Vaega: 6

Malo le soifua i le mamalu o le atunu’u, e i ai pea le fa’amoemoe, o lo’o manuia pea fuafuaga uma o lo’o feagai ai ma le atunu’u i lenei aso. Tatou sunu’i ai lapalapa o malo ma fa’afo’i le vi’iga i le Atua Soifua, ona o Lana tausiga alofa mo i tatou e le mavae i aso uma o lo outou soifua fa’apea ma si o’u nei ola vaivai. Ia manuia faiva ma tiute o le a feagai ai i lenei aso.

Ae alo maia, o le vaega lona ono lenei o la tatou tala e pei ona masani ai ae ia manuia lava faiva ma tiute o le a feagai ai ma oe i lenei aso. Na muta mai la tatou tala ina ua nimo ma ua le toe va’aia le tama’ita’i sa o fa’atasi ma Tiali Moneti i luga o le Muaga o Elekone po’o Mount Elgon, ae maise ai o totonu o le ana o Kitum. E i ai le manatu ua maliu lenei tama’itai, ona ua maua o ia i le fa’ama’i o le AIDS.

Ae fa’asolo pea lau faitau i la tatou tala, manatua, o lenei tala o se tala moni lava ma na tusia e le ali’i tusi tala lauiloa e suafa i a Richard Preston, ae ua ou taumafai e fa’aliliu i la tatou gagana ona e taua tele mo i tatou.

Afai fo’i o le a se upu o le a le tautamali’i pe ua paopapa ia malu ave i fale i lou finagalo, o le taumafai lava ina ia fa’apupula ma fa’amanino lau faitau ae maise fo’i o lenei fa’ama’i mata’utia o le AIDS ae tainane fo’i o isi virusi e pei ona ta’ua i lenei tala e le ali’i tusi tala o Richard Preston.

Ua toe amata galuega a Tiali Moneti (Charles Monet) i totonu o le kamupani e gaosia ai le suka i totonu o Aferika. E savali lava lenei ali’i i lana galuega i taeao uma, ma e le taumate o lo’o ia mata’ina pea le Mauga o Elekone, ma a ufitia fo’i le Mauga i ao, e le taumate o lo’o ia fa’alogoina pea le malosi o lenei mauga, fa’atasi ma le ana o Kitum lea sa o la i ai ma lana uo tama’ita’i.

A’o le taimi tonu fo’i lea, e foliga mai ua i ai se isi mea o lo’o ola i totonu o Tiali, o se ola fou, ma ua avea Tiali Moneti ma ona nofoaga tumau, ma o lo’o olaola pea. Ina ua mavae Aso e fitu (7) talu ona ia tu’ua le ana o Kitumi o lo’o i le Mauga o Elekone, na suia ai le fa’alogo a Tiali, ua amata ona tiga lona ulu.

 Ianuari Aso 8, 1980. Ua fa’alogoina e Tiali le tiga o totonu o ona mata, ma sa ia manatu ai loa e sili pe a malolo mai i lana galuega i lea aso. Ae peita’i, ua fa’ateleina lava le tiga, e o’o fo’i i totonu o ona mata, ma ua fa’asolo ifo i lona ulu, ma o tiga nei ua a’afia ai lona ulu atoa. Na fiu Tiali e inu fuala’au, ae e le alu ‘ese ai le tiga, ua amata nei ona tiga lona tua.

O le tina e igoa ia Sieni, o lo’o teuina le fale fa’apea ma le faiga o ana mea’ai i le taimi lea, ona o lo’o ave pea aso malolo mo le Kirisimasi ma le Tausaga Fou a le tina e masani ona teuina lona fale. Na taumafai pea le tina e fesoasoani i a Tiali aua ua va’ai atu ua tigaina.

Ae ina ua mavae aso e tolu talu ona tiga le ulu, o mata fa’apea ma lona tua, ua amata nei ona fa’asuati ma ua maua Tiali i le fiva. Ua tele le suiga ua va’aia nei i uiga o Tiali, talu ona maua i le fiva, ua tale mai ona fatutale ua to’a atoa, i le taimi fo’i lea ua suia atoa ona foliga, ma ua le mafai ona toe va’aia ona foliga sa masani ai.

Ua le fiafia ma ua le fia talanoa i se tagata, ae ua na o le pupula fa’asiasia, e foliga mai ua le iloa atu se mea ma ua le iloa fo’i po’o fea le mea lea e i ai. Ua amata ona moei’ini ona laumata ma e foliga mai ua amata ona o mai i fafo ona mata fa’apea ma ona foliga ua matua’i suia lava i se va’aiga uiga ‘ese ma le mata’utia. O polo o ona mata ua foliga mai ua le toe mafai ona toe minoi solo, o le pa’u fo’i o ona foliga ua liua i le lanu samasama, ua le foliga mai i se tagata ola, ae ua foliga i se tagata e pupula mai fua, ae ua oti.

E faia pea

Fa’aliliu: Akenese Ilalio Zec