia talu ai nei e le Fono Faitulafono, o lo o taoto atu ai le vaavaaia o lea tulafono i lalo o le Ofisa a le Loia Sili o le malo.

O lea auala e pei ona taua i ni isi o vaega o le tulafono, e le gata e faigofie ai ona saili fa’amaumauga mo so o se tagata ua ta’usala i le faia o uiga mataga fa’asaga i fanau pe afai e ulufale mai, ae faigofie ai fo’i ona galulue fa’atasi le Ofisa o le Loia Sili ma ofisa fa’amalosi tulafono a le malo e aofia ai le Ofisa o Leoleo.

Ae na taua e le Loia Sili ia Talauega Eleasalo Ale ina ua molimau i luma o le Senate i le masina o Ianuari na te’a nei e fa’apea, o ni isi o sauniuniga a lona ofisa mo le fa’amalosia o le tulafono o le SORNA, e aofia ai le auina atu o ni isi o le aufaiglauega e a’oa’oina i ni aoaoga o le a faia i le malo tele.

O nei aoaoga e pei ona taua e le ali’i loia sili i lana molimau lea, o le a mafai ai ona a’otauina le aufaigaluega i auala e tu’u fa’atasia ai fa’amaumauga e fa’atatau i tagata o lo o a’afia i lalo o le tulafono, aemaise ai fo’i o le auala e fetufaa’i ai fa’amaumauga fa’asaga ia i latou nei.

O le taua o le tulafono fou o le SORNA lea ua pasia nei e le Fono Faitulafono, o le a faigofie ai ona silafia e le atunu’u fa’amatalaga e fa’atatau i so o se tagata fou e malaga mai ma nofo i totonu o le atunu’u, ina ia mautinoa ai o lo o saogalemu fanau laiti mai nofoaga eseese o lo o malaga solo i ai i latou ua ta’usala i le faia o uiga mataga i fanau laiti.